ئه‌را خه‌ڵات تافتس ئاشتی پيشكه‌ش سه‌رۆك بارزانی كريا؟

شفق نيوز

وه‌ربگريگ، چوينكه‌ وه‌رجله‌يه‌يش خه‌ڵات (ئه‌تله‌نتيك) ئه‌را ئاشتی له‌لايه‌ن په‌يمان باكوور ئه‌تله‌سی و له‌ رووژ 22/2/2011 و له‌ ئاهه‌نگ گه‌ورايگ له‌ پايته‌خت ئيتاڵيا پيشكه‌ش سه‌رۆك بارزانی كريا وه‌جووريگ ئه‌را يه‌كمجاره‌ ئه‌ی خه‌ڵات به‌رزه‌ پيشكه‌ش سه‌ركرده‌يگ له‌ رووژهه‌ڵات ناوڕاس كريه‌يگ و نوێنه‌ر پاپای ڤاتيكان و ئه‌ندامه‌يل سه‌ركردايه‌تی ناتۆ و شماره‌يگ له‌ په‌رله‌مانتاره‌يل ئيتاڵيايی و سه‌فيره‌يل عيراق و توركيا له‌ ئيتاڵيا و شماره‌يگ له‌ وه‌رپرسه‌يل و دووسه‌يل ملله‌ت كوردستان ئاماده‌ی ئاهه‌نگه‌گه‌ بوين.

سه‌رۆك بارزانی وه‌ چالاكی دبلۆماسی و سه‌ركه‌فتنه‌يلی له‌ بواره‌يل ئاشتی و ته‌قالا ئه‌را په‌خشه‌وكردن بنه‌وايه‌يل ديموكراسی و چه‌سپاننی له‌ عيراق و هه‌رێم كوردستان تايبه‌تمه‌نده‌ و له‌ زامن كردن سه‌قامگيری عيراق و هه‌رێم كوردستان چالاكی فره‌يگ ديريگ جوور ده‌سپيشخه‌رييگ بويه‌ بايس گرده‌وبوين لايه‌نه‌يل نيشتمانی و پارته‌يل سياسی عيراقی له‌ هه‌ولێر پايته‌خت هه‌رێم كوردستان و چاره‌سه‌ركردن قه‌يران دامه‌زرانن حكوومه‌ت نوو عيراق و بنه‌وا و خاڵه‌يليگ ئه‌را بنه‌وای ئه‌ی ده‌سپيشخه‌ريه‌ دياری كرد و له‌و وه‌خته‌ بويه‌ به‌رنامه‌يگ ئه‌را رازی كردن گشت لايه‌نه‌يل كومه‌ڵگه‌ و له‌شوونيش نيشتنيگ له‌ به‌غدا وه‌گوره‌ی دامه‌زريا و سه‌رۆك بارزانی سياسه‌ت حه‌كيمانه‌يگ له‌خوه‌ی نيشان دا و گشت لايه‌نه‌يل سياسی وه‌ره‌و پی په‌نا به‌ن ئه‌را راوێژكردن و ئاموژگاری كردنيان. وه‌ڕاسی مه‌سعود بارزانی نموونه‌ی ئاشتی و ديموكراسيه‌.

ئه‌ی خه‌ڵات ئاشتيه‌ ك له‌لايه‌ن زانكۆی تافتس ئه‌مريكا پيشكه‌ش سه‌رۆك بارزانی كريا ته‌نيا پيشكه‌ش ئه‌و كه‌سايه‌تيه‌يل جه‌هانيه‌ كريه‌يگ ك وه‌ روح دوسی و ئاشتی تايبه‌تمه‌ندن و له‌ په‌خشه‌و كردن ئاشتی له‌ كۆمه‌ڵگا و پشتگيری له‌ ديموكراسی نه‌قش ديرن و هه‌رساڵ پيشكه‌ش كه‌سايه‌تی جه‌هانيگ كريه‌يگ ك نه‌قش تايبه‌تيگ له‌ بوار ئاشتی و چالاكی دبلۆماسی داشتگه‌ و ئه‌نجوومه‌ن(بورد)زانكۆ تافتس ئه‌مريكا ئمساڵ سه‌رۆك بارزانی ئه‌را وه‌رگرتن ئه‌ی خه‌ڵاته‌ هه‌ڵوژان چونكه‌ نه‌خش چالاك و تايبه‌تيگ له‌ په‌خشه‌و كردن ئاشتی و بنه‌وايل ديموكراسی و پيشخستنی له‌ گشت لای عيراق داشتگه‌ و هه‌ميش له‌ بوار ئاوادانی دامه‌زرانن ژيرخان هه‌رێم كوردستان نه‌خش داشتگه‌ بويه‌ بايس هه‌رێم كوردستان بووده‌ نمونه‌يگ له‌ سه‌ركه‌فتنه‌يل و ته‌جرۆبه‌ی ديموكراسی له‌ گشت جه‌هان.

له‌لايگتره‌و ئه‌ی خه‌ڵاته‌ تايبه‌تمه‌ندی مه‌عنويش ديريگ و نيشانه‌ی ئايه‌نده‌ی رووشن و پرله‌گه‌شه‌ پياكردن سه‌رۆك بارزانی و گشت هه‌رێم كوردستانه‌.

