فوئاد مێرزا، هونه‌رمه‌ند شیوه‌كار فه‌یلى

شفق نيوز

تویه‌نستنه‌ وه‌ ماریفه‌ت و به‌هره‌و رووشنهویرى بارزیان سه‌رسامى مه‌ردمان تر وه‌ره‌و خوه‌یان بكیشن. چین فه‌یلى هه‌رچه‌نى زوورمیان له‌رووژگاریگ پڕ له‌ته‌نگى و میه‌نه‌تى ژیه‌ن، وه‌لى وه‌ل ئه‌وه‌یشا كه‌سه‌یلیگ هه‌ڵكه‌فتگ له‌لیان ئسبات وجوودو زینگى كلتوور و رووشنهویرى و فه‌رهه‌نگ و نه‌ریت خوه‌یان كردنه‌. ئمجا یه‌كیگ له‌به‌هره‌مه‌نه‌یل ده‌سڕه‌نگین و هونه‌رمه‌ند شیوه‌كار ك وه‌ تابلۆ یا له‌وحه‌یل جوانى مه‌یل مه‌ردم وه‌ره‌و لاى هونه‌ره‌گه‌ى كیشاس ئه‌ویش"فوئاد میرزا فه‌یلى)ه‌، ك له‌ناوڕاس ساڵه‌یل په‌نجاى سه‌ده‌ى وه‌رین له‌شار به‌غدا هاته‌سه‌ دونیا له‌خیزانیگ كورد فه‌یلى.

فوئاد جوور ئه‌وه‌ك باسى كه‌ن و ئویشن: له‌وه‌ختیگ  له‌قوناغ مناڵى بویه‌، كاره‌سات و رویداگه‌یل جاده‌یل كفاح له‌مانگ شووبات 1963 وه‌چه‌و خوه‌ى دیه‌و هویرو خه‌یاڵى داگیر كردگه‌و له‌ئه‌نجام ئه‌و رویداگه‌یلیشه‌ حه‌ز له‌ سیاسه‌ت و چه‌وسیان وه‌هویچ شیوه‌یگ نه‌كردگه‌، چوینكه‌ خوه‌ى و خیزانى كه‌فتنه‌سه‌ وه‌ر ئازارداین له‌لایه‌ن حزب به‌عس شۆفێنیه‌و له‌عراق.

دیاره‌ فوئاد تام تیه‌ڵى سستم تونڕه‌وى و ته‌كڕه‌وى له‌لاى بویه‌سه‌ مایه‌ى ئه‌وه‌ك ئاده‌میزادیگ دیموكراسیخواز و سه‌روه‌خوه‌ى بوودو ئنتما ئه‌را هویچ حزب و لایه‌نیگ نه‌كا، ناچار بویه‌ له‌ساڵ 1978 عراق بیلێده‌جى و ڕوى بكاده‌ وڵاته‌یل تر ك ئیسه‌ نیشته‌جى وڵاته‌یل یه‌كگرتگه‌ له‌ئه‌مریكاو جوور ئه‌ندازیار له‌زانسته‌یل رۆبۆت خه‌ریك كاركردنه‌ له‌كومپانیاى كرسیله‌ر پیشه‌سازى سه‌یاره‌.

فوئاد بیجگه‌ زووانه‌ كوردیه‌گه‌ى خوه‌ى، زووانه‌یل عه‌ره‌بى و ئیتالى و ئنگلیزییش زانێدو باوه‌ڕنامه‌ى ماسته‌ر له‌ئه‌ندازیارى ئه‌لكترۆنى له‌زانكۆى"وین" وه‌رگرتگه‌.

فوئاد فه‌یلى نه‌ك هه‌ر هونه‌رمه‌ندیگ شیوه‌كار، به‌ڵكوو نویسه‌ر خاسیگیشه‌ له‌مه‌یدان نویسانن مه‌ته‌ڵه‌یل بویچگ له‌عراق هه‌ر له‌سه‌ره‌تاى ساڵه‌یل هه‌فتاى سه‌ده‌ى وه‌رین و له‌ زوورم رووژنامه‌و گووڤاره‌یل عه‌ره‌بى و عراقى به‌رهه‌مه‌یلى بڵاوه‌و كریاگه‌و له‌وانه‌یش: سه‌ره‌تاى ئه‌ده‌بى، ئه‌لف با، ئاداب، كرمل، رووشنهویرى عه‌ره‌بى....هتد.

شان وه‌ شان ئه‌وه‌یش، بڕیگ له‌باوه‌ت و نویساننه‌یل ولیه‌م سارویان نویسه‌ر ئه‌مریكى ئه‌رمه‌نى ئه‌ڵه‌وگه‌ردانه‌سه‌ بان زووان عه‌ره‌بى.

فوئاد هه‌رچه‌نى له‌دویره‌ وڵات و ئاواره‌ى ژیاگه‌، وه‌لى وه‌ل ئه‌وه‌یشا به‌شدارى نمایشگایه‌یل هونه‌رى فره‌یگ كردگه‌و قونسوڵخانه‌ى عراق له‌واشنتۆن بڕیگ له‌به‌رهه‌مه‌یلى سه‌ندگه‌.

ئى هونه‌رمه‌ند شیوه‌كاره‌، تویه‌نست وه‌په‌نجه‌ى ره‌نگین و ماریفه‌ت و به‌هره‌ جوانه‌گه‌ى خوه‌ى وه‌سه‌رسامه‌یلى ئاشناد بكه‌ێدو تابلۆیه‌یلى ئسپات وجوود چالاكى و به‌هره‌داریه‌گه‌ى بكه‌ن ك تائیسه‌یش هه‌ر وه‌رده‌وامه‌ له‌كاره‌یلى.

سه‌رچه‌وه‌: گڵگامش