شه‌فه‌ق له‌ چه‌و مه‌ردم!!

شفق نيوز

گۆڤار و سایته‌یل جیجیاى، خه‌ریكه‌ هه‌واڵ و باس و ڕاپۆرت و باوه‌ته‌یل جیاجیا پیشكه‌ش ئه‌كاده‌ وه‌رگره‌یل چ گووشته‌كنه‌یل ڕادیۆ بوون یا خوه‌نه‌واره‌یل سایت و گۆڤاره‌یل (فه‌یلى) و (گوڵ سوو)، وه‌لى سه‌رله‌ ئیواره‌ى ڕووژ دوشه‌ممه‌ 6 حوزه‌یران 2011 و وه‌بوونه‌ى ساڵیاد هه‌فت ساڵه‌ى دامه‌زرانن ده‌زگا و ڕادیۆ (شه‌فه‌ق)، ئاهه‌نگیگ ساز دریا وه‌ئاماده‌بوین شماره‌یگ بژارده‌ له‌ گووشته‌كنه‌یل و خوه‌نه‌واره‌یل شه‌فه‌ق، ئیمه‌یش له‌یرا حه‌زكردیمن ئه‌و ئه‌زیزه‌یله‌ باریمنه‌ زووان و بیلیمن هه‌ست و هویر و ڕاى خوه‌یان وه‌ك خوه‌ى باس بكه‌ن و ئیجاره‌ ئیمه‌ گووش له‌لیان بته‌كنیمن وئه‌وان قسه‌ بكه‌ن، بیلا وه‌یه‌كه‌و بزانیمن چه‌ن ئه‌زیزیگ له‌وانه‌ له‌ى باوه‌ته‌ چه‌ ئویشن:

 

ئه‌بوو عومه‌ر: خوه‌مان وه‌ ئه‌ندامیگ له‌ خێزان شه‌فه‌ق زانیمن.

له‌ سه‌ره‌تا گووشته‌كن ئه‌زیز و دێرین ڕادیۆ شه‌فه‌ق(حاجى فاروق) ك وه‌(ئه‌بو عومه‌ر) ناسریاس وه‌ى جووره‌ وه‌سف هه‌ست و شعوور خوه‌ى كرد و وت:" شه‌فه‌ق خێزانیگ پاك و ئه‌زیز و دڵسووزن له‌ هه‌مان وه‌خت". زیاتریش وت:"ئه‌گه‌ر شه‌فه‌ق نه‌ویاتا ئى هه‌مكه‌ مه‌ردمه‌ وه‌ده‌ور یه‌كه‌و وه‌ى جووره‌ گرده‌و نه‌وین له‌ كه‌س و كار و ئویشم كه‌س وكار چوینكه‌ له‌وه‌ دڵنیام ك هه‌ر یه‌كى له‌ى ئاماده‌ بویه‌یله‌ خوه‌ى وه‌ ئه‌ندامیگ له‌ خێزان شه‌فه‌قى ده‌یده‌ قه‌ڵه‌م.

ئه‌بو عومه‌ر له‌باوه‌ت زووان كوردى وت:"من هه‌رچه‌نى ك له‌ زووان كوردى نیه‌زانم، وه‌لى باوه‌ڕ بكه‌ن وه‌ختى گووش له‌ رادیۆ شه‌فه‌ق ته‌كنم وه‌ زووان كوردى فره‌ خوه‌شحاڵ بووم و حه‌ز كه‌م هووكاره‌ى ئى زووان شرینه‌ بووم تا بتویه‌نم وه‌لیا په‌یوه‌ندى بكه‌م".

 

دویه‌ته‌گه‌ى عیراق: شه‌فه‌ق هیشته‌م شانازى وه‌ كوردبوین خوه‌م بكه‌م!

 

