ملله‌ت چه‌رخ 18 و حكوومه‌ت كز و بیده‌سه‌ڵات

شفق نيوز

خود ده‌رخستن هێز و بازوو جوور نه‌ریتیگ باو یا مقه‌یه‌تیكریاگ و پاشمه‌نه‌ه‌ى رووژگاره‌یل زوڵم و جه‌ور!!

 

ئى مه‌ردمانه‌ هویچ وه‌ختیگ و له‌ هویچ سه‌رده‌میگ  ئه‌وه‌ك خوه‌یان له‌لى دویر گرتنه‌ ته‌نیا رووشنهویرى و پێشكه‌فتن بویه‌، وه‌گه‌رنه‌ ئیسه‌ حاڵ عراق ئیچنه‌ نه‌وى و نه‌ڕه‌سیه‌ جه‌نگ چینایه‌تى و سووكایه‌تیكردن وه‌ باوه‌ڕ و هویروڕاى یه‌كترى و هه‌ر لایه‌نیگ له‌لیان نه‌ویه‌ رێگر له‌وه‌رده‌م چگن وه‌ره‌و دونیاى تازه‌گه‌رى و ژیان ئاسووده‌یى.

 

دكتۆر عه‌لى وه‌ردى ئویشید: راده‌ى كاولكارى له‌ عراق له‌ سه‌ده‌ى 18 ره‌سیه‌ بار سه‌ختیگ و ده‌سه‌ڵات كه‌فته‌ ده‌س مه‌ردم هووزه‌یل و ده‌سه‌ڵات حكوومه‌ت فره‌ كزه‌و بوى و له‌وه‌ختیگیش له‌ سه‌ده‌ى 19 له‌لایه‌ن حكوومه‌ته‌و روى له‌ تازه‌گه‌رى كریاو هه‌وڵ چه‌سپانن ده‌سه‌ڵات دریا،  هووزه‌یل عه‌ره‌ب كاره‌گه‌ ره‌ساننه‌ كیشمه‌كیش ناونى ملله‌ت و حكوومه‌ت وه‌ جووریگ ك خوازیار ئاڵشتكارى نه‌وین و هه‌ر تواستیان له‌و ته‌ور كویه‌ن خوه‌یانه‌ بمینن.

 

مه‌ردم نا رووشنهویر و نادیمۆكرات هه‌میشه‌ بایه‌د قه‌وان كویه‌ن تازه‌وه‌ بكه‌ن و داب و نه‌ریت وه‌ره‌و تازه‌گه‌رى نه‌وه‌ن، ئمجا ئه‌گه‌ر  بایمنه‌ پاى راسى یه‌یش وه‌ل سه‌رده‌م ئیسه‌مان ناگونجیه‌ێ، چونیكه‌ فره‌یگ له‌ ره‌فتار هووزایه‌تى دویره‌ له‌یاساى رووشنهویرى و مه‌ده‌نى و زه‌مانه‌ى خنجه‌ر و شمشیر چیه‌ سه‌ر .

 

ئى جووره‌ مه‌ردمه‌یله‌ ك ئاماژه‌ وه‌پیان كردیم، سه‌رچه‌وه‌ن ئه‌را به‌دكارى و تاوان و دویاكه‌فتن، دوینید نه‌ خوه‌یان ڕێ خه‌یریگ گرنه‌وه‌ر نه‌یش بوار ده‌نه‌ حكوومه‌ت وه‌ گووره‌ى یاسا ره‌فتار بكا، چوینكه‌ حكوومه‌ته‌گیش تا راده‌یگ هه‌ر ده‌سه‌ڵاتیگه‌ كویه‌نه‌په‌رس و دویاكه‌فتگ و له‌زوورم هه‌وڵه‌یلى گام چینایه‌تى و هووزایه‌تى نه‌ێد، تویه‌نیم بویشیم تا ڕاده‌یگ هانده‌ریشه‌ ئه‌را دریژه‌داین وه‌ ده‌سه‌ڵات شێخایه‌تى و په‌ره‌سه‌ندن حوكم عه‌شایرى، دى له‌ى حاڵه‌تیشه‌ مه‌حاڵه‌ پێكهاته‌یل تر بتویه‌نن بڕه‌سنه‌ هه‌ق و ئاره‌زووه‌یلیان و ئه‌وانه‌ك نه‌فوه‌رگرتنه‌ له‌ساى حزب ده‌سه‌ڵاتدار و لایه‌نه‌یل ئیسه‌ى سیاسى هه‌ر خود ئه‌وانه‌ رووڵه‌یل ئه‌و هووزه‌یله‌نه‌ ك شه‌وه‌كیان كاره‌یل خوه‌یان له‌ حكوومه‌ت ئه‌نجام ده‌ن و ئیوارانیش له‌ دیوه‌خان عه‌شایرى نیشن و فه‌تواى جووراوجوور ده‌ن وه‌بێ ترس له‌ یاسا جوور ئه‌وه‌ك له‌ى دویاخره‌ كابرایگ  وه‌ناو عه‌باس محه‌مه‌داوى سه‌ر وه‌ لیست هاوپه‌یمانى نیشتمانى هه‌ر له‌خوه‌یه‌و فه‌تواى ده‌ركردن كورده‌یل به‌غدا ده‌ركردو حكوومه‌تیش له‌ئاست ئه‌و لێدوانه‌یله‌ كپ و بیده‌نگ بوى و دادگایش رێڕه‌و خوى ده‌رهه‌ق ئه‌و ره‌فتار ناوه‌جیه‌ وه‌رنه‌گرت.

 

بیگومان ئه‌یانه‌ وڵات شیواننه‌سه‌ یه‌كاو ئه‌را گشت حكوومه‌تیگ چه‌پڵه‌ كوتن!، ئمجا نه‌ ئه‌وه‌سه‌ هیلن حكوومه‌ت كاره‌یلى ئه‌نجام بیاد و دوشمن ئه‌را خوه‌ى دروس نه‌كا، نه‌یش خوه‌یان گه‌ردنه‌ شوون مه‌سه‌له‌ى ئنسانى و تازه‌گه‌رى و هه‌ق و پێشكه‌فتن راسكانى، چوینكه‌ ئه‌یانه‌ سه‌رچه‌وه‌و نه‌ریته‌یل كویه‌ن هووزایه‌تى له‌وه‌ر خاتر ده‌ركه‌فتن و شانیه‌ت خوه‌یان وڵ ناكه‌ن ئه‌را خاتر ژیانیگ شارستانى و مه‌ده‌نیانه‌ ك هێمان هووكاره‌ى نه‌وینه‌و نیه‌زانن ك رووژگار ئمڕوومان خوازیار ئاڵشتكارى و گونجیان و گامناینه‌ وه‌ره‌و جه‌هانگیرى خه‌بات ئاشتیانه‌.

 

ج. ا