كورد و قه‌ومه‌يلی!

شفق نيوز

كورده‌يل ڕی ئه‌را يۆنانيه‌يل واز ئه‌كه‌ن، ئمجا بيس ساڵ وه‌رجه‌ ئيسه‌ له‌ ئه‌سينا ئی وه‌سه‌رهاته‌ باسكردم ئه‌را پياويگ گه‌وراساڵ يۆنانی، ئه‌ويش وت: به‌ڵی راسه‌، دويای ئه‌وه‌ك سه‌ربازه‌يلمان ره‌سينه‌ وڵات ده‌سكردنه‌ باس ئازايه‌تی بی ئه‌ناز كورده‌يل كردن، پاشای ئه‌و سه‌رده‌ميشه‌ فريه‌ وه‌ كورده‌يل سه‌رسام بوی و دی هه‌ر له‌وساوه‌ تائيسه‌ ئيمه‌ وه‌ ته‌واوی كورد ناسيم.

مه‌رام باسه‌گه‌م له‌يرا ئه‌وه‌سه‌ ك قسه‌ی كه‌سه‌يليگ له‌ ميديايه‌يل كوردستانه‌و له‌باوه‌ت ئه‌وه‌ك گوايا سربی و كرواتی و رووسی و فڵان و فلتان وه‌ ڕيچه‌ڵه‌ك كوردن! سه‌رچه‌وه‌ی ئی قسه‌يليشه‌ يا سياسه‌تمه‌داره‌يل كوردن يا بڕيگ له‌و كورده‌يله‌نه ك ساڵه‌يليگه‌ له‌و وڵاته‌يله‌ ژيانه‌و له‌ڕوی وجوود چه‌ن وشه‌يگ هاوبه‌ش ناونی زووان كوردی و زووان ئه‌و ملله‌ته‌يله‌و ره‌چه‌ڵه‌ك ئه‌وانيش له‌بان كورد هساو ئه‌كه‌ن.‌

له‌وه‌يش كاره‌ساتتر ئه‌وه‌سه‌ ك ميديای كوردی ئه‌و قسه‌يل بی بنه‌ما ئه‌را مه‌ردم جيواز ئه‌كه‌ن، دی ئه‌گه‌ر وجوود وشه‌ی هاوبه‌ش له‌ناونی و زووان به‌ڵگه‌ بوود ئه‌را هاوڕيچه‌ڵه‌كی، ئه‌وه‌ بايه‌سه‌ كورد و فارس يا پۆڵۆنی و سلۆڤاكی برای لفانه‌ بوون.

دوياخر ئيمه‌يش ك له‌ ساڵه‌يل سه‌خت مێژوومان كه‌مترين دووس داشتيمنه‌، ئايا مايای پرسيار نيه‌ له‌ی سه‌رده‌م نه‌فتداريمانه‌ بڕيگ ملله‌ت فه‌قي و خاوه‌ن ئابووری كز خوه‌يان وه‌ كورد بزانن، يا شاره‌زايه‌يل نه‌فتی وه‌ كورد دابنه‌يم؟! ئايا خاستر نيه‌ له‌جيای ئه‌و كاره‌ هه‌وڵ بته‌وكردن هس په‌يوه‌نديداری نيشتمانی له‌ناونی گشت ناوچه‌و پيكهاته‌يل كوردستان بدريه‌يد؟ ئه‌رك ميديای كوردی ئه‌وه‌سه‌ وه‌رپرسانه‌تر هه‌ڵسووكه‌فت وه‌ل ئيچنه‌ باوه‌ته‌يليگ بكاو زايناری وه‌ربگريد و كورد وه‌ غه‌ڵه‌ت نه‌وه‌يدو خه‌ياڵ بی بنه‌ما له‌ری دروس نه‌كا.

به‌كر شوانی

ج . أ