(ئقبال هاشم حه‌سه‌ن) ك وه‌ (دویه‌ته‌گه‌ى عیراق) ناسیاس له‌ هه‌مان باوه‌ت وت:"(شه‌فه‌ق) ئه‌را من گشت چشتیگه‌، و ئه‌وه‌یشه‌ له‌لیدان نیه‌شارمه‌و ك من ئه‌وسا نه‌زانستیام وه‌ زووان كوردى قسه‌ بكه‌م ك زووان داڵگى خوه‌مه‌، نه‌ك هه‌ر ئه‌یه‌یش، به‌ڵكوو وه‌ ڕیگه‌ى ڕادیۆ شه‌فه‌قه‌و من فره‌ له‌ قه‌وم  و كه‌س وكاره‌ى خوه‌م ناسیم ك جاران هه‌ر ناویانیش نه‌ژنه‌فتویم، و وه‌ختى زانستم ئیمه‌ كییمن و چه‌یمن، شانازى كردم وه‌ ئنتمائم ئه‌را كورده‌یل فه‌یلى ك من یه‌كیگم له‌ ڕووڵه‌یل ئه‌وان". دویه‌ته‌گه‌ى عیراق زیاتریش وت:" ئیسه‌یش وه‌سایه‌ى سه‌ر شه‌فه‌قه‌و من مه‌وهبه‌یگ خوه‌م ئكتشاف كردم و ئه‌وه‌ بوى ده‌سكردمه‌ نویسانن شعر و وه‌هه‌ردوگ زووان كوردى و عه‌ره‌بى شعر نویسم و هه‌ر له‌ى ڕادیۆوه‌ نازناو سه‌فیر شعر موله‌مه‌ع بڕیا باڵام... ئه‌وه‌یشه‌ مه‌نیه‌ ئه‌رادان بویشم ك ڕادیۆ شه‌فه‌ق بۆشاییگ فره‌ له‌ ژیان و ده‌روینم پڕه‌و كردیه‌ و بویه‌سه‌ هاوه‌ڵ و هاوخه‌م وه‌خته‌یلم".

ئه‌بوموسته‌فا عگێلى:شه‌فه‌ق، وه‌شیوه‌یگ عه‌مه‌لى برایه‌تى كورد وعه‌ره‌ب نیشانماندا!

(وادى جوبه‌ییر) ك وه‌ (ئه‌بو موسته‌فا عگێلى) ناسیاس له‌بان ئه‌وه‌ جه‌خت كرد ك:"شه‌فه‌ق ئه‌را ئیمه‌ كلیل شادیه‌، و ده‌روازه‌یگه‌ ئه‌را پاكه‌و كردن و ماڵین خه‌مه‌یل جه‌مه‌و بوى له‌ ناو دڵ عیراقیه‌یل و تایبه‌تمه‌ندى خوه‌ى له‌یرا چه‌سپان ك درانه‌ى ئه‌را گشت پیكهاته‌یل ملله‌ت عیراق وازه‌ و هه‌ركه‌سى تویه‌نید وه‌ گشت ئازادییگه‌و گوزارش له‌ ڕا و ئه‌راى چوین خوه‌ى بكا و منبه‌ریگه‌ ئه‌را ڕا و ڕاى وه‌رانوه‌ر، بى ئه‌وه‌گ ته‌عه‌دا له‌ هویچ لایه‌نیگ بكریه‌ید".

عگێلى هه‌میش وت ك:"سه‌ربار ئه‌وه‌یشه‌، (شه‌فه‌ق) داڵگ خاوه‌ن به‌هره‌یله‌ و هویچ دوچه‌وه‌كى ناكا له‌ ناوبه‌ین ڕووڵه‌یلى، و گه‌وراترین ده‌رفه‌ت ده‌یده‌ به‌رهه‌مه‌یل شعرى و ئه‌ده‌بى و هونه‌رى جایڵه‌یل خاوه‌ن به‌هره‌ ئه‌را ئه‌وه‌گ تواناى خوه‌یان نیشان بیه‌ن".

له‌ ئاماژه‌یگ ئه‌را ڕیڕه‌و هاوسه‌نگ ده‌زگاى شه‌فه‌ق، عگێلى ئه‌وه‌یشه‌ وت ك:"شه‌فه‌ق وه‌شیوه‌یگ عه‌مه‌لى برایه‌تى كورد و عه‌ره‌ب نیشانماندا و له‌یه‌ك نزیكمانه‌و كرد و خه‌م و مه‌ینه‌تى یه‌كترى زانستیمن و دویرى ماوه‌یل كوڵه‌و كرد له‌ ناوبه‌ینمان".

زیاتریش وت:"من هه‌میشه‌ وه‌ل خوه‌مه‌و ئى وته‌ ئویشمه‌و : تواستن نویریان خامووش بكه‌ن و تواستن یانه‌ وجوود نه‌یاشتوون، وه‌لى خوه‌ر شه‌فه‌ق له‌ ئاسۆ ده‌رچوى وه‌ نویریگ نوو ، و بویه‌ ڕى ڕشووشنكه‌ر گشت كه‌س ولایه‌نیگ".

