ره‌نجیان

شفق نيوز

خوه‌ى قوته‌وكردن له‌ناونى دوكه‌س و هه‌ر یه‌كیگ له‌لیان دروسكردن ئه‌و ده‌سڵاته‌ یا ئه‌و دیواره‌ خه‌یگه‌ مل ئه‌واكه‌ى تر و شایه‌ت وه‌چه‌وایشه‌و بوود. ئنجا بڕیگ له‌و ره‌نجیانه‌ زوى خاسه‌و بوون، وه‌تایبه‌ت لاى ئه‌و كه‌سه‌یله‌ ك جووریگ له‌ دڵپاكى دیرن و چشت نیه‌گرنه‌ دڵ. وه‌ل ئه‌وه‌یشا فره‌جاریش په‌یوه‌ندى وه‌ سروشت و كه‌سایه‌تى یه‌كیگیانه‌و هه‌س ك تویڕه‌و خودپه‌رسه‌و گووش نیه‌یگه‌ هه‌ق كه‌سه‌یل تر و گرنگ  نیه‌ وه‌لایه‌و ئه‌گه‌ر مه‌ردم له‌لى بڕه‌نجیه‌ن یا وه‌چه‌واشه‌.

باوه‌ت ئابوورى و كومه‌ڵایه‌تى و كلتوور جیاوازیش هووكارن ئه‌را مه‌سه‌له‌ى ره‌نجیان، وه‌لى ئه‌وه‌ك مه‌ترسیدار بوود ئه‌وه‌سه‌ ك په‌یوه‌ندى وه‌لایه‌ن سایكۆلۆژى كه‌سه‌گه‌وه‌ بوود ك ئه‌ویش له‌هس و ده‌روینى سه‌رچه‌وه‌ گرتویگ و له‌دید و ئه‌ڕاى چوین خوه‌یه‌وه‌ په‌یمانه‌ى دریارده‌و كه‌سه‌یل ده‌وروه‌ر ئه‌كا، یا ئه‌وه‌سه‌ مه‌سه‌له‌گه‌ له‌گووشه‌ى دڵ خوه‌یه‌وه‌ دوینیگ ، یا له‌كوناى قاپى ماڵه‌گه‌یه‌وه‌ هاوسایه‌یلى دوینیگ وه‌بى ئه‌وه‌ك شیوازه‌یل جوراوجوور ده‌روینى و كومه‌ڵایه‌تى له‌وه‌رچه‌و بگریگ و له‌لیان بفامیگ.

له‌دید سایكۆلۆژیه‌وه‌ باوه‌ڕنه‌كردن وه‌ خود، هووكار گرنگ یاموهمیگه‌ له‌ى مه‌یدانه‌، ئنجا ئه‌و كه‌سه‌یله‌ باوه‌ڕ و متمانه‌ وه‌ خوه‌یان نه‌یرن زویتر ڕه‌نجیه‌ن، چوینكه‌ له‌ كه‌سایه‌تى خوه‌یان ڕخیان چووگ. وه‌ل ئه‌وه‌یشا گومان و نه‌ڕه‌سینه‌وه‌ له‌یه‌كترى و نه‌وین هوشیارى گشت ئه‌یانه‌ كاریگه‌رى خوه‌یان دیرن له‌ ره‌نجیان مه‌ردم له‌ یه‌كترى، بیجگه‌ ئه‌وه‌یش ناز و فیزیش هووكاریگ تر ده‌روینیه‌ له‌وه‌ختى ك ئاده‌میزاد هس وه‌ له‌ده‌سداین هس ئه‌كا ئه‌وه‌ زویتر ره‌نجیه‌یگ . فره‌جاریش هووكاره‌یل ڕه‌نجیان واقعیه‌، یه‌یش له‌وه‌ختى دوكه‌س یا یه‌كیگیان پاشیل واده‌ى خوه‌یان كه‌ن وه‌رانوه‌ر ئه‌واكه‌ى تر، وه‌لى له‌باوه‌ت گرنگى كه‌سایه‌تى وه‌رانوه‌ر، شایه‌ت ئاده‌میزاد گووش نه‌یه‌یگه‌ ئه‌و زه‌ره‌ده‌ ك وه‌پى ره‌سیه‌، ئنجا راسه‌وخۆ یا وه‌بوونه‌ى كه‌سیگ تره‌وه‌ بوود له‌لى خوه‌ش بوود و په‌یوه‌ندییان خاستره‌و بوود، چوینكه‌ له‌ یه‌كتر قه‌بوولكردن غه‌ڵه‌ته‌یل وه‌رین شاریه‌یگه‌وه‌و هه‌وه‌جه‌ وه‌ ده‌رخستن دیریگ، له‌وه‌ر ئه‌وه‌ له‌شوون ده‌رخستن و گوزارشكردن له‌لى، دڵ و ده‌روین ئاده‌میزاد ئاسووده‌ بوود.

ماناى ئه‌وه‌سه‌ ئى جووره‌ هساویگ هه‌س له‌لاى ئاده‌میزاد، چوینكه‌ مه‌سه‌لى رۆحى له‌ كومه‌ڵگاى ئیمه‌ ریشگ كوتانه‌. ئنجا بڕیگ له‌ هووكاره‌یلیش په‌یوه‌سن وه‌ نه‌ریته‌یل خیزانه‌وه‌ وه‌ك ژن وژنخوازى و كلتوور كومه‌ڵگاو گلله‌یى و چشته‌یل تر ك له‌كومه‌ڵگاى ئیمه‌ پیشوازى له‌لى كریه‌یگ ، وه‌لى ئه‌گه‌ر گلله‌یى و ره‌خنه‌ فره‌ بوود، ئه‌وه‌ بیگومان كزى كه‌سایه‌تى ئاده‌میزاده‌گه‌ نیشانده‌یگ و بایه‌سه‌ ئاده‌میزاد فره‌ په‌نا وه‌پى نه‌وه‌یگ.

مه‌رج نیه‌ ئاده‌میزاد گشت كه‌سیگ بناسیگ. چوینكه‌ له‌ كه‌سایه‌تى و سایكۆلۆژى مه‌ردم جیاوازى فره‌یگ هه‌س.

مه‌ترسیدارترین ره‌نجیان(ده‌روینى)یش ئه‌وه‌سه‌ له‌ناونى ژن و شوى ڕوى به‌یگ، چوینكه‌ ره‌نجیان وه‌رده‌وام بۆشایى یا فراغ ناونیان زیاى ئه‌كا، ئنجا له‌وه‌یش خراوتر ئه‌وه‌سه‌ كه‌س سێیم بكریه‌یگه‌ دادگا(دادوه‌ر)، چوینكه‌ خاسترین و نزیكترین دادگاى ناونى مه‌ردمان له‌یه‌ك ره‌نجیاگ هه‌ر خوه‌یانن.