قه‌ڵایه‌یل به‌عس یه‌ك له‌ شوون یه‌ك ڕمیه‌ن

شفق نيوز

پشتگیرى له‌ لایه‌ن بڕیگ له‌ ده‌زگایه‌یل مخابه‌راتى جه‌هانى، سه‌ركوتكردن و كوشتن و تیرۆر و ملهوڕى كردنه‌ پیشه‌یان، و له‌خوه‌یانه‌و ئه‌یه‌ تاكه‌ ڕیگه‌یگه‌ ئه‌را مه‌نین و وه‌رده‌وامبوینیان له‌ بان ته‌خت حوكمدارى، و بازى كردن وه‌ سه‌روه‌ت و سامان ملله‌ته‌یلیان و ملله‌ته‌یل ناوچه‌گه‌یش.

به‌عسیه‌یل حكومدار له‌ سووریا و عیراق وه‌ ئه‌وپه‌ڕ ورده‌كاریه‌و ئه‌و قسه‌ جیوه‌جیكردن ك ئویشى (ئه‌گه‌ر وه‌لما نه‌وید، دژمنمید) و وه‌ى جووره‌ هه‌رچى هێزه‌یل نیشتمانى و دیموكراتیه‌ سه‌ركوتكردن وه‌ تیرۆركردن سه‌ركرده‌یلیان و زندانیكردن سه‌دان و هه‌زاران له‌ ئه‌ندام و لایه‌نگره‌یلیان له‌ زندانه‌یل ترسناكیان، و فشارخستن وه‌ گشت شیوه‌یگ وه‌بان بنكه‌یل جه‌ماوه‌رییان تاگه‌ر واز له‌ پارت و ڕیكخریایه‌یلیان بارن، تاگه‌ر مه‌یدان سیاسى، له‌ هه‌رچى ده‌نگ ئازاد و دیموكرات شه‌ریفانه‌، چووڵ بكه‌ن ك شایه‌ت بوونه‌ سه‌رچاوه‌یگ مه‌ترسى له‌ بان ڕژیمه‌یل دیكتاتۆرى و شۆفینییان.

به‌عسیه‌یل له‌ سووریا و عیراق، ملله‌ت كورد سه‌ركوتكردن وه‌ ڕیگه‌ى جیوه‌جیكردن سیاسه‌ت ته‌عریب و ته‌بعیس و كووچوه‌پیكردن، تا ڕه‌سینه‌ خستن ڕه‌گه‌زنامه‌گه‌یان تا ئى ملله‌ت سه‌روه‌ر و ئازاده‌ له‌ ساده‌ترین ماف و هه‌قه‌یل ئاده‌میزاد ناهمى بكه‌ن.

له‌هه‌مان وه‌خت به‌عسیه‌یل له‌ عیراق و سووریا وه‌ شیوه‌یگ وه‌حشیانه‌ پارته‌یل ئسلامى، جوور ئیخوان مسلمین و پارت ده‌عوه‌ى ئسلامى، سه‌ركوتكردن؛ ئه‌وه‌ بیجگه‌ پارته‌یل چه‌پڕه‌و و دیموكراتخواز، ك ئه‌وسا بنكه‌یگ جه‌ماوه‌رى داشتن و جووریگ له‌ مه‌ترسى بوین له‌بان سیاسه‌ته‌یل به‌عس.

ڕژیم به‌عس له‌ سووریا ناوچه‌ى جۆلان كرده‌ خه‌ڵات ئه‌وه‌گ ناوى ناوید دوشمن زایۆنیستى و له‌ عیراقیش به‌عس نیمه‌ى ئاو شه‌تولعه‌ره‌ب و كێڵگه‌ یا حه‌قله‌یل نه‌فتى بان سنوور وه‌خشیه‌ ئیران و كوه‌یت له‌ ئاكام جه‌نگه‌یل ملهوڕانه‌ و سیاسه‌ته‌یل سه‌رشیتانه‌ى... و له‌ ئان جه‌نگ ناوخۆ له‌ لوبنانیش حزب به‌عس له‌ عیراق پشتگیرى وكوومه‌ك میلیشیایه‌یل به‌عسى كرد دژ وه‌ هێزه‌یل نیشتمانى و بویه‌ خوینى سه‌دان كه‌س لوبنانى و له‌ شوون ئه‌وه‌یش ك جه‌نگه‌گه‌ وسیاوه‌ ئاشكرا بوى ك به‌عس سووریا چوین ده‌س خستیه‌سه‌ ناو كاروبار لوبنان و مخابه‌رات سوورى له‌ لوبنان وه‌ هاوكارى وه‌ل جاسووسه‌یلیانه‌و چ تاوانه‌یل وه‌حشیانه‌یگ دژ وه‌ ملله‌ت لوبنان ئه‌نجام دا و دویاتاوانیشى به‌شداریكردنى له‌ تیرۆركردن ره‌فیق حه‌ریرى وه‌گووره‌ى راپۆرت و هه‌واڵه‌یل بى لایه‌ن، ئه‌وه‌ بیجگه‌ ئه‌و ڕمیان و ویرانیه‌ ك تویش هه‌ردوگ ئابوورى عیراق و سووریا هات و كه‌مه‌وبوین ئاست خزمه‌تگوزارى و دویره‌وخستن هه‌ردوگ ملله‌ت عیراق و سووریا له‌ كاروان پیشكه‌فتن و په‌ره‌سه‌ندن له‌ گشت مه‌یدانیگ.