 

موحسن عگیلى:وه‌رج له‌ شه‌فه‌ق گووش له‌ هویچ ڕادیۆیگ كوردى نه‌ته‌كانیام!

گووشته‌كن هه‌میشه‌یى به‌رنامه‌یل ڕادیۆ شه‌فه‌ق ، موحسن عگێلى ئویشى:"شه‌فه‌ق داهێنان (ابداع) و نویره‌ و فره‌ چشت له‌ به‌رنامه‌یلى هووكاره‌ بویم وه‌ تایبه‌تى له‌ به‌رنامه‌یل كوومه‌ڵایه‌تى و ئاشنایى وه‌ل كه‌سه‌یلیگه‌و په‌یاكردم ك جیى ئومیدم بوین چ له‌ كادر ده‌زگا و چ له‌ گووشته‌كنه‌یل و دووسه‌یل و هه‌واداره‌یل شه‌فه‌ق.

موحسن عگێلى ئه‌وه‌یشه‌ ئاشكراكرد ك:"وه‌ڕاسى من وه‌رج له‌ ڕادیۆ شه‌فه‌ق گووش له‌ به‌رنامه‌یل كوردى هویچ ڕادیۆیگ نه‌ته‌كانیام  وه‌لى وه‌ختى وه‌ل شه‌فه‌قه‌و ئاشنایى په‌یاكردم ئاسووه‌یل نوویگ ئه‌رام وازبوى و زووان كوردى له‌لام مه‌قبوولیه‌ت خاسیگ په‌یاكرد و ئیسه‌یش فره‌ وشه‌(كلمات) كوردى هووكاره‌بویمه‌ و هه‌رچى له‌ به‌رنامه‌یل شه‌فه‌ق ئویشیه‌ید له‌لى حالى بووم و ئومیدم ئه‌وه‌سه‌ ڕووژیگ باید وه‌كوردى وه‌لیانا په‌یوه‌ندى بكه‌م و قسه‌ى شرین كوردى بكه‌م".

 

دایگ عه‌لى خانه‌قینى: له‌ عشق شه‌فه‌ق هووكاره‌ى ڕینویس كوردى بویم!

 

یه‌كیگ له‌ چالاكترین گووشته‌كنه‌یل ڕادیۆ شه‌فه‌ق ك (دایگ عه‌لى خانه‌قینى)یه‌ له‌ باسكردن په‌یوه‌ندیى وه‌ل شه‌فه‌ق ئویشى:"شه‌فه‌ق ده‌زگا و ڕادیۆیگ پیشكه‌فتیه‌ و ڕاقیه‌ و سوود فره‌یگ له‌لى وه‌رگردمه‌ و چشته‌یل نوو فره‌یگ له‌لى هووكاره‌ بویمه‌ و ئاشنایى وه‌ل مه‌ردمه‌یل خوه‌شه‌ویس و نازاریگ په‌یا كردمه‌ وكه‌سایه‌تیه‌یل و تاریخ و بوونه‌ و ڕووژه‌یل تاریخى ملله‌ت كورد زانستمه‌". ئه‌وه‌یشه‌ ئاشكرا كرد ك:"من جاران ڕینویس كوردى نه‌زانستیام و وه‌ هه‌وڵ و ته‌قه‌لاو له‌ عشق ڕادیۆ شه‌فه‌ق من هووكاره‌ى ڕینویس كوردى بویم و ئیسه‌ دیرم وه‌ كوردى مه‌سج نویسنم و ئه‌رایان كلى كه‌م".

 

 

 

دایگ عه‌لى له‌ كووتایى قسه‌یلى وت:"ئومیده‌وار پیشكه‌فتن زیاتریش ئه‌را شه‌فه‌ق خوازم و حه‌زیش كه‌م وه‌خت به‌رنامه‌یلى كه‌مى زیاتره‌و بكریه‌ید تاگه‌ر فره‌ترین كه‌سه‌یلیگ به‌شدارى بكه‌ن".

 

 

تالب وه‌نداوى:دڵم وه‌دیدار شه‌فه‌ق ڕووشنه‌و بویه‌!

