تاريخ عراق له‌ ته‌ركه‌ى ماتۆڕسواریگ

شفق نيوز

  ساڵه‌یل دویر و دریژیگه‌ ئى خاك عراقه‌ بوو خوین له‌لى ئه‌یادو كوشت و كوشتار له‌تى نائومید و ناڕه‌حت ملله‌ته‌ جه‌وركیشه‌گه‌ى كردگه‌، وه‌تایبه‌ت له‌ى ساڵه‌یل دویاخریشه‌ ك سه‌ربڕین و خوینڕشانن مه‌ردمه‌یل فریه‌یگ بیتاوان بویه‌ هووكار ئه‌وه‌ك خیزانه‌یل فریه‌یگ له‌ شوون ماواى خوه‌یان كووچ بكه‌ن وه‌ره‌و شوونه‌یل تر.

دویاى 35 ساڵ له‌ كوشتن و بڕین و بى سه‌روشوونكردن روڵه‌یل ئى وڵاته‌ له‌لایه‌ن رژیم سته‌مكار به‌عس ك هه‌میشه‌ دژ ئنسانیه‌ت و هه‌قه‌یل ئاده‌میزاد بوى و ده‌سڵات خوه‌ى وه‌ زوور چه‌سپان، ئیسه‌یش هه‌مان ریڕه‌و ئه‌و رژیم رمیاگه‌ گریاسه‌وه‌ر له‌ سه‌رده‌م ئازادى و دیموكراسى وه‌لى وه‌ شیوه‌یل جیاجیا.

وه‌رجه‌ ماوه‌ى كه‌میگ له‌ ته‌ركه‌ى ماتۆڕسواریگ ك عومرى له‌ ناونى 45 تا 50 ساڵان بوى، گووش ئه‌را قسه‌یلى شل كردم له‌وه‌ختیگ ك باس له‌ تاریخ عراق و داخ دڵ خوه‌ى كرد، زانستم ك وه‌ دریژایى ژیانى هویچ خه‌یریگ له‌ى عراقه‌ نه‌یه‌و رووژگاره‌یل ژیانى وه‌ تكه‌پاو به‌دبه‌ختى برده‌سه‌ سه‌ر ، ئنجا باس له‌وه‌ كرد ك سیاسه‌ت ئه‌وساو ئیسه‌ى رژیمه‌یل عراق هه‌میشه‌ چه‌فت و چه‌واشه‌كار بویه‌ له‌ هه‌ناى مه‌ردم بیده‌سڵات و گشت حكوومه‌تیگ هه‌ر هه‌وڵ ئه‌وه‌ دانه‌ وه‌ زوور جڵه‌و ده‌سڵات بگرنه‌ ده‌س و دى هویچ هساویگ ئه‌را ژیان هاوبه‌ش و ئنسانى نه‌كریاگه‌ له‌وه‌ختیگ ك ده‌سڵاتدار شوونى بته‌و بویه‌و هیز ته‌كڕه‌وى و تونڕه‌وى دروس كردگه‌.

بیگومان ئى عراقه‌ وه‌رده‌وام له‌ڕوى سیاسه‌ته‌و ئه‌را به‌شیگ له‌ مه‌ردم چه‌واشه‌كار پڕ له‌ درامه‌ت بویه‌و ئه‌را به‌ش فریه‌یگیش له‌ مه‌ردمه‌گه‌ى ژان سه‌خت بویه‌، سیاسه‌ت له‌ عراق هه‌میشه‌ وه‌خاتر كۆنترۆڵكردن مه‌ردم و ترس و توقانن كوومه‌ڵگا بویه‌ نه‌ك له‌وه‌ر خاتر به‌رژه‌وه‌ندى گشتى و ئنسانى.

ئه‌گه‌ريش لايگه‌و له‌ تاريخ كويه‌ن ئی وڵاته‌ بكه‌يمنه‌و يا لاپه‌ڕه‌يلی به‌يمنه‌ يه‌كا، ئه‌وه‌ ئه‌رامان ده‌ركه‌فيد ك له‌وسا تائيسه‌ هويچ پيشكه‌فتنيگ له‌ڕوی سياسه‌ته‌و ناته‌سه‌ وجوود و هه‌ر فه‌رمانرِه‌وايگ جڵه‌و ده‌سڵات وه‌ده‌سيه‌و بوی وژدانی ڕی وه‌پی نه‌ياگه‌ له‌ خزمه‌ت ملله‌ته‌گه‌ی بوود مه‌گه‌ر وه‌ ريككه‌فت جاروباريگ كرده‌وه‌ی ئنسانييگ ده‌رهه‌ق ئی كلله‌ت سته‌مديده‌ ئه‌نجام داويد، وه‌نا هه‌ميشه‌ له‌ هه‌وڵ كه‌وڵكردن و مه‌ويسيكردن عراقيه‌يل بوينه‌ له‌سای خه‌ير و به‌يره‌گه‌ی و ئه‌و ته‌خت ده‌سڵاته‌ ك وه‌هه‌ر زوڵم و سته‌ميگ مقه‌يه‌تی له‌لی كردگه‌.

دیار حه‌مید

ج . أ