وه‌رپرسيارێتی حكوومه‌ت عراق دويای ده‌رچگن هيزه‌يل ئه‌مريكا

شفق نيوز

، ئه‌وه‌ بوی وه‌ كرده‌وه‌ ئی گامه‌ له‌لايه‌ن ئه‌مريكيه‌يله‌وه‌ جی وه‌جی كرياو حكوومه‌ت عراقيش له‌لايه‌ن خوه‌يه‌وه‌ گرنگی يا ئه‌هميه‌ت فره‌يگ وه‌پيداو رووژيگيش ئه‌رای كرده‌ وچان ره‌سمی  ، وه‌لی ئه‌وه‌ك شايسته‌ی باسه‌ ئه‌وه‌سه‌ ك ئايا ئه‌و ئه‌هميه‌تداين حكوومه‌ت عراقه‌ تا ئه‌و ئه‌نازه‌ خواست بوی له‌وه‌ختيگ وه‌زع عراق له‌ی ماوه‌ له‌خراوترين ئاست بويه‌ ؟

رووژانه‌ له‌ شوونه‌يل فره‌يگ ته‌قينه‌وه‌ی گه‌ورا رويده‌ن ، هه‌ر له‌وه‌ر ئه‌وه‌يش پرسيار مه‌به‌س له‌ی ناونيه‌ ئه‌وه‌سه‌ ك ئايا له‌ ئی جووره‌ وه‌زعيگ ده‌رچگن هيزه‌يل ئه‌مريكا له‌ شارو شاروچكه‌يل عراق تا راده‌يگ تيه‌رزيگ ئاهه‌نگ و خوه‌شی ئه‌رای بكريه‌يگ و بووگه‌ چاره‌سه‌رگشت كيشه‌يگ له‌ عراق و دڵنيا بويمن له‌وه‌ك له‌شكرودام وده‌زگايه‌يل ئه‌منی له‌و ئاسته‌ بوون ك شوون سوپای ئه‌مريكا پڕه‌و بكه‌ن ، يا وه‌هه‌مان شيوه‌ كار بكه‌ن ئه‌را دابينكردن ئاسايش و ئارامی ئه‌را قوناغه‌يل ئاينده‌ ؟ ئايا له‌ی كه‌ش وهه‌وای سياسی ئيسه‌ی عراقه‌ ئه‌و رووشناييه‌ كريه‌يگه‌دی ك حكوومه‌ت و ده‌وڵه‌ت عراقی نه‌خشه‌يگ كيشاوين ئه‌را كۆنترۆڵكردن گشت كيشه‌يل ئاينده‌ی وه‌رده‌م پرووسه‌ی سياسی و ئه‌منی ؟

له‌راسی خودكيشاننه‌وه‌ی هيزه‌يل ئه‌مريكا له‌عراق مه‌سه‌له‌ی گرنگ يا موهميگه‌ له‌ڕوی په‌يمانه‌يل ناوده‌وڵه‌تی ومامڵه‌كردن عراق وه‌ل كوومه‌ڵگای ناوده‌وڵه‌تيا ، چوينكه‌ تائيسه‌ سياسه‌ت قه‌يريگ له‌ هيزه‌يل ده‌وروه‌ر پشت قايمه‌ وه‌ سياسه‌ت دويره‌وخستن سياسه‌ت عراق وه‌گووره‌ی ئه‌وه‌ك ئه‌مريكا خاوه‌ن گشت چشتيگه‌ له‌ عراق وحكوومه‌ت عراقی شه‌رعيه‌ت نه‌يريگ ، له‌وه‌ر ئه‌وه‌ له‌ی لايه‌نه‌وه‌ خودكيشاننه‌وه‌ی هيزه‌يل ئه‌مريكا له‌شاروشاروچكه‌يل عراق گرنگ يا موهمه‌ ئه‌را سه‌رله‌نوو گله‌وخواردن عراق ئه‌را كوومه‌ڵگای ناوده‌وڵه‌تی و مامڵه‌كردن وه‌ل ئه‌و هه‌مگه‌ هيزه‌يله‌ ك تا ئيسه‌ وه‌چه‌و گومانه‌وه‌ نوڕنه‌ پرووسه‌ی سياسی عراقه‌وه‌ .

له‌لايگ تره‌وه‌ ، ئه‌و خودكيشاننه‌ له‌بان ئاست ناوخوه‌يی باوه‌ڕ نيه‌كه‌يم هه‌مان ده‌ره‌نجام خاس به‌يگه‌ ده‌سه‌وه‌ ك له‌بان ئاست ناوده‌وڵه‌تی ديريگه‌ی ، چوينكه‌ بيجگه‌ وجوود كه‌م وكوڕی ئه‌منی له‌مه‌يدان سياسی عراق له‌هه‌مان وه‌خت پرووسه‌ی سياسی له‌ عراق پرووسه‌ی ته‌واويگ نيه‌ تا بتويه‌نيگ چاره‌سه‌ر گشت ئه‌و كيشه‌يله‌ بكه‌يگ ك له‌شوون رميان رژيم سه‌دامه‌وه‌ تا ئيسه‌ وه‌رده‌وامه‌ . بيگومان له‌و ماوه‌ ئه‌مريكيه‌يل وه‌زع ئه‌منی گونجياگيگ ئه‌را سه‌ركرده‌يل سياسی عراق دروس كردوين له‌وه‌ر خاتر سه‌رخستن و دريژه‌داين وه‌ پرووسه‌ی سياسی له‌ عراق ، وه‌لی وه‌ل ئه‌وه‌يشا ئی پرووسه‌ نه‌ڕه‌سيه‌سه‌ كناردڵنيايی و هيمان فره‌ی مه‌ندگه‌ ، ئمجا له‌يرا ئی پرسياره‌ كه‌يم له‌ حكوومه‌ت عراق و سه‌ركرده‌يل سياسی ، ك چوين و ، وه‌ چ شيوازيگ مامڵه‌ وه‌ل ئه‌و وه‌زع هسياره‌ كه‌ن ك له‌ئاينده‌ تيه‌يگه‌ تويشيان ؟ ئايا وه‌ ته‌نيا ئاهه‌نگ و خوه‌شی به‌سه‌ ئه‌را دڵنيابوين له‌ئاينده‌ی پرووسه‌ی ئه‌منی و سياسی له‌ عراق ؟ ئايا حكوومه‌ت وده‌زگايه‌يل ئه‌منی چ به‌رنامه‌يگ ديرن ئه‌را وه‌زع ئاينده‌ ؟ گشت ئه‌و خاڵه‌يله‌ پرسيارواقعيه‌ له‌وه‌رده‌م ئاينده‌ی حكوومه‌ت عراق ، بيگومان ئه‌من و ئاسايش وه‌شيوه‌ی خاسيگ نيايگه‌دی ئه‌گه‌ر كه‌ش وهه‌وای سياسی گونجياگيگ ئه‌را ده‌سه‌وه‌ر نه‌كريه‌يگ .‌