چوين جورئه‌ت خوه‌شه‌ويسی له‌ناونی فه‌يليه‌يل دروس بكه‌يم؟

شفق نيوز

راسه‌ چواريه‌كی رويوه‌ر گووشه‌ی زه‌وی ها له‌جه‌نگيگ بی وينه‌، وه‌لی باقيه‌گه‌ی ناچارن و كاريگه‌ری ديريد له‌بانيان و راسه‌وخۆ يا ناڕاسه‌وخۆ باجه‌گه‌ی ئه‌يه‌ن، جياوازی سه‌ره‌كييش ته‌نيا قوربانيده‌ره‌ نه‌م ته‌ماشاكه‌ر، ئمجا وه‌گووره‌ی ئه‌وه‌گ له‌لی ئاگاداريم له‌ مێژوو ئنسانيه‌ت ريژه‌يگ له‌ خوسه‌و كينه‌ت و وه‌رده‌وامی تون وتيژی له‌ی لايه‌نه‌و نيه‌ ك حاڵ حازر له‌ وڵاته‌يل خوه‌رهه‌ڵات ناوين دوينيمنه‌ی وه‌تايبه‌ت له‌ عراق.

له‌يرا ئه‌خوازيم بپرسيم كی كی ئه‌كوشيد؟ كی راو كی نه‌يد؟ كی له‌ی هه‌مگه‌ رويداگه‌ نه‌فداره‌؟ له‌ نه‌وين كه‌سه‌يل سووزدار و خوه‌شه‌ويسی و خاوه‌ن حورمه‌ت و قه‌بولكردن يه‌كتری كی حوكم كی ئه‌كا؟ ئه‌گه‌ر دادگه‌ری نه‌مه‌ند دوياخر چه‌ ئه‌دێ؟ وه‌خت فريه‌يگ چيه‌ سه‌ر و نه‌تويه‌نستيم بويری خوه‌شه‌ويسی وه‌ل يه‌كتری دروس بكه‌يم و ئيراده‌ ئه‌را ئه‌وه‌يش نه‌يريم و ئه‌و خوداوه‌نديشه‌ ك ئويشيم ئيمه‌ په‌رسيمنه‌ی خوداوه‌ند جه‌نگ نيه‌، به‌ڵكوو نيشانه‌ی خوه‌شه‌ويسيه‌.

چشته‌يل فريه‌يگ ك له‌وه‌خت جه‌نگ په‌يا ئه‌دی نرخ خوه‌ی له‌ده‌س ئه‌دا، له‌وانه‌يش خوه‌شه‌ويسی و قه‌بولكردن يه‌كتری، ئه‌گه‌ريش ئی چشته‌ وه‌ ڕاسی نه‌ود، ئه‌وه‌ كوشتار وه‌رده‌وام ناونيمان چاره‌سه‌ر ئه‌را ئی گرفته‌، ئمجا با ئامووژگاری له‌يه‌ وه‌ربگريم و وه‌رده‌وامی خوسه‌و كينه‌ت بووسنيم ك ئه‌و كوشتار وه‌رده‌وامه‌ له‌لی ئه‌كه‌فيده‌و، چوينكه‌ ده‌رخستن و چه‌سپانن خوه‌شه‌ويسی هه‌وه‌جه‌ وه‌ ئی هه‌مگه‌ چشته‌ نه‌يريد و مه‌ردميش له‌بانيان نويسياگه‌ ك قوربانی بيه‌ن ئه‌را ئی وڵاته‌ تا وه‌لای كه‌مه‌و بوونه‌ هاووڵاتی.

ئه‌و مه‌ردمانيشه‌ ك هووكاره‌ نه‌وينه‌ خزمه‌ت خوه‌يان بكه‌ن وه‌بی ناچاری، چوين ئه‌دێ پيشبينی له‌ كه‌سه‌يل تر بكه‌ن ئه‌و كاره‌ له‌ جيايان بكه‌ن، دی چاره‌سه‌ر گونجياگيش ئه‌را عراق ك گشت مه‌ردم يه‌كڕز بوون له‌ روی وه‌ڕوی بوينه‌وه‌ی ئافه‌ت نه‌فامی هاوشيوه‌ی ريكخرياگيگ جوور داعش و گرووپه‌يل تر. له‌ وه‌رانوه‌ر ئه‌وه‌يش بايه‌س له‌ بانيان واز له‌ جه‌نگ نه‌ته‌وه‌يی و تايفی بارن ك ژير وه‌ژير له‌ناونيان وجوود ديريد وزاڵ بويه‌سه‌ بان گشت چشتيگ و ته‌نانه‌ت زه‌رده‌خه‌نه‌ی روخسارمانيش.

ئيمه‌ی كورد فه‌يلييش جيا نييم له‌ی بنه‌ماو جه‌نگ كرديم تا چشتيگ ئاڵشت بكه‌يم و جارجاريش شانازی ئه‌كه‌يم ك وژدانمان ئاسووده‌س، هووكاره‌گه‌يشی ئه‌وه‌سه‌ ئيمه‌ به‌شيگ نييم له‌ی كيشه‌ی تيژه‌ له‌ناونی عراقيه‌يل و رووژگاره‌يل وه‌رين ئه‌وه‌ نيشانمان دا ك دژايه‌تی يه‌كتری نه‌كه‌يم له‌وه‌ر چه‌سپانن رای، به‌ڵكوو جه‌نگ له‌وه‌ر ده‌سخستن خوه‌شه‌ويسی و خه‌بات بكه‌يم ئه‌را خاسسازی حاڵه‌ته‌يل شيويان ته‌نانه‌ت ئه‌گه‌ر وه‌ شيواز و ريڕه‌ويگ عراقی ناكاريگه‌ريش بويه‌.

ئيمه‌ ڕی تون وتيژی ناگريمه‌ وه‌ر ئه‌را چه‌سپانن وجوودمان، چوينكه‌ ئه‌وه‌گ ئی ڕيه‌ بگريده‌ وه‌ر هويچ ره‌واجيگ نه‌يريد و دويرمانه‌و ئه‌خا ئه‌را دويرترين خاڵ، ئمجا چشته‌يل فريه‌يگ له‌ليمان بردن تا خوسه‌و كينه‌ت له‌وه‌رانه‌وه‌ر يه‌كتری بيه‌نه‌ پيمان، ئوميده‌واريم له‌يوا ئامانجه‌يليگ هه‌رچه‌نی نرخی ماددی يا گيانييش بوود جيوه‌جی نه‌دێ.

سوندس ميرزا

ج . أ