ئه‌راچه‌ يۆنان وه‌ وڵات دانايه‌يل ناوداره‌؟

شفق نيوز

له‌هه‌مان وه‌خت وشه‌ی فه‌لسه‌فه‌يش وه‌و جووره‌ گوزاره‌ له‌لی كرياگه‌ ك هه‌وڵ و گه‌ردينه‌ له‌ شوون دانايی، يا ئه‌تويه‌نيم بويشيم وه‌ده‌سهاوردن داناييه‌، ك يه‌يش نزيكترين چشتيگه‌ له‌ هوير و ڕای يۆنانيه‌يل.

وه‌لی ئه‌گه‌ر بنوڕيمنه‌ وشه‌و مه‌سه‌له‌ی دانايی، دوينيم ك خود يۆنانيه‌يل باوه‌ڕيان ئه‌وه‌سه‌ ك زانسته‌يل باوه‌ڕ وه‌پيكرياگيان وه‌رده‌وام وه‌بی فه‌وتيان جوور نه‌ريتيگ بمينيد و مه‌ردم ده‌ورگرد باوه‌ڕ وه‌پی داشتوون و لايه‌نه‌ په‌سه‌ن و جوانه‌گه‌ی هه‌ڵوژنن.

له‌يرا ئه‌وه‌ ئه‌رامان ده‌ركه‌فيد ك پيه‌ڵ دانايی و فه‌لسه‌فه‌ت وه‌ ده‌س يۆنانيه‌يل دامه‌زرياگه‌و ئه‌وان هوير وڕای زانستی و سه‌رڕشته‌ی ته‌ماميگ له‌تی كردنه‌سه‌ بنه‌ماو بنته‌مه‌ڵ و فكرمه‌نه‌يل تر دونيايش ئه‌را په‌يكردن و چوينێتی هه‌ڵوژانن ديد زانستيانه‌ وه‌پيا گوزه‌ر كردنه‌، ك هه‌ر وه‌و خاتريشه‌ زوورم نويسه‌ر و رووشنهويره‌يل دونيايش تام و له‌زه‌ت له‌ ئه‌زموون پڕ فه‌لسه‌فه‌ت ئه‌وان وه‌رگرن و جوور سه‌رچه‌وه‌ی ماريفه‌ت و دانايی هه‌ميشه‌ قسه‌و گفت ناوداره‌يل يۆنانی ئه‌يه‌رنه‌ كار.

له‌ناونی هه‌ردوگ سه‌ده‌ی شه‌شه‌م و هه‌فته‌م وه‌رجه‌ زايينی هه‌فت فه‌يله‌سووف له‌ بوار جياجيا له‌ يۆنان ده‌ركه‌فت، ك ئه‌يانه‌ بنه‌ڕت فه‌لسه‌فه‌ت و دانايی له‌ليانه‌و جيگير بوی و بوينه‌ هه‌فت دار به‌ردار ك وه‌ دريژايی ژيان سه‌وز و سايه‌دارن و نه‌ف له‌ ئه‌زموون و دانايی و ماريفه‌تيان وه‌رگيريه‌يد و ته‌نانه‌ت له‌ بوار سياسه‌تيش شاره‌زاو بی نموونه‌ بوينه‌ جوور ئه‌وه‌ك له‌"فه‌لسه‌فه‌ی خوه‌رئاوايی"ئاماژه‌ وه‌پيان كرياگه‌و پيكهاتنه‌ له‌"پراين، چيلۆنی، سيلۆبولێسی، پيريانده‌ر كۆرينسی، پيتاكۆسی ميتلينی، تاليسی، سولۆنی".

ئمجا هه‌ر له‌و رووژگاره‌يل وه‌رجه‌ زايينه‌ ئه‌و ناوداره‌يله‌ وه‌و جووره‌ زانسته‌يليانه‌ په‌ره‌ دانه‌ داهێنان و كاروان زانستی خوه‌يان خستنه‌ڕی وه‌ره‌و شار و شوونه‌يل تر ئه‌را خزمه‌ت ئنسانيه‌ت، دی له‌وه‌يشه‌و مه‌ردمان تر چه‌و برينه‌سه‌ ئه‌وان و هه‌وڵ و ته‌قلای ماريفه‌ت و دانايی خوه‌يان وه‌ گووره‌ی فه‌لسه‌فه‌و شاره‌زايی ئه‌وان بنيات نانه‌و ئه‌زموونه‌يليان كردنه‌سه‌ بنه‌مايگ ئه‌را هه‌ر سه‌ركه‌فتن و پيشكه‌فتنيگ له‌ بواره‌يل جياجياو هه‌ر وه‌و خاتريشه‌ يۆنان وه‌ وڵات دانايه‌يل ناوداره‌و ئه‌را ماوه‌ی فريه‌يگيش ئمپراتۆريه‌ت بته‌و داشتنه‌و دامه‌زراننه‌.

جه‌ماڵ ئه‌ركه‌وازی