كورده‌یل فه‌یلى له‌ناونى چه‌وسیان دویه‌كه‌ و دویره‌وخستن ئمڕوو

شفق نيوز

پیكهاته‌یل ملله‌ت عراق و كاریگه‌رى خراویگ داشت له‌بان كه‌سایه‌تى ئاده‌میزاد وڵاته‌گه‌ له‌ماوه‌ى ده‌سڵاتى، ئه‌ویش وه‌گووره‌ى ئه‌و كرده‌وه‌و ره‌فتاره‌یلیه‌ ك ئه‌نجامیداو بویه‌ هووكار په‌شیوى و نیگه‌رانى و له‌ده‌سداین متمانه‌ له‌لاى خود عراقیه‌یل، هه‌ر له‌وه‌ر ئه‌وه‌یش مه‌ردمان فره‌یگ له‌عراقیه‌یل ناچار بوین عراق بیلنه‌جى و ڕوى بكه‌نه‌ وڵاته‌یل تر.

هه‌رچه‌نى كورده‌یل فه‌یلى به‌شیگن له‌پیكهاته‌یل كوومه‌ڵگاى عراقى، وه‌لى زیاتر له‌ پیكهاته‌یل تر تویش گه‌وراترین زه‌ره‌د هاتن له‌ژیر سایه‌ى ئه‌و سیاسه‌ت چه‌فته‌و ژان و مه‌ینه‌تى فره‌یگ كیشان و له‌وه‌یش زیاتر تاوان له‌ناوبردن وه‌جه‌م له‌وه‌ختیگ وه‌ زووره‌ملى له‌عراق ده‌ركریان و خریانه‌ بان مه‌رز وه‌پیسترین شیواز وه‌بى ئه‌وه‌ك هویچ گوناهیگ داشتوون ته‌نیا ئه‌وه‌ نه‌ود ك ئنتماى نه‌ته‌وه‌یى و نیشتمانى داشتن.

كورده‌یل فه‌یلى جوور باقى چینه‌یل تر كوومه‌ڵگاى عراقى له‌وه‌ختیگ رژیم به‌عس رمیا خوه‌شاڵى فره‌یگ دینه‌ خوه‌یان، وه‌لى وه‌ گورجى كه‌فته‌ وه‌ر گه‌رده‌لویل، چوینكه‌ حزبه‌یل سیاسى ك شوون حزب به‌عس گرتتن گووش نه‌یانه‌ كیشه‌و خه‌م كورده‌یل فه‌یلى و نه‌چینه‌ ته‌نگ داواكارى و هه‌قه‌یل زه‌فتكریاگیان جوور باقى پیكهاته‌یل تر عراق.

هه‌ر له‌وه‌ر ئه‌وه‌یش پرسیم!! كى وه‌رپرسه‌ له‌بان ئى دویره‌وخستن و چه‌وسیان ئه‌نقه‌ز كورده‌یل فه‌یلیه‌ له‌سه‌رده‌م رژیم تازه‌ ئه‌را لاوردن په‌یڕه‌و سیاسه‌ته‌یل رژیم وه‌رین و له‌ڕوى وژدان و گرینگى وه‌پیان به‌ێد له‌دویاى ئه‌وه‌ك كاره‌سات و تاوان فره‌یگ ده‌رهه‌قیان ئه‌نجام دریا له‌وه‌خت رژیم به‌عس؟؟ ئه‌ى ئه‌ڕاچه‌ عراق تازه‌ ره‌فتار خاسیگ وه‌ل ژانه‌یل كورد فه‌یلیا ناكاو هه‌قه‌یل ره‌وایان زامن ناكا؟؟ك گشت به‌ڵگه‌یل تاریخى ئسپات ئه‌وه‌ ئه‌كا فه‌یلیه‌یل پیكهاته‌یگن له‌عراقیه‌یل ره‌سه‌ن.

ئایا تائیسه‌یش پیاوه‌یل رژیم به‌عس له‌ده‌زگایه‌یل ده‌وڵه‌ت وجوود دیرن، یا رژیم تازه‌ هه‌مان په‌یڕه‌وكار رژیم وه‌رینه‌، یا كه‌مته‌رخه‌مى خوه‌یانه‌و كیشمه‌كیش ناونى خود كورده‌یل فه‌یلى بویه‌سه‌ هووكار فه‌رامووشكردن كیشه‌گه‌یان؟

وه‌رگرى فره‌یگ له‌ كورده‌یل فه‌یلى كردیم و تاوان خستیمنه‌ بان حكوومه‌ت عراقى و حزبه‌یل وه‌رپرس له‌ى حكوومه‌ت تازه‌و داوا له‌ حكوومه‌ت كردیم ته‌ماشاى مه‌ویسى كورده‌یل فه‌یلى بكاو گرینگى وه‌پیان به‌یدو له‌بنه‌ڕه‌ته‌و چاره‌سه‌ر كیشه‌یان بكا، وه‌لى وه‌ل ئه‌وه‌یشا خود ئى پیكهاته‌ وه‌رپرسیاریه‌تى سه‌ره‌كى غه‌ڵه‌ته‌یلیگ بایه‌سه‌ بگرێده‌ مل له‌وه‌ك هه‌قه‌یل ره‌وایان ناوریاسه‌وه‌و گرینگى وه‌پیان نه‌دریا، ئه‌ویش له‌وه‌ر كه‌مته‌رخه‌مى و یه‌كنه‌گرتن ناونى خوه‌یان ك هه‌وڵ ئه‌وه‌ نه‌یانه‌ هیزیگ دامه‌زرنن له‌ناونى خوه‌یان و هویر وڕایان یه‌كیگ بوود. ماناى ئه‌وه‌سه‌ خه‌م كورده‌یل فه‌یلى خود فه‌یلیه‌یل بایه‌سه‌ به‌شه‌ فره‌گه‌ى بگرنه‌ مل ، یه‌یش بیجگه‌ كه‌مته‌رخه‌مى و گووشنه‌داین حكوومه‌ت و حزبه‌یل جیوه‌جیكار وه‌ى مه‌سه‌له‌ له‌وه‌ر هووكاره‌یل فره‌یگ و له‌وانه‌یش:

