كورده‌یل فه‌یلى له‌بڵاوكریایه‌یل كۆنگره‌ى سه‌ده‌مین بارزانى نه‌مر

شفق نيوز

ئشاره‌ت وه‌ دید عه‌ره‌بى كردگه‌ له‌بان كیشه‌ى كورده‌یل فه‌یلى و چوین ئه‌وان به‌شیگن له‌نه‌ته‌وه‌ى كورد. ئنجا له‌یرا ئه‌وه‌ خه‌یمنه‌ ڕوى ك كورده‌یل فه‌یلى به‌شیگن له‌نه‌ته‌وه‌ى كورد. فره‌یگ له‌تاریخنویسه‌یل باس له‌وه‌ كه‌ن ك ئه‌یانه‌ پاشمه‌نده‌ى عیلامیه‌یل یا گوتیه‌یلن له‌ناوڕاس و باشوور عراق(مه‌نه‌لى، به‌دره‌، جه‌سان، زرواتیه‌، خانه‌قى، كه‌ركووك، به‌غدا...و شاره‌یل تر عراقى بیجگه‌ شاره‌یل تر ئیرانى).

كورده‌یل فه‌یلى له‌و هووزه‌یل كورد ناسریاگه‌نه‌ ك له‌ناوچه‌ى خوزستان و خوه‌رهه‌ڵات عراق ژیان وه‌تایبه‌ت له‌خوه‌رهه‌ڵات دجله‌ ك كویه‌نترین ناوچه‌یل تاریخیه‌ له‌عراق و كویه‌نترین شه‌ریعه‌ت له‌تى ده‌ركه‌فت. بنه‌ڕه‌ت ناوناین كورده‌یل فه‌یلى له‌لایه‌ن تاریخنویسه‌یل عه‌ره‌به‌و هات ئه‌را ئه‌و كورده‌یله‌ ك له‌كوردستان ئیران(كویه‌یل زاگرۆس)ه‌و هاتن و له‌وه‌رجه‌ سه‌ده‌ها ساڵ تیكه‌ڵ بوین وه‌ل كوومه‌ڵگاى عراقى و له‌مه‌یدان بازرگانى و كشتوكاڵى و پیشه‌سازى سه‌ركه‌فتن و بیجگه‌ ئه‌وه‌یش خوه‌یان ده‌رخستن له‌مه‌یدان جمشت نیشتمانى عراقى وه‌گشتى و له‌چالاكیه‌یل نیشتمانى عراقى وه‌تایبه‌ت له‌چوارچیوه‌ى ڕزه‌یل جمشت رزگاریخواز كوردى و ڕزه‌یل حزب شیوعى عراقى و جمشته‌یل تر سیاسى. وه‌ل ئه‌وه‌یشا ناوه‌یل به‌رزیگ ده‌ركه‌فت له‌ناونى كورده‌یل فه‌یلى له‌ جمشت نیشتمانى عراقى و تاریخ عراق سیاسى، هه‌ر له‌وه‌ر ئه‌وه‌یش كورد فه‌یلى كه‌فته‌ وه‌ر دڕنده‌ترین زوڵم و چه‌وسیان له‌ساى رژیمه‌یل یه‌ك له‌شوون یه‌ك له‌عراق وه‌تایبه‌ت له‌سه‌رده‌م ده‌سڵات به‌عس له‌شوون ساڵ 1968 و سه‌ختترین مه‌ینه‌تى له‌شوون ریككه‌فتن ئازار 1970و له‌وه‌خت جه‌نگ ساڵ 1980ى رژیم وه‌رین وه‌ل ئیرانا هاته‌ تویشیان. كورده‌یل فه‌یلى هاووڵاتیه‌یل عراقیین، زوورمیان سه‌ر وه‌مه‌زه‌و ئه‌هل به‌یتن و شماره‌ى كه‌میگ له‌لیان شیعه‌ نین. ئى چینه‌ مه‌ردمانیگ ئاشتیخوازن، وه‌فادارن و راسگوون و جى متمانه‌ن له‌ چالاكیه‌یل بازرگانى و ئابوورى وه‌گشتى و ناو خوه‌یان خراو نه‌كردنه‌ وه‌هویچ كرده‌ویگ ترۆریستى یا تون وتیژى سیاسى.

پرۆفیسۆر خه‌لیل ئسماعیل محه‌مه‌د له‌گووڤار"گوڵان عه‌ره‌بى)باس ئه‌وه‌ كردگه‌، ك كورده‌یل فه‌یلى بنه‌ڕه‌تیگ راسكانى پیك تیه‌رن له‌(لوڕ)و به‌شیگن له‌نه‌ته‌وه‌ى كورد جوور ئه‌وه‌ك له‌به‌حسه‌گه‌ى شه‌مسه‌دین سامى و كتاوه‌یل تر ده‌ركه‌فتگه‌. وه‌ل ئه‌وه‌یشا(مینۆرسكى)ئشاره‌ت وه‌ ئه‌وه‌ كردگه‌ ك لوڕ هووزه‌یلیگ كووچكه‌رن و بنه‌ڕه‌تیان چووده‌و ئه‌را ملله‌ته‌یل هندوئۆرپى.

ئنجا كورد چوینكه‌ له‌ملله‌ته‌یل كویه‌ن ئاشتیخوازن، ئه‌وانیش جوور ملله‌ته‌یل تر گه‌ردنه‌ شوون ژیان ئازادى و ده‌سكه‌فتن هه‌قه‌یل ئنسانى خوه‌یان ك له‌گشت دین و شه‌ریعه‌ت و یاسایگ نیشتمانى و ناوده‌وڵه‌تى وجوود دیرێد، ئى هه‌قه‌یلیشه‌ له‌لیان زه‌فت كریا وه‌بى تاوان و ئه‌وانیش ناچار بوین وه‌رگرى له‌وجوود خوه‌یان بكه‌ن، ك یه‌یش ڕى هه‌قیگه‌و ملله‌ت هه‌ر مینید هه‌رچه‌نى هه‌قیانیش خوریا.

 

ماجده‌ خورشید

 

ج