ئه‌ندام په‌رله‌مان

شفق نيوز

  وه‌ختاى وتیایم پڕچه‌ككردن سوپاى عراق مه‌ترسیداره‌، ئه‌وه‌ له‌ ئه‌زموون دویر و دریژ كورده‌و دروس بوید، ك له‌ ماوه‌ى دروسكردن ده‌وڵه‌ت وه‌ زوور لكیاگ عراق و له‌ژیرده‌س سوپاى ئه‌و وڵاته‌ ناڵانیاد ك هه‌میشه‌ ته‌ماشاى كورد جوور دوشمن و خاك كوردستانیش جوور خاك عه‌ره‌ب كردیاد.

ئه‌و سوپا هه‌ر له‌سه‌ره‌تاى دامه‌زراننى ئه‌را تاواننه‌وه‌ى پیكهاته‌یل جیاجیاى نیشته‌جى عراق دامه‌زریاوید، ك له‌شوون ئه‌و تاریخ پڕ له‌ تاوان و خوینه‌ ده‌ركه‌فت ك سه‌ركه‌فتگ نه‌وى.

ئنجا هه‌رچه‌نى دویاى رمیان رژیم دیكتاتۆر سه‌دام ك دریژه‌ده‌ر رژیمه‌یل وه‌رجه‌ خوه‌ى بوى، چوینكه‌ هه‌مان ئه‌قڵیه‌ت و ئه‌راى چوین كویه‌نه‌په‌رسى و دویاكه‌فتگ هه‌ر وه‌رده‌وام بوى و تون وتیژییش له‌لایه‌ن سوپاو رژیمه‌و رووژ وه‌ڕووژ خویناوى تر و دڕنده‌ تر بویاد، وه‌لى له‌ ناوه‌ڕوكه‌و هه‌ر ئه‌و سیاسه‌ته‌ بوى ك حكوومه‌ته‌یل یه‌ك له‌ شوون یه‌ك عراق ئه‌را سوپاگه‌ وه‌ وه‌رده‌وامى په‌یڕه‌وى كردیان.

وه‌لى دوینید له‌شوون لاوردن سوپاى عراق له‌لایه‌ن ئه‌مریكیه‌یله‌و، جاریگ تر دامه‌زریاو هه‌مان هویر و ئه‌ڕاى چوین و بى متمانه‌یى وه‌ سستم تازه‌ گرته‌ خوه‌ى ك جوور بانگه‌وازیگ ئه‌راى كریا ك بایه‌س بوى دیموكراسى و فره‌یى و په‌رله‌مانى و فیدراڵى بوود، ك یه‌یش له‌ ده‌ستوور نویسیاگه‌، وه‌لى هه‌ر زوى ده‌ركه‌فت ئه‌و ئه‌قڵیه‌ته‌ ئاڵشت نه‌ویه‌و هه‌ر وه‌رده‌وامه‌.

ته‌ماشاى پیكهاته‌ى سوپاى عراق بكه‌و بزان ریژه‌ى كورد له‌تى چه‌نیگه‌، ئه‌وه‌سه‌ ئیسه‌ تازه‌ تازه‌ ئه‌ندامیگ په‌رله‌مان له‌بان لیست هاوپه‌یمانى نیشتمانى داوا له‌ سوپاى عراق ئه‌كا ك چوین وه‌ پاریزگاى ئه‌نبار كردگه‌ وه‌و جووریشه‌ وه‌ هه‌ولێر بكا.

ئه‌و ئه‌ندام په‌رله‌مانه‌ ئویشید بایه‌سه‌ سوپا په‌لامار هه‌ولێر و مه‌رزه‌یل كوردستان داگیر بكاو ته‌یاره‌یل جه‌نگى و هێلیكۆپته‌ر باریده‌ كار و وه‌ زوور چه‌ك و سه‌رباز نه‌یلید نه‌فت كوردستان ره‌وانه‌ى ده‌یشت بكاو له‌هه‌مان وه‌خت ئویشید: ئه‌وه‌ نه‌فت كورد نیه‌ نه‌فت عراقه‌.

ئیچنه‌ هویر و ئه‌ڕاى چوینه‌ چ جیاوازییگ دیرید وه‌ل كرده‌وه‌یل عه‌لى حه‌سه‌ن مه‌جید ئه‌را كیمیاواران و نه‌فالكردن كورد، ئه‌وه‌سه‌ كه‌میگ هیز په‌یا كردنه‌ داوا له‌ سوپاگه‌یان كه‌ن خوه‌ى ئه‌را جه‌نگیگ تر ناپیرووز ئاماده‌ بكا وه‌رانوه‌ر كورد، هه‌ر وه‌و خاتریشه‌ ئویشم: ناهه‌قمان بوى ك گومان له‌ هاوردن ئه‌و چه‌كه‌یل عراقه‌ كردیایم، ئه‌ندام په‌رله‌مان له‌جیاى ئه‌وه‌ك داواى ئاشتى و ئازاداى و ژیان هاوبه‌ش و فیدراڵیه‌ت بكا، بژنه‌ف و بزان داواى چه‌ ئه‌كا.

سه‌لام عه‌بدوڵڵا

ج . أ