كوردستان باوش ئه‌را ئاواره‌یل ئه‌نبار ئه‌كاده‌و

شفق نيوز


خه‌وه‌ره‌گان باس له‌وه‌یش كه‌ن ، تائیسه‌ گه‌رما و تیه‌نگی و برسیه‌تی بوێه‌سه‌ بایس مه‌رگ ژماره‌ێگ مناڵ و ژن و پیاگ پیر.

وه‌گوره‌ێ خه‌وه‌ره‌یل ، سه‌ركردایه‌تی كورد داوا له‌حكومه‌ت مه‌ركه‌زی كردگه‌ ئاسانكاری بكه‌ێگ ئه‌ڕا كل كردن ئه‌و ئاواره‌یله‌  ئه‌ڕا هه‌ریم كوردستان و وه‌ی جوره‌ كورد جواو خاسى مردم ئه‌نبار داسه‌و ، وه‌ختێ ڕژیم دكتاتوری به‌عس له‌ ساڵ 1975 هاوڵاتیه‌یل كورد له‌شار و ئاوایه‌یل خوه‌یان وه‌زور ده‌ركرد و ماڵه‌یلیان ڕمان و له‌و وه‌خته‌ ، مه‌ردم ئه‌نبار پێشوازی له‌ ئاواره‌یل كورد كردن و قاپی ماڵه‌یلیان ئه‌ڕایان واز كردن تا له‌ ڕه‌نج ومه‌ینه‌تیان و ژان غه‌ریبییان كه‌مه‌و بكه‌ن.

وه‌ێ ڕه‌فتار ئنسانی ملله‌ت كورده‌ ، موعاده‌له‌ێ ئنسانی و نیشتمانی له‌ ناونی دڵپاكی و ئنسان دوسی و نیشتمانپه‌روه‌ری كورد و مه‌ردم ئه‌نبار تێه‌یگه‌ دی  له‌ كاره‌ساتێگ و محنه‌تێگ ك 40 ساڵ وه‌رجله‌ ئیسه‌ دوچار كورد هات و یه‌یش وه‌شێوه‌ێ پراكتیك  پره‌نسیپ وه‌ێه‌كه‌وه‌ ژیان و یه‌كسانی له‌ ناونی پێكهاته‌ێ ملله‌ت عراق چه‌سپنێگ.

مه‌ردم ئه‌نبار ئمڕوژه‌ كه‌فتنه‌سه‌ به‌ین زور و زولم سته‌م داعش له‌ لاێگ و حكومه‌ت عراقی له‌ لاێگتر ك نواگیری كه‌ێگ له‌ هاتنیان ئه‌ڕا به‌غدا و له‌ێ بارودوخ ناله‌ باره‌ كومه‌كیان نیه‌كه‌ێگ.

گامه‌یل ئنسان دوسانه‌ێ سه‌ركردایه‌تی هه‌ریم كوردستان ئه‌را قورتار كردن ئاواره‌یل ئه‌نبار ، داكوكیه‌ له‌ بان چه‌سپانن دیدگاێ كومه‌ڵگاێ ناوده‌وڵه‌تی و ڕێكخراوه‌ ئنسانیه‌ ناوده‌وڵتیه‌گان ك هه‌میشه‌ ستایش هه‌ڵویست و ڕه‌فتار كورد كه‌ن له‌ وه‌راوه‌ر پێكهاته‌یل نه‌ته‌وه‌یی و ئاینی و مه‌زه‌وی عراقی ، له‌ ڕێ پێشوازی كردن له‌ سه‌دان هه‌زار ئاواره‌ێ عه‌ره‌ب موسلمان و مه‌سیحی و سابئه‌ و سه‌رجه‌م پیكهاته‌یل ملله‌ت عراق و فه‌راهه‌م كردن ژیان ئاسوده‌ ئه‌ڕایان وه‌تایبه‌ت له‌ شوون ئه‌وه‌گ داعش شار و ئاوایه‌یلیان داگیر كردگه‌ و هه‌ڕه‌شه‌ له‌ ژیانیان كه‌ێگ.

بێ گومان ملله‌ت كوردستان وه‌ی ڕه‌فتار ئنسان دوسانه‌یانه‌ ، نیشان ده‌یگ ك باوه‌ڕ وه‌ گوفتگوی فه‌رهه‌نگى و ژیاری و ڕێز گردن له‌ ئاین و باوه‌ڕه‌یل سه‌رجه‌م پیكهاته‌یل ملله‌ت عراق دێرێ.

ئاراس جه‌باری

ج ك