شايان باسه‌ له‌ ئاهه‌نگ تايبه‌تيگ ك له‌ سه‌لاح دين به‌رپا كريا و هه‌ريه‌ك له‌ دكتور كه‌مال كه‌ركوكی سه‌رۆك په‌رله‌مان كوردستان و مه‌سرور بارزانی سه‌رۆك ئاژانس چه‌وديری له‌ ئاسايش هه‌رێم كوردستان و شماره‌يگ له‌ ئه‌ندامه‌يل كوتله‌يل په‌رله‌مانی و قونسل ئه‌مريكا له‌ هه‌رێم ئاماده‌ی بوين ئه‌ی خه‌ڵاته‌ له‌لايه‌ن پرۆفسۆر رۆبرت بيندتسن ئه‌ندام بورد زانستی زانكۆه‌گه‌ خه‌ڵاته‌گه‌ پيشكه‌ش مه‌سعود بارزانی سه‌رۆك هه‌رێم كوردستان كريا و پرۆفسۆر رۆبرت وته‌يگ پيشكه‌ش كرد و له‌تی وه‌ت: مايه‌ی فه‌خر و شانازيه‌ ك ئه‌ی خه‌ڵاته‌ وه‌ناو زانكۆه‌گه‌ وه‌خاتر ئه‌و هه‌ڵويسته‌يل ئنسانيه‌ و چالكی و سركه‌فتنی له‌ بواره‌يل ئاشتی و ته‌قالای وه‌رده‌وام ئه‌را چه‌سپانن ديموكراسی له‌ عيراق و هه‌رێم كوردستان پيشكه‌ش سه‌رۆك بارزانی كه‌ی . سه‌رۆك بارزانيش له‌لايه‌ن خوه‌يه‌و و ملله‌ت كوردستان له‌ پرۆفسۆر رۆبرت ته‌شه‌كۆر كرد و وه‌ت: وه‌ناوملله‌ت كوردستان له‌ زانكۆی تافتس ته‌شه‌كور كه‌م و ئيمه‌ جوور ملله‌ت كوردستان مايه‌ی فه‌خر و شانازيمانه‌ ك ئه‌ی جوور خه‌ڵاته‌يل به‌رزيگ پيشكه‌شمان بكريه‌يگ چونكه‌ وه‌ ئاشتی و چالاكی دبلۆماسی په‌يوه‌ندی ديريگ و ئيمه‌ وه‌خاسی له‌ ئه‌رزش ئه‌ی خه‌ڵاته‌ ئاگاداريم.

بارزانی هه‌ميش ئعلان كرد: خه‌بات ملله‌تگه‌مان له‌دريژه‌ی ميژوو ئه‌را ئاشتی و ژيان برايانه‌ و دوسی بويه‌ و مايه‌ی فه‌خر و شانازيمانه‌ ك له‌ توندوتيژی و تونره‌وی دوير بويمنه‌ و ئه‌ی خه‌ڵات وه‌ختی پيشكه‌ش كريه‌يگ وه‌راسی پيشكه‌ش ئه‌و خه‌بات پاكه‌ كرياس. سه‌رك بارزانی هه‌ميش جه‌خت كرد: ئيمه‌ جوور ملله‌ت كوردستان ئازادی ئمروومان وه‌ به‌رز زانيمن و قه‌وڵ ده‌يمنه‌ جه‌هان ك دريژه‌ بيه‌يمنه‌ ته‌قالايلمان ئه‌را ئاشتی وه‌ل گشت ملله‌ته‌يل جه‌هان و له‌هه‌مان وه‌ختيش ئعلان كرد ده‌سه‌ڵات ديموكراسی وه‌شيوه‌ی وه‌رده‌واميگ له‌ هه‌رێم كوردستان بته‌وه‌و بوود و وه‌شيوه‌ی وه‌رده‌وام له‌ په‌خشه‌و بوين ئازادی له‌ ناوچه‌گه‌ پشتگيری كه‌يم چونكه‌ ئه‌ی باوه‌ره‌ ديريم ئايه‌نده‌ خوود ملله‌ته‌. سه‌رۆك بارزانی وه‌ی بنه‌وا باوه‌ر ديريگ و دريژه‌ده‌يگه‌ ته‌قالايلی ئه‌را ديموكراسی و په‌خشه‌و كردن ئاشتی و ئازادی و دادوه‌ری و دويری گرتن له‌ توندوتيژی. وه‌يخاتر بی مانا نيه‌ ك سه‌رۆك بارزانی خه‌ڵات ئاشتی و چالاكی دبلوماسی زانكۆی تافتس وه‌ربگريگ و كه‌سايه‌تيگه‌ ك وه‌ ئاشتی و ته‌قالا ئه‌را چه‌سپانن ئازادی و سه‌قامگيری ناوداره‌ و ئه‌ی خه‌ڵاته‌ وه‌راسی هه‌قی بوی.

محه‌مه‌د عه‌لی