كی جواو پرسيار فه‌يليه‌يل ئه‌ياده‌و؟
رووشنهويره‌يل كورد فه‌يلی وه په‌نابردن وه‌ی هزره‌يل تازه له چوارچيوه‌ی ئه‌و نه‌ريته‌يل باو كوومه‌ڵايه‌تيه‌و له‌ژير ده‌سڵات شێخ و سه‌رگه‌ورای ئه‌و هووزه‌يله ده‌رچين ك پشتگيری حكوومه‌ت و رژيمه‌يل يه‌ك له‌شوون يه‌ك كرديان وه‌خاتر دابينكردن به‌رژوه‌نديه‌يل خودی و زه‌مانه‌تكردن مه‌ندنه‌وه‌يان، ك هه‌ر وه‌و خاتريشه ئه‌تويه‌نيم بويشيم: فه‌يليه‌يل يه‌كه‌مين مه‌ردمانيگ بوين ك واز له رژيم هووزايه‌تی هاوردن و تيكه‌ڵ ئه‌و شيوازه‌يل ژياريه بوين ك ژيان شارستانيه‌ت چه‌سپانه‌ی.
له‌يرا ئه‌خوازيم ئاماژه وه ديارترين به‌شداريه‌يل كورد فه‌يلی بكه‌يم ك وه شيوه‌يگ پڕ دقه‌ت و فه‌رمی نويسريانه، ك ئه‌ويش وجووديان بوی له دامه‌زرانن پارت ديموكرات كوردستان له ساڵ ١٩٤٦زايينی ئه‌وسا له به‌غدا، ئمجا ئه‌و رووشنهويره‌يل فه‌يليه وه‌خاتر قورتاربوينيان له‌ده‌س سته‌م رژيم پاشايه‌تی رويكردنه جمشته‌يل نه‌ته‌وه‌يی، له‌لايگ تريشه‌و خوازيار ئه‌وه بوين ك له قه‌واره‌ی كاريگه‌رييان فيشتره‌و بكه‌ن لو وجوود نه‌ته‌وه‌يی و رووشنهويری و مێژوويی خوه‌يان له‌ڕی نموونه‌يل ئه‌فسووناوی له داستانه‌يل كويه‌ن و تازه‌يان تا ريڕه‌و سه‌روه‌خوه‌يی يا به‌شداری راسكانی كورد له ده‌سڵات بارنه ده‌س.
كاردانه‌وه‌ی ئه‌وسای رژيم پاشايه‌تی فريه سه‌خت بوی له وه‌رانوه‌ر جمشت نه‌ته‌وه‌يی كوردی له عراق وه تايبه‌ت له چالاكيه‌يل كورد فه‌يلی. له‌و سياسه‌ته‌يليشه ك له‌تی مينه‌ی دوشمنايه‌تی ئاشكرايگ كردياد وه‌ل فه‌يله‌يل، ئه‌ويش چه‌واشه‌ی كردوه‌يل وه‌رينی بوی و نموونه‌يش له‌بان ئه‌و كرده‌وه‌يله ئه‌وه بوی ك ئه‌را يه‌كه‌مجار له مێژوو عراق ئه‌و رژيمه به‌ڵگه‌نامه‌يل عراقی له دكتۆر جه‌عفه‌ر محه‌مه‌د كه‌ريم زه‌فت كرد وه بوونه‌ی هوير و ڕای ملله‌ت كورد ئه‌را جمشت ئازاديخواز نه‌ته‌وه‌يی و به‌شداری گه‌ورای ئی پيكهاته له‌تی و له‌و جمشته‌يل چه‌په ك ده‌ركه‌فت له‌و رووژگاره، ئمجا ئی دو لايه‌نه ڕی دانه كورده‌يل فه‌يلی پيشينه بوون له ليست خه‌بات و له ئاكاميش سته‌مكردن له‌ی پيكهاته وه ئاشكرا ئه‌نجام درياو يه‌يش مه‌سه‌له‌يگ حاشا هه‌ڵنه‌گره له‌و سه‌رده‌مه‌و كه‌س ئنكاری ناكا، وه‌ل ئه‌وه‌يشا رژيم له‌و رووژگاره شيوازه‌يل تريش له زوڵم و سته‌م هاورده كار ده‌رهه‌قيان و له‌وانه‌يش مه‌سه‌له‌ی ره‌گه‌زنامه وه ته‌به‌عيه‌ی ئيرانی و عوسمانی، ك ئی پلانيشه زويتر دانرياويد دژ ئی پيكهاته.
عراق بيجگه وجوود توانای ئننسانی و دارايی فريه‌يگ، وه‌لی وه‌ل ئه‌وه‌يشا باريگ سياسی يا رووشنهويری سه‌قامگير نه‌ياشتگه بگونجيه‌يد وه‌ل قه‌واره‌يا، يه‌يش گشتی هووكار سياسه‌ته‌يل غه‌ڵه‌ت حكوومه‌ته‌يل يه‌ك له‌شوون يه‌كه له‌ی وڵاته، ئمجا ئاساييه ك چين و پيكهاته‌يل كوومه‌ڵگا بگه‌ردنه شوون به‌ديليگ ئه‌را مقه‌يه‌تيكردن له قه‌واره‌ی و قورتاربوين له‌و راسيه ك له‌بانی چه‌سپيا، ك يه‌يش له گرينگترين ئه‌و كيشه‌يله‌سه ك تا ئمڕوويش عراق وه‌ده‌سيه‌و ناڵنيد و تا ئيسه‌يش رووژيگ له رووژان گونجيانيگ سياسی و ئابووری و رووشنهويری له ناونی پيكهاته‌يلی روی نه‌ياگه هه‌ر له سه‌ره‌تای دامه‌زرانن ده‌وڵه‌ت عراقی تا ئيسه، يا وه مانايگ تر ئه‌تويه‌نيم بويشيم هيمان كه‌لين گه‌ورايگ هه‌س له ناونی ئه‌و پيكهاته‌يله.