 

یه‌كیگ له‌ گووشته‌كنه‌یل فره‌ تایبه‌ت ڕادیۆ شه‌فه‌ق گووشته‌كن هه‌میشه‌یى (تالب وه‌نداوى)یه‌ ك ئاده‌میزادیگه‌ ك هه‌رچه‌نى له‌ چه‌و نابینایه‌ وه‌لى خاوه‌ن دڵ و ده‌روینیگه‌ ك دونیا گشتى گریده‌وه‌ و له‌باس په‌یوه‌ندیى وه‌ل ڕادیۆ شه‌فه‌ق وه‌ى شیوه‌ هاته‌ زووان و وت:"وه‌دیدار شه‌فه‌ق و شه‌فه‌قیه‌یل دڵم ڕووشنه‌و بویه‌ وه‌لى چه‌بكه‌م ك نیه‌تویه‌نم چه‌وم وه‌ى هه‌مگه‌ ڕووشناییه‌ شاده‌و بكه‌م".

وه‌نداوى ئه‌وه‌یشه‌ ئاشكراكرد ك :" شه‌فه‌ق ڕه‌فیق هه‌میشه‌یى سه‌عاته‌یل ڕووژگارمه‌و وه‌لیا هه‌ڵسم و وه‌لیانیشم و وه‌لیا خوه‌م وه‌لیا خه‌فم، وبویه‌سه‌ به‌شیگ دانه‌وڕیاى له‌ ژیانم".

ڕه‌شا ئه‌یاد : شه‌فه‌ق ڕه‌نگ و بوو و تام تایبه‌ت خوه‌ى دیرید

 

له‌ دویا مه‌حه‌ته‌ى ئى ڕپۆرتاژه‌، حه‌ز كردیمن راى یه‌كیگ له‌ هاوكاره‌یل ڕووژنامه‌نویسمان له‌باوه‌ت شه‌فه‌ق بپرسیمن و له‌ى ئاهه‌نگه‌ چه‌ومان كه‌فته‌ میدیاكار ڕه‌شا ریاز، ك وه‌ى جووره‌ باس شه‌فه‌ق ئه‌رامان كرد و وت:"ڕادیۆ شه‌فه‌ق ڕه‌نگ و بوو و تام تایبه‌ت خوه‌ى دیرید، و له‌ لاى جه‌ماوه‌ر به‌غدا فره‌ خوه‌شه‌ویسه‌ و وه‌ئاسانى چووده‌ ناو دڵ و ده‌روین گووشته‌كنه‌یل وجى خوه‌ى كه‌یده‌و".

ئه‌وه‌یشه‌ ئاشكراكرد:"هه‌رچه‌نى ك ده‌نگه‌یل فره‌یگتریش له‌ به‌غدا هه‌س؛ وه‌لى شه‌فه‌ق تایبه‌تمه‌ندى خوه‌ى دیرید و دیاره‌ یه‌گشتى له‌ ئاكام مانى بوین و كاركردن بى وچان كارمه‌نده‌یلیه‌ ك ئیجووره‌ به‌رهه‌میگ جوور چه‌پكه‌ گوڵیگ ڕازاوه‌ پیشكه‌ش كه‌ید گووشته‌كنه‌یلى و منیش له‌یرا فره‌ خوه‌شحاڵم وه‌ هاتنم ئه‌را ئاهه‌نگه‌گه‌ى دامه‌زراننى و ده‌سخوه‌شى له‌ گشت كارمه‌نده‌یلى كه‌م و داواى سه‌ركه‌فتن و پیشكه‌فتن ئه‌رایان خوازم".

 

شایان وتنه‌ ك ڕادیۆ شه‌فه‌ق یه‌كم ڕادیۆى كوردیه‌ له‌ به‌غدا ك له‌ شوون ڕمیان ڕژیم دیكتاتۆرى وه‌رین، له‌ مانگ حوزه‌یران ساڵ 2004ه‌و ده‌س كردیه‌سه‌ په‌خشكردن به‌رنامه‌یلى و ئیسه‌یش ڕووژانه‌ 20 سه‌عات په‌خش دیرى، هه‌ر له‌ سه‌عات شه‌ش شه‌وه‌كى تا سه‌عات 2 شه‌و، و ده‌یان به‌رنامه‌ى جیاجیا و گورانى و مۆسیقا و دراما وبه‌شه‌یل خه‌وه‌رى وه‌ هه‌ردوگ زووان كوردى وه‌ هه‌ردوگ شیوه‌زووان كوردى فه‌یلى و سۆرانى  و وه‌ زووان عه‌ره‌بى په‌خش ئه‌كا.

 

ریپۆرتاژ: ماجد سوره‌مێرى