پاوه‌مووری نوواێ په‌ریشانی گرێد!

شفق نيوز

ئه‌مان له‌ وه‌خت له‌ ده‌س داین و له‌ دنیا چین ئه‌زیزه‌یل وه‌ مدووْ یه‌گ فشارْ یه‌ێجاره‌کی و فره‌ێگ وه‌ ئه‌و که‌سانه‌ ک ئازیه‌تبار و داخ دیده‌ن‌‌ تیه‌ێد، دۊنیم ک تا نزیک یه‌ک مانگ هه‌ر رووژ گیره‌ و زاری‌ که‌ن، تا یه‌ک مانگ نرکْ دڵ ده‌ن و بوڕنن(وه‌ تاێبه‌ت ژن و ئافره‌ته‌گان). بوڕانن جوور گیرسنه‌یل تره‌ک نییه‌، ئاێه‌م په‌شێو و په‌ریشانه‌و که‌ێدن.

ئمجا ئه‌گه‌ر بنوڕیم وه‌ وڵات کورده‌واری خوه‌مان دۊنیم ژن و ئافره‌ته‌گان له‌ چووارچووْ پاوه‌مووری ک جوورێگ مووسیقی فۆلکلۆره داخ و خه‌م ‌له‌ ده‌س داین ئه‌زیزه‌گانێیان نیشان ده‌ن و خوه‌ێیان ئارامه‌و که‌ن. ئه‌و هارموونی و ئاهه‌نگه‌ ک پاوه‌مووری دێرێد نیه‌یلێد ک ئه‌و ئافره‌ته‌ په‌شێو و پریشانه‌و بوود.

ماموستا شه‌فیعی که‌دکه‌نی له‌ ناو کتاو «موسیقی شێعر» ئاماژه‌ وه‌ مه‌راسمێگ ک وه‌خت مردن مه‌سیحیه‌گان له‌ کلیسا وه‌ رێیه‌و‌ چوود کردێیه‌ و ئۊشێد ئه‌و مووسیقیه‌ ک له‌ ناو ئه‌و مه‌راسمه‌ هه‌س نوواێ په‌ریشانی ئازیه‌تباره‌گان گرێد.

که‌متر دیمه‌ ژن و ئافره‌ته‌یل هاوچه‌رخ خوه‌مان موور بارن ئه‌مان گه‌وراتره‌گان هێمان ئه‌ڕاێ تاوشت داخ ئه‌زیزه‌یلێیان پاوه‌مووری وه‌ کار گرن. فره له‌ ‌لێیان هه‌ن ک بێجگه‌ داخ باوگ و داڵگ و خوه‌یشک و برا داخ چه‌ن رووڵه‌ێ نازاریش دینه‌ و تاوشت هاوردنه‌.

چه‌ن به‌ێت ک له‌ ناو پاوه‌ مووری خوه‌ننان

دیواخان سه‌رپه‌ڕ که‌و وه‌ به‌نه‌وه‌/فه‌ڵه‌ک بێ مروه‌ت زه‌وق لیت سه‌نه‌وه‌

بیل دیواخاند‌ رۊ وه‌ خه‌رمان بوو/تا گووشد وه‌ ده‌نگ کیڵه‌ و پێمان بوو

دیواخانه‌گه‌د گردێیه‌ ره‌نگ شه‌و/نه‌ چریکه‌ێ مه‌له‌ نه‌ هیلْ هال که‌و

که‌ود باره‌ وه‌ر کۆمێت بکه‌ زین/وه‌ سارا مه‌چی وه‌ سه‌ێر بوورچین

سه‌رسه‌وز و بوورچین مه‌ل وه‌ هه‌واوه‌/خوه‌یشک برا مردێ باوان خراوه‌

سه‌رسه‌وز و بوورچین مه‌ل وه‌ هه‌واوه‌ /داڵگ رووڵه‌ مردێ جه‌رگێ که‌واوه

مازيار حه‌يده‌ری