سه‌روه‌خۆييمان قانجازه‌ يا زه‌ره‌د؟

شفق نيوز

هاوسه‌نگی وه‌ ته‌نيا ئه‌وه‌ نيه‌ ك بتويه‌نيم له‌ خوه‌مان داشتويمنه‌ی و چشته‌يل ئه‌را خوه‌مان دابين بكه‌يم، به‌ڵكوو هاوكيشه‌يل سياسی پيكهاتگه‌ له‌ په‌يوه‌ندی ناوده‌وڵه‌تی وه‌ل وڵاته‌يل هاوسا ك ئيسه‌ تاڕاده‌يگ ئيران دژ ئه‌و بڕياره‌سه‌و توركيايش وه‌ ناڕاسه‌وخۆ دژيه‌و ئاره‌زوو يه‌كپارچه‌يی خاك عراق ئه‌كا.

هه‌نای ك نه‌رويج له‌ سويد جياوه‌ بوی، نه‌رويج خاوه‌ن فريه‌ چشت بوی، خاوه‌ن نه‌فت و گاز و سه‌رچه‌وه‌ی تر ئنسانی بوی، سويد هويچ نه‌ياشت، وه‌لی له‌وه‌ر ئه‌و سياسه‌ته‌ ك هاوردياده‌ی كار تا ئيسه‌يش خوه‌شترين و جوانترين په‌يوه‌ندی له‌ ناونی هه‌ردوگ وڵات وجوود ديريد و فريه‌يش وه‌ره‌و نواتريش گام نه‌ن.

ئيمه‌ ك له‌خاك عراق جيابويمنه‌و دی ئه‌وسا عراق ئه‌دێده‌ هاوسمان و ئه‌گه‌ر هات و په‌يوه‌نديه‌يليش له‌ڕاده‌ی خواستيگ نه‌وی، ئه‌وه‌ بيگومان ئيمه‌ تويش كيشه‌ ئه‌يه‌يم و مه‌ردم و خاك و نيشتمانمان ئه‌كه‌فيده‌ مه‌ترسی. ئيمه‌ خاوه‌ن چشته‌يل فريه‌يگيم ك ئه‌دێ له‌ڕی ئه‌و چشته‌يله‌و په‌يوه‌نديه‌يل خوه‌مان وه‌ره‌و نواتر بووه‌يم وه‌ل ناوچه‌گه‌و ته‌نانه‌ت وڵاته‌يل هاوسای نزيك و دويريش، ك له‌ڕی ئی چشته‌يله‌و بايه‌سه‌ چشته‌يل ناوخوه‌يی خوه‌مانيش دابين بكه‌يم، له‌وانه‌يش:

١- ئيمه‌ خاوه‌ن زه‌وی كشتوكاڵێيم و ئه‌كريه‌يد له‌ڕی ئه‌و زه‌ويه‌يله‌و سه‌رچه‌وه‌ی خوه‌راكی ناوخوه‌يی خوه‌مان ده‌سه‌وه‌ر بكه‌يم و ته‌نانه‌ت هه‌نارده‌ی ده‌يشت هه‌رێميشی بكه‌يم.

٢- خاوه‌ن چه‌نه‌ها وه‌ربه‌س ئاويم ك سه‌رچه‌وه‌ن ئه‌را كاره‌باو بايه‌سه‌ هه‌وڵ ته‌ماميگ بيه‌يم ئه‌را دابينكردن كاره‌با.

٣- خاوه‌ن چاڵه‌ نه‌فتيم و بوود له‌ڕی زيايكردن نه‌فتپاڵووه‌يل نه‌فتيه‌و له‌ناوخۆی هه‌رێم نه‌فت و غاز و به‌نزين دابين بكه‌يم.

٤- خاوه‌ن چه‌نه‌ها شوونه‌يل گه‌شت وگوزاريم ك يه‌يش وه‌ يه‌كيگ تر له‌ سه‌رچه‌وه‌يل دارايی دانريه‌يد.

يه‌يش بيجگه‌ ئه‌وه‌ك خاوه‌ن چه‌نه‌ها چشته‌يل تريم ك ئه‌را دروسبوين و دامه‌زرانن وڵاتيگ هه‌وه‌جه‌دارن، ئيمه‌ خاوه‌ن مه‌ردم خوه‌مانيك ك له‌گشت وه‌خت وساتيگ هاوكار و ده‌سميه‌تده‌رمان بوينه‌ ته‌نانه‌ت له‌و وه‌خته‌يليشه‌ ك هه‌وجه‌يش وه‌پيان نه‌ياشتيمنه‌ هه‌ميشه‌ وه‌لمانا بوينه‌. مانای ئه‌وه‌سه‌ ئه‌تويه‌نيم بويشيم له‌ ئيسه‌وه‌ سه‌روه‌خۆييمان فريه‌ قانجازتره‌ له‌ مه‌ندنه‌وه‌مان له‌ عراقيگ ك هه‌ميشه‌ شوون زه‌فتكردن مافه‌يلمان بويه‌و بايه‌سه‌ كار جددی له‌بان ئی مه‌سه‌له‌ بكريه‌يد، وه‌لی نادێ ئه‌وه‌يش له‌ هوير بووه‌يم ك جيابوينه‌وه‌مان ئاسان نيه‌ ئه‌گه‌ر زويتر كار ئه‌رای نه‌كردويم و نه‌كه‌يم.

هه‌ژار ناميق

ج . أ