دوياى جه‌نگ جه‌هانی دويه‌م و كووچكردن يه‌هووديه‌يل و په‌يابوين خوه‌شاڵی له‌ناونی مه‌ردم وه خاتر زيايبوين نيشته‌جبويه‌يل شار و په‌يابوين كار و به‌رزه‌وبوين ئاست كوومه‌ڵايه‌تی له وه‌رانوه‌ر داوه‌زين ئاست سيستم هووزايه‌تی ئه‌وه بوی كورده‌يل فه‌يلی خوازيار بوين نه‌ف له‌ی ده‌رفه‌ته وه‌ربگرن له‌ڕی بوار ئابووری و زيايبوين وجووديان له شار وه‌تايبه‌ت له به‌غدای پايه‌ته‌خت.
دى هه‌ر به‌شداريكردنيگ يا چگن وه‌ناو كاريگ ئابووری و سياسی و رووشنهويری بی كيشه‌و مه‌ترسی نه‌ويه، ك هه‌ر له‌وه‌ر ئه‌وه‌يش دويای ماوه‌ی كه‌ميگ مه‌ينه‌تی و نواگيری دژ فراوانبوين هه‌وڵ كورده‌يل فه‌يلی ده‌س وه‌پيكرد له‌لايه‌ن رژيم پاشايه‌تی و ره‌فتاری ئاست چالاكيه‌يل ئی پيكهاته وه‌رنه‌گرت له گشت بواره‌يل وه‌تايبه‌ت دويا چووڵكردن مه‌يدانه‌گه له‌لایه‌ن يه‌هووديه‌يل و له‌لايگ تريشه‌و ته‌نانه‌ت ئه‌و وه‌رپرسه‌يل عراقييشه ك سه‌ر وه رژيم سه‌رمايه‌داری بوين جورئه‌ت ئه‌وه نه‌ياشتن ئی چالاكيه‌يل ئابووريه له‌لايه‌ن فه‌يليه‌يله‌و قه‌بوول بكه‌ن، ئه‌وه بوی ك فه‌يليه‌يل كه‌فتنه خوه‌يان و له‌و مه‌ترسيه‌يله كه‌مه‌و كردن له‌سای ئه‌زموون كه‌سه‌يل تر جوور يه‌هووديه‌يل و بوينه خاوه‌ن پيشه‌و دارايی، ك يه‌يش له‌يوا كرد ته‌ماح وه‌پيان بكريه‌يد. دی له‌ڕاسی هه‌ر وه‌ختيگ ئاست و كاريگه‌ری و به‌شداری ئاشكرایگ له سياسه‌ت و ئابووری فيشتر بوياتاد دوشمنايه‌تيكردن فه‌يليه‌يل فيشتره‌و بوياد، چوينكه ئاڵشتكاری له سيستميگ باو هووزايه‌تی ئه‌را سيستميگ ده‌وڵه‌ت ده‌زگايه‌تی هويچ ديديگ له‌وه‌رانوه‌ريان ئاڵشت نه‌كرد و سه‌رده‌م قه‌بوولكردن و ژيان هاوبه‌ش له كوومه‌ڵگا ئاڵشت نه‌كرد و كيشه‌يل بنه‌ڕه‌تی ميراتگه‌ر ئه‌وه‌ز نه‌وی هه‌ر سه‌ره‌تای دامه‌زرانن ده‌وڵه‌ت عراقی و له‌وانه‌يش واين و وه‌جيهيشتن ئاوايه‌يل وه بوونه‌ی زيايبوين ريژه‌ی فه‌قيری و بيكاری و نه‌خوه‌نه‌واری له ناوچه‌يل خوه‌رهه‌ڵات دجله.
ئمجا ئايا ئه‌دێ گوزه‌يشته‌ی كورده‌يل فه‌يلی جوور ده‌سكه‌فتيگ ئه‌رايان هساو بكريه‌يد؟ ئه‌و هووكاره‌يله چه بوی ك بويه هووكار ليژكردن پايه‌يان؟ ئه‌ويش وه ئه‌وه‌ك ئمڕوو كه‌سه‌يليگ هه‌ن ك ئاماده بدێ ئه‌را خه‌ڵاتكردنيان له‌بان گوزه‌يشته‌يان و پرسياره‌يل فريه‌يگ هه‌س له‌ی باوه‌ته‌و، ك به‌شيگ له‌لی قوناغه‌يل دياريكرياگ له مێژوو جواوی ئه‌ياد و به‌شيگيش له‌لی لايه‌نيگ نيه جواوه‌گه‌ی بگريده خوه‌ی.
سوندس ميرزا
ج . أ