له‌ ئاكام ئه‌و سیاسه‌ته‌یل خویناوى و تاوانه‌یل گه‌ورا ك به‌عس له‌ فره‌ له‌ وڵاته‌یل عه‌ره‌بى جوور مۆریتانیا و یه‌مه‌ن و سودان و ته‌نانه‌ت چه‌ن وڵاتیگ خه‌لیجییش ئه‌نجامى دا، ڕیڕه‌و یا نه‌هج تاوانبارى پارت به‌عس وه‌ى جووره‌ دى وه‌ل چه‌مك یا مه‌فاهیم و بنه‌ما و بنه‌ڕه‌ته‌یل نوو له‌ جه‌هان شارسانى نه‌گونجیا له‌ لایه‌نه‌یل ئازادى و دیموكراتى و ماف یا هه‌ق ئاده‌میزاد، و یه‌یشه‌ هیشت ك كوومه‌ڵگاى ناوده‌وڵه‌تى له‌ ژیر فشار ڕاى گشتى هه‌وڵ بیه‌ید ئه‌را ڕمانن ڕژیم به‌عس له‌ عیراق وه‌ ڕیگه‌ى ئۆپه‌راسیۆنه‌یل سه‌ربازى و ئه‌و بوى ك ڕووژ 9 نیسان 2003 بویه‌ ڕووژ یه‌كلاكردن، وه‌ختى هێزه‌یل هاوپه‌یمانى ناوده‌وڵه‌تى هاتنه‌ ناو به‌غدا و ڕژیمه‌گه‌ى ڕمانن ك زیاتر له‌ سێ ده‌یه‌ وه‌ زوور سه‌خت حوكم عیراق كرد و ئى سه‌رده‌م سیه‌ى پڕ له‌ ژانه‌ بویه‌ به‌شیگ له‌ تاریخ عیراق ك ملیۆنه‌ها كه‌س له‌ ڕووڵه‌یل ملله‌ت عیراق و ناوچه‌گه‌ و جه‌هان بوینه‌ قوربانى.

ئمڕوویش له‌ ساى ئه‌و گۆڕانكارى و شووڕشه‌یله‌ ك له‌ لایه‌ن ملله‌ته‌یل له‌ وڵاته‌یل عه‌ره‌بى دژ وه‌ ڕژیمه‌یل دیتكاتۆرى و سه‌ركوتكه‌ر به‌رپاكریاس، ڕژیم سووریایش خه‌ریكه‌ وه‌ره‌و نه‌مان چوود و چه‌ن ڕووژیگى مه‌نیه‌ تا ملله‌ت سووریا و ملله‌ته‌یل ناوچه‌گه‌ ئاهه‌نگ ڕمیانى سازبیه‌ن؛ وه‌ ڕمیان دیكتاتۆریه‌ت به‌عس و ئه‌سه‌د، له‌ شوون چل ساڵ له‌ كوشتن و بڕین و ویرانكارى و ورسى كردن ملله‌ت سووریا، له‌ هه‌مان وه‌ختیش دوینیمن ك ڕژیم عه‌لى عه‌بدوڵلا سالح ك تاوانه‌یل پیسیگ دژ وه‌ ملله‌ت یه‌مه‌ن ئه‌نجام داس و تاقمه‌یل تاوانبار به‌عسى گردیه‌سه‌ خوه‌یه‌و ك له‌ چنگ ملله‌ت هه‌یواینه‌، و پشتگیرى له‌لیان كه‌ید و ڕیكیان خه‌ید و چه‌كداریانه‌و كه‌ید تا كلیانه‌و بكه‌ید ئه‌را عیراق، ئه‌را كوشتن عیراقیه‌یل وه‌ سه‌یاره‌ى مفخخه‌ و عبوه‌یل لكیاى و تیرۆركردن ك به‌شیگه‌ له‌ ڕیڕه‌ به‌عس و وه‌چه‌و خشاننیگ وه‌ناو ڕویدایه‌یل یه‌مه‌ن ئه‌وه‌ ئاشكرابوود ك ڕژیم ساڵحیش خه‌ریكه‌ دویاهه‌ناسه‌یل خوه‌ى مژید، له‌وه‌رده‌م ئه‌و جه‌ماوه‌ر ملیۆنى تویڕه‌ و ڕماننى فره‌ نزیكه‌و بویه‌ و قه‌ڵایگتر له‌ قه‌ڵایه‌یل به‌عس له‌ ناوچه‌گه‌ خه‌ریكه‌ بڕمیه‌ید، له‌ شوون ڕمیان تاقمه‌یل ئه‌سه‌د له‌ سووریا له‌ ئاینده‌یگ فره‌ نزیك.

 

ن: جه‌واد كازم