سووكایه‌تیكردن وه‌ملله‌ت... له‌وه‌رخاتر پۆسته‌یل

شفق نيوز

ناسیاسى هه‌وڵ ئه‌وه‌ ده‌ن باوه‌ڕ وه‌فڵان بارن هاوكارى وه‌لیانا بكا له‌جیاى ئه‌وه‌ك هاوكار بوون وه‌لیا. یا ئویشن وه‌زاره‌ت ناوخوه‌یى ده‌یمنه‌ پیدان و ئیوه‌یش وزاره‌ت وه‌رگرى یا دیفاع بیه‌نه‌ پیمان، وه‌لى كى پۆسته‌گه‌ گریگه‌ده‌س و چوینه‌و توانایى چه‌نیگه‌؟ ئه‌یه‌ مه‌سه‌له‌یگه‌و ئه‌وه‌نه‌ گرینگى یا ئه‌همیه‌ت نه‌یریگ.

باس كه‌ن و ئویشن: ڕووژیگ  له‌ڕووژان شێخ گه‌ورایگ  په‌یوه‌ندى كرده‌سه‌ نورى سه‌عید و داوا له‌لى كردگه‌ كوڕه‌گه‌ى بكه‌یگه‌ پاریزگار(محافز)، نورى سه‌عیدیش داواى وه‌خشین له‌ شێخه‌گه‌ كردگه‌و وته‌سه‌پى چوین بووگ كوڕه‌گه‌د بكریه‌یگه‌ پاریزگار و ته‌نیا خوه‌ندن سه‌ره‌تایى یا ئبتدائى ته‌واو كردگه‌؟ شێخه‌گه‌یش وته‌سه‌پى مادام له‌یواسه‌ بكه‌ره‌ى وه‌زیر.

ئیسه‌یش له‌شوون دانیشتن یه‌كم په‌رله‌مان و له‌شوون گشت ئه‌و دانیشتنه‌یله‌ ك ئه‌نجام دریه‌یگ  له‌ناونى سه‌رۆك قه‌واره‌یل و نوێنه‌ر و سه‌رۆك پیكهاته‌و حزبه‌یل له‌باوه‌ت دامه‌زرانن وزاره‌ته‌یل تازه‌و پۆسته‌یل و چشته‌یل تر، ئه‌وه‌سه‌ ك ئه‌یاكه‌ هه‌وڵ ئه‌وه‌ ده‌یگ  قه‌ناعه‌ت وه‌ئه‌واكه‌ بكا له‌وه‌ر ئه‌وه‌ك هاوكارى وه‌لیا بكا نه‌ك له‌وه‌رخاتر ئامانجیگ  دیاریكریاگ، به‌ڵكوو له‌خوسه‌ى فڵان و ده‌سكه‌فت زیاتر. ئمجا كه‌سه‌یلیگ  هه‌ن ك تازه‌ هاتنه‌سه‌ ناو وازیه‌گه‌و یه‌كسه‌ر ڕازى بوون وه‌گشت چشتیگ .

ئیمه‌ له‌یرا داواكاریم له‌خوداى گه‌ورا ئه‌و ئاره‌زووه‌ ك دیریمنه‌ى وه‌رجه‌ ئه‌وه‌ك بچیمنه‌ دونیایگ تر بایگه‌دى و ئومیده‌واریم گشت بڕیار و تاوتویكردنیگ  له‌باوه‌ت ئومید و ئاره‌زووه‌یل و ئامانج راسه‌قینه‌ بووگ نه‌ك له‌باوه‌ت وه‌رگرتن پۆسته‌یل، ئه‌مجا هه‌ر وه‌ختى ئامانجه‌یل ده‌سنیشان كریا، ئه‌و وه‌خته‌ بایه‌سه‌ پیاوه‌یل شاره‌زاو خاوه‌ن ئه‌زموون دابنریه‌یگ ئه‌را چوینیه‌تى جى وه‌جیكردن، چوینكه‌ سووكایه‌تیكردنه‌ وه‌ ملله‌ت ئه‌گه‌ر بایگ و تاوتویكردن له‌بان ئه‌وه‌ بووگ فڵانكه‌س چ پۆستیگ  وه‌ربگریگ؟ چوینكه‌ بایه‌سه‌ كه‌س گونجیاگ ئه‌را شوون گونجیاگ بووگ. ئیمه‌ى ڕوڵه‌یل ملله‌ت زوڵملیكریاگ له‌وه‌رانوه‌ر چینایه‌تى وسیه‌یم له‌وه‌خت تاوتویكردن وه‌ل لایه‌نه‌یل تر، ئه‌را نموونه‌ كیشه‌ى بیكارى و نه‌وین كاره‌باو كه‌مى ئاو و ڕوى وه‌ڕوى بوینه‌وه‌ى گه‌ناته‌كارى وه‌گشت جووره‌یلیه‌وه‌ چوین چاره‌سه‌ر كریه‌یگ  ئه‌گه‌ر بایگ  و فه‌رمان بدریه‌یگه‌ ده‌س كه‌سه‌یلیگ ك هیمان تائیسه‌یش تاریخیان گڵاوه‌و ده‌سیان ها له‌خوین عراقیه‌یل شه‌ره‌فدار و هویچ گرینگى یا ئه‌همیه‌تیگ نیه‌نه‌ داواكارى ملله‌ت؟

له‌لایگ  تریشه‌وه‌، ئیمه‌ ئیسه‌ بى ده‌وڵه‌تیم یا خه‌یاڵیگ ده‌وڵه‌تیم، ئمجل ئایا قه‌واره‌یل جیاجیا له‌ناونى خوه‌یانت باس له‌چوینیه‌تى بنیاتنانه‌وه‌ى ئى ده‌وڵه‌ته‌ كردنه‌؟ نه‌خه‌یر تائیسه‌ حزبه‌یل و قه‌واره‌یل هان له‌كیشمه‌كیش له‌بان وه‌رگرتن پۆسته‌یل وزارى و هویچ هویریگ نه‌خستنه‌سه‌ لاى ملله‌ت و جویر ئه‌وه‌سه‌ فلم هندییگ نیشان ملله‌ت بیه‌ن. وه‌هه‌ر حاڵ مه‌سه‌له‌ى پۆست بویه‌سه‌ خواستیگ خودى نه‌ك ئه‌را خزمه‌تكردن وه‌ ملله‌ت.