با ڕى نه‌یه‌یم زه‌فه‌ر له‌لیمان بارن

شفق نيوز

  ئى باشوور كوردستان ئیمه‌ له‌شوون پرووسه‌ى ئازادى عراق و راپه‌ڕین ساڵ 1991 ملله‌ت كورد وه‌ دویاوه‌، هه‌میشه‌ مه‌نزڵ و لانه‌ى لیقه‌ومیاگ و ئاواره‌یل كورد به‌شه‌یل تر كوردستان بویه‌و هه‌ر وه‌و خاتریشه‌ جه‌ور فریه‌یگ كیشاگه‌ ئه‌را ده‌رخستن سووز و مروه‌ت خوه‌ى و نیشانداین ناسنامه‌ى ئنسانى.

له‌رووژگار پڕ له‌سته‌م و ماڵویرانى، به‌ش ملله‌ت كورد هه‌ر خه‌م و خفه‌ت بویه‌، وه‌لى ساڵه‌یلیگه‌ له‌ساى شنه‌واى ئازادى و دیموكراسى ریژه‌یگ له‌و ئازار و مه‌ینه‌تیه‌یله‌ ك هه‌میشه‌ خوه‌ى له‌ تاك كورد جیا نه‌كردگه‌ خوه‌ى له‌ كه‌ش ئاسووده‌یى و سه‌رفرازى دیه‌و، ك وه‌و خاتریشه‌ باشوور كوردستان بویه‌ میلكان ئارامیگ ئه‌را گشت كوردیگ له‌ هه‌ر شوونیگ له‌ى دونیاو جوور ته‌نیا باوان ئازادیگ پیشوازى له‌ كورده‌یل سته‌مدیده‌و لیقه‌ومیاگ كرد.

بیجگه‌ ئه‌وه‌یش باشوور كوردستان وه‌رده‌وام ژان و ئازار ملله‌ته‌یل تر بیگانه‌یش پیچاگه‌ وه‌تایبه‌ت له‌شوون ساڵ 2003 خیزانه‌یل فریه‌یگیش له‌ناوچه‌یل باشوور و ناوڕاس عراقه‌و روى له‌لى كردیان ك له‌ئاكام تر س و كووچ وه‌پیكردن زووره‌ملى و بار خراو ناوچه‌یلیان په‌نا بردنه‌سه‌ وه‌ر هه‌رێم كوردستان وه‌ خاتر ئارامى بار ئاسایشه‌گه‌ى و سروشته‌ جوانه‌گه‌ى و یاسا ده‌ستووریه‌گه‌ى و سووزه‌ كورده‌واریه‌گه‌ى ك شانازى گه‌ورایگه‌ ئه‌را ملله‌ته‌گه‌مان ئمڕوو بتویه‌نیم ده‌س یارمه‌تى دریژه‌و بكه‌یم ئه‌را هه‌ر ئاده‌میزاد بى لانه‌و لیقه‌ومیاگ.

وه‌لى خاڵ گرینگ و گه‌وراترین شانازى و سه‌روه‌رى ئه‌ڕامان ئه‌وه‌سه‌ بتویه‌نیم وه‌ گشتمانه‌و مقه‌یه‌تى له‌ى به‌ش ئازادكریاگ كوردستانه‌ بكه‌یم و ڕى نه‌یه‌یم گه‌نه‌كار و ترۆریست و به‌دكاره‌یل زه‌فه‌ر له‌لیمان بارن و دوباره‌ وه‌ناهه‌ق خوین روڵه‌یلمان له‌ناو جاده‌و كویچه‌یل جوانه‌وكریاگ هه‌ولێر و دهۆك و سلێمانى و گشت شارو شاروچگه‌یلمان بڕشنن و نه‌یاره‌یلمان هه‌ناسه‌ى ئوخه‌ى هه‌ڵكیشن.

با دڵ له‌دڵ ساف بوود، با خوسه‌و كینه‌ت بخه‌یمنه‌ كنار، با له‌وه‌رخاتر خوین شه‌هیده‌یلمان مقه‌یه‌تى له‌ ده‌سكه‌فته‌یل گه‌ورامان بكه‌یم و ڕى نه‌یه‌یم دوباره‌ ئاواره‌و ده‌ردوه‌ده‌رمان بكه‌ن، با رووژه‌یل سیه‌ى كووچ و ڕه‌وڕه‌و له‌هویرمان نه‌چوود ك سه‌ده‌ها مناڵه‌ كورپه‌و سه‌ده‌ها ژن و پیاو پیركه‌فتگ بوینه‌ قوربانى ژیان سه‌خت ژیر سیه‌ماڵ"گرده‌نوو" و " خڕاته‌یل چه‌م ئه‌ڵوه‌ن" و "پا كویه‌ى پاوه‌" و مه‌رزه‌یل نزیك توركیه‌و شوون و په‌ناگه‌یل تر .

گومان له‌وه‌ نیه‌ ئه‌گه‌ر یه‌ك دڵ و یه‌ك گیان و یه‌ك هه‌ڵویست نه‌ویمن له‌وه‌رانوه‌ر مقه‌یه‌تیكردن له‌ بار ئاسایش ناوچه‌گه‌مان، ئه‌وه‌ تیر دوشمن هه‌میشه‌ له‌كاره‌و گشت وه‌ختیگ هه‌وڵ ته‌قینه‌وه‌و خراوه‌كارى دریه‌یدو دى سه‌قامگیرى و ئاسایش و بار خوه‌شگوزرانى مه‌ردم كورد ئه‌كه‌فیده‌ مه‌ترسى، وه‌لى ئه‌گه‌ر ئى ده‌سكه‌فته‌یل و ئى ئازادیه‌ ك حاڵ حازر له‌تى ژیه‌یم له‌لامان جى گرینگى و خزمه‌تكردن بوود، ئه‌وه‌ بیگومان نه‌بایه‌د هویچ وه‌ختیگ ڕى بیه‌یم جاریگ تر ده‌س ترۆر بڕه‌سیده‌ شاره‌یلمان و شه‌ل وپه‌ت روڵه‌یل ئاسایش و هاووڵاتیه‌یلمان بكا، چوینكه‌ حه‌یفه‌ ئاسایش كوردستان بشیویه‌یدو متمانه‌و دڵنیایى له‌ده‌س بچوود.

جه‌ماڵ ئه‌ركه‌وازى