كێشه‌ی كوردو ئه‌جندا ده‌ره‌كیه‌گان

شفق نيوز

جددی نه‌و‌يه‌‌و كار له‌بانی نه‌كریاگه‌ هه‌رچه‌ن ئی ته‌قالایله‌ و هێڵه‌یل سه‌ره‌كی كاركردن وه‌ی ئاراسه‌ ئه‌را رای گشتی و كۆمه‌ڵ ناوده‌وڵه‌تی و سه‌رجه‌م گروپ و پێكهاته‌ ناوخوه‌ییه‌گان به‌یان كریانه‌ ؛ وه‌لی ناوه‌ ناوه‌ له‌یه‌كه‌وداینه‌یلیگ ژنه‌فیم یاخوه‌نیم ك ئه‌و قه‌ره‌ لاواز ونامه‌نتقین تیوه‌نیم له‌جی له‌یه‌كه‌وداین وشیكردنه‌وه‌ سفه‌ت تومه‌ت ئه‌رایان وه‌كارباریم ؛ چوین ئه‌و جوره‌ له‌یه‌كه‌و داینه‌یله ئه‌وقه‌ره‌ ئه‌را مه‌به‌سه‌یل سیاسی ئاراسه‌ كریه‌ن ؛ ئه‌وقه‌ره‌ له‌ قویلایی واقعه‌گه‌وه‌ سه‌رچاوه‌ نه‌گردیه‌ . به‌ڵگه‌یش له‌بان ئی راسیه‌ ئه‌وه‌سه‌ ك یه‌ یه‌كم جارنیه‌ له‌یه‌كه‌وداین وه‌ی جوره‌ ئه‌را كێشه‌ی كورد بكریه‌ی ؛ به‌ڵكه‌م جاران و ئیسه‌یش مه‌سه‌له‌ی كورد عراق هه‌روه‌ختیگ گامیگ وه‌ره‌و نوا چیه‌ ؛ راسه‌وخو له‌لایه‌ن شوفینیسته‌یل ؛ تومه‌تبار وه‌ جیوه‌جی كردن ئه‌جندای ئه‌مریكاو ئسرائیل ئه‌رابه‌ش به‌شه‌وكردن ناوچه‌گه‌ كریاگه‌ ؛ ئیسه‌یش وه‌هه‌مان شیوه‌ ئه‌و تومه‌ته‌یله‌ له‌ فۆرمیگ نوو له‌بان پرس كورد له ‌توركیه‌یش چه‌سپیاگه‌و دواره‌وه‌ ئه‌كریه‌ی . ئه‌وه‌سه‌ به‌عزی له‌ پارته‌یل و گروپه‌ تونڕه‌وه‌گان دژ وه‌پروژه‌گه‌ی ئه‌ردۆگان و چاره‌سه‌ر مه‌سه‌له‌گه‌ وه‌شیوه‌ی ئاشتیانه‌ كه‌فتنه‌سه‌ تومه‌تداین بی بنه‌واو ئویشن پرۆژه‌گه‌ی ئه‌ردۆگان ئه‌را چاره‌سه‌ركردن كێشه‌ی كورد له ‌توركیه‌ پرۆژه‌یگ رۆژئاواییه‌ و وه‌جیوه‌جی كردن ئه‌جندای ئه‌مریكا له‌ ناوچه‌گه‌ له ‌قه‌ڵه‌می ده‌ن وهانه‌ ئه‌و باوه‌ڕه‌ ئه‌و پرۆژه‌ گامیگه‌ ئه‌را سه‌روه‌خوه‌یی و داوڕیان كورد له ‌توركیه‌ ولكاننی وه‌كوردستان باشوور و دویاخریش دروس كردن ده‌وڵه‌ت كوردی وبه‌ش به‌شه‌وكردن ناوچه‌گه‌ . هه‌رچه‌ن سه‌راپای ئه‌و جوره‌ له‌یه‌كه‌وداینه‌یله‌ نامه‌نتقین و بیجگه‌ له‌ ته‌قالایگ سیاسی ئه‌را له‌ باربردن و له‌كارخستن هه‌وڵه‌گان ؛ وه‌هویچ شیوه‌یگ نیه‌چنه‌ خانه‌ی له‌یه‌كه‌وداین راسیه‌يل ؛ چوین خود پرۆژه‌گه‌ی ئه‌ردۆگان و گویڕیانه‌ خێراگان سیستم ناوده‌وڵه‌تی جواون ئه‌را ئه‌و جوره‌ له‌یه‌كه‌وداینه‌یل بی بنه‌وا‌ . ئه‌ردۆگان و پارته‌گه‌ی له‌و وه‌خته‌گ ره‌سینه‌سه‌ ده‌سه‌ڵات له‌و باوه‌ڕه‌ بوینه‌ ك چاره‌سه‌ركردن كێشه‌ی كورد له‌ سیاق ده‌وڵه‌ت توركیه‌ كاره‌سات گه‌ورایگ له‌لی كه‌فیگه‌و وئه‌را ئی ئامانجه‌ باج گه‌ورایگ دان و كار ره‌سیه‌ ئه‌وره‌گ نزیك بوی چالاكی پارته‌گه‌یان له‌ ری دادگای ده‌ستوریه‌وه‌ قه‌یه‌خه‌ بكریه‌ی . هه‌روه‌ی خاتره‌ ئه‌وان هه‌میشه‌ له‌و باوه‌ڕه‌ بوینه‌ ك بایه‌د پرس كورد له‌ ناوخوه‌ی و له‌ڕی چاره‌سه‌ره ناوخوه‌ییه‌گانه‌وه‌ ته‌قالا ئه‌را یه‌كلاوه‌ كردنی بكریه‌ی. شایه‌دیش وته‌گه‌ی ئه‌ردوگان ؛ به‌لگه‌ له‌بان راسی ئه‌ومه‌سه‌له‌ بوون ك له‌وه‌خت سه‌ردانی ئه‌را شاره‌ كوردنشینه‌گان ووت : كێشه‌ی كورد كێشه‌ی منه‌ ؛ هه‌روه‌ی خاتره‌ گشت ئه‌و ئه‌را چگنه‌یله‌ ك هانه‌و باوه‌ڕه‌ چاره‌سه‌ركردن كێشه‌ی كورد چاره‌سه‌ریگ داسه‌پیاگ ده‌ره‌كیه‌ ؛ له‌ سونگه‌ی دوژمنایه‌تی وه‌ل پارت دادوگه‌شه‌وه‌پیداین و ته‌قالايل ئه‌و پارته‌ ئه‌را چاره‌سه‌ركردن كێشه‌ی كورد سه‌رچاوه‌ گردیه‌ ؛ ك یه‌یش له‌ زانست سیاسی په‌یوه‌ندی وه‌و ململانیه‌ دیری ك هه‌ر هێزیگ بتوایگ له‌و ریه‌وه‌ هێزه‌ وه‌راوه‌ره‌گه‌ی تومه‌تبار بكه‌یگ تا هه‌وڵ و پرۆژه‌گانی له‌بار بوه‌یگ وه‌تایبه‌ت وه‌ختیگ بزانی ئه‌و هه‌وڵ و پرۆژه‌یله‌ پشتیوانی له‌لی كریه‌ی وسه‌ركه‌فتن وه‌ده‌س تیه‌ریگ.