ئه‌و چشته‌یله‌ ك كاریگه‌رى خراو داشت له‌بان كیشه‌ى فه‌یلى، نه‌وین قه‌واره‌یگ سیاسسیه‌ ك نوێنه‌رایه‌تى فه‌یلیه‌یل بكا، دویرگرتن و جیایى ناونى خوه‌یان دویریانه‌و خست له‌ جیه‌وه‌جیكردن بریاره‌یل ده‌رچگ له‌لایه‌ن دادگاى باڵاى تاوانه‌یل و هاوردنه‌وه‌ى هه‌قه‌یل ره‌وایان وه‌گووره‌ى بڕیار ئه‌و دادگا.

دویاى ئه‌وه‌یش نه‌وین هاوكارى و ریككه‌فتن له‌ناونى ریكخریاگه‌یل ك وه‌ناو كورد فه‌یلى دامه‌زریان، چوینكه‌ ئه‌یانه‌ نیه‌گه‌ردنه‌ شوون دانیشتن و تاوتویكردن و گفتوگوو، یه‌یش بویه‌ مایه‌ى یه‌كنه‌گرتن و كاریگه‌رى داشت له‌ دابین نه‌كردن هه‌قه‌یلیان.

بیجگه‌ ئه‌وه‌یش بڕیگ له‌ كه‌سایه‌تیه‌یل فه‌یلى له‌وه‌ر به‌رژه‌وه‌ندى خوه‌یان چینه‌سه‌ ناو فراكسیۆنه‌یل تر سیاسى له‌وه‌ر خاتر ده‌سكه‌فتن قانجازكردن ماددى له‌بان هساو كیشه‌ى فه‌یلى و دویرن له‌خه‌م و مه‌ینه‌تى چینه‌گه‌یان.

وه‌ل ئه‌وه‌یشا خیزانه‌یلیگ فه‌یلى هه‌ن له‌ماڵ خوه‌یان نیشتنه‌و چه‌وه‌ڕى ئه‌وه‌ كه‌ن یه‌كیگ به‌ێد له‌ قاپیه‌یلیان و هه‌قه‌یلیان بارێده‌و، ئه‌ویش له‌وه‌ر كه‌مته‌رخه‌مى و نه‌وین متمانه‌ وه‌ خود خوه‌یان و باوه‌ڕ وه‌ هه‌وڵ وته‌قلا نه‌یرن له‌وه‌ر خاتر چاره‌سه‌ر كیشه‌گه‌یان.

دیار و ئاشكرا ك كورده‌یل فه‌یلى هه‌وه‌جه‌ وه‌ ئه‌وه‌ دیرن ڕیگه‌چاره‌ى تازه‌یگ بارنه‌ كار له‌وه‌ر خاتر هاوردنه‌وه‌ى هه‌قه‌یل زه‌فتكریاگیان، هه‌ر له‌وه‌ر ئه‌وه‌یش هه‌وه‌جه‌ وه‌ په‌یوه‌ندى و یه‌كگرتن و دانیشتن زیاتریگ دیرن له‌ناونى خوه‌یان له‌چوارچیوه‌ى سازكردن كۆنگره‌و چالاكیه‌یل له‌وه‌ر خاتر ئسپاتكردن خوه‌یان جوور چینیگ كاراى عراقى له‌بان مه‌یدان عراقى و داكووكیكردنیان له‌بان هاوردنه‌وه‌ى هه‌قه‌یل و ماڵ و موڵك و ناسنامه‌ یاساییگه‌یان.

هه‌ر له‌وه‌ر ئه‌وه‌یش ئاشكرا بوى له‌لاى گشت كه‌سیگ ك كورده‌یل فه‌یلى تواناى چاره‌سه‌ر كیشه‌و جیوه‌جیكردن ئاره‌زووه‌یلیان نه‌یرن ئه‌گه‌ر له‌ناو خوه‌یان هاوكارى نه‌كه‌ن و یه‌كنه‌گرن و زاڵ بوونه‌ بان گشت جیاوازى و ناكووكى ناونیان، وه‌ل ئه‌وه‌یشا ژان كورده‌یل فه‌یلى وه‌بى یه‌كگرتن و یه‌كڕزى له‌ژیر سایه‌ى یه‌ك چه‌تر زه‌حمه‌ته‌ ساڕیژ بوود. ئنجا هه‌ر وه‌ختى بوینه‌ یه‌كیگ و ڕزه‌یلیان یه‌كه‌وخستن و قسه‌یان یه‌كیگ بوى، دى ئه‌و وه‌خته‌ تویه‌نن روى وه‌ڕوى وه‌رپرسه‌یل عراقى بوونه‌وه‌و داواى هه‌قه‌یل كورد فه‌یلى بكه‌ن وه‌گووره‌ى یاساو ده‌ستوور و خوه‌یان خاوه‌ن بڕیار بوون ئه‌را جیوه‌جیكردن ئومیدو ئاره‌زووه‌یلیان و دى چه‌وه‌ڕى هاوكارىو پشتگیرى له‌ حزبه‌یل نه‌كه‌ن له‌جیایان بڕیار بیه‌ن.

 

مه‌حموود وه‌ندى