وڵاتيگ له‌ وه‌رده‌م هه‌ڕه‌شه‌ی نه‌رميگ

شفق نيوز

هه‌واڵه‌يل چه‌ن رووژ گوزه‌يشت مايه‌ی سڵكردنه‌، ك له‌شوونيگ برايگ دو برای خوه‌ی كوشيد و مێرمناڵيگيش دويه‌ت و دايگيگ ئه‌كاده‌ قوربانی و برايگيش وه‌ چه‌قوو ئه‌روای براگه‌ی ئه‌كيشيد و پياويگ براژن خوه‌ی وه‌ ده‌مانچه‌ كوشت و دو كه‌س تر وه‌ جه‌نگه‌ چه‌قوو گيان له‌ده‌سدان.

گشت ئه‌يانه‌ هه‌واڵ دو رووژ ماڵپه‌ڕ و ميديايه‌يل كوردستان بوين ك وه‌خوين سه‌ردييه‌و جوور هه‌واڵيگ ئاسايی گوزه‌ر ئه‌كه‌ن وه‌بی ئه‌وه‌ك كوومه‌ڵگا باريده‌ جووش و وه‌بی ئه‌وه‌ك ئه‌و پرسياره‌ دروس بكا ك ئی تون وتيژيه‌يله‌ چه‌ن يه‌قه‌ی كوومه‌ڵگای كورده‌واری گرتنه‌.

ئايا ئه‌و مه‌رزه‌يله‌ ك ريگری له‌ تاوان ئه‌كه‌ن وه‌و راده‌ كاڵه‌و بوينه‌ ك مه‌ردم سڵ له‌ ئه‌نجامداين تاوانه‌ نه‌كه‌ن؟ بايه‌سه‌ ئاگادار بويمن له‌وه‌گ هايمنه‌ وه‌رده‌م هه‌ڕه‌شه‌ی نه‌رميگ، هه‌ڕه‌شه‌يگ ك له‌ڕاسی له‌ گشت گرفت و قه‌يرانه‌يل فيشتر كاريگه‌ری ديريد له‌بان ئاينده‌ی كوومه‌ڵگای كورده‌واری.

ئاده‌ميزاد جوور گيانله‌وه‌ريگ وه‌و جووره‌ دروس بويه‌ ك مه‌يله‌و شه‌ڕه‌نگيزيه‌، ئمجا ئه‌وه‌ك له‌يوا ئه‌كا ری له‌ دڵڕه‌قی و تاوانه‌يل ئاده‌ميزاد بگريد، ئه‌ويش ياساو رينمايه‌يل كوومه‌ڵگان ك چوارچيوه‌ و مه‌رز ئه‌را ره‌فتار ئاده‌ميزاده‌يل دانه‌ن، ك ئيسه‌ چوارچيوه‌ و مه‌رزه‌يل كوومه‌ڵگای كورده‌واری ها له‌وه‌رده‌م مه‌ترسی فراوانتر كاڵه‌وبوين.

ئه‌وه‌ك له‌يوا ئه‌كا لايه‌ن دڵڕه‌قی و ره‌فتار دڕندانه‌ له‌ خوه‌مان نه‌يليم، ترسه‌. ترس له‌ سزای خوداوه‌ند، ترس له‌ كوومه‌ڵگا، ترس له‌ خيزان، ترس له‌ ده‌سڵات و ياساو سيستم دادوه‌ری.

ئيسه‌ فريه‌ن ئه‌وانه‌ك له‌ وڵات ئيمه‌ ره‌حم خوداو ترس خوداوه‌ند له‌ دڵيان نه‌مه‌ندگه‌، فريه‌ن ئه‌وانه‌ك ترس ئاوڕوی چگن ناو كوومه‌ڵگا نه‌يرن و هويچ وه‌ختيگ ريز و حورمه‌ت له‌ خيزان و سه‌رگه‌ورای ماڵ ناگرن، ئه‌ويش حاڵ ده‌سڵات دادوه‌ری و سه‌روه‌ری ياساس ك مه‌ردمان فريه‌يگ تاوان ئه‌نجام ئه‌يه‌ن و له‌سزای ياسا قورتار بوون و نوڕيد وه‌ دزييه‌و له‌پاڵ په‌نای هيز و ده‌سڵاته‌يل يا وه‌ سوڵح كوومه‌ڵايه‌تی و هيز پويل قاپی زيندان له‌ليان واز ئه‌كريه‌يد، ك يه‌يش هه‌ڕه‌شه‌يگ مه‌ترسيداره‌ ئه‌را بردن كوومه‌ڵگا وه‌ره‌و تون وتيژی و ئاراسته‌ی ژيان كوومه‌ڵايه‌تی وه‌ره‌و ئاقبه‌ت دڕندانه‌.

له‌يرا ئه‌ركيگ گه‌وراو گرينگ ئه‌كه‌فيده‌ بان دامه‌زرياگه‌يل ك وه‌پله‌ی يه‌كه‌م ده‌سڵات دادوه‌ری و دويای ئه‌ويش دامه‌زرياگه‌يل په‌روه‌رده‌يی و ره‌ساننه‌يل و مه‌لاو مزگفته‌يل، ك وه‌رجه‌ گشت چشتيگ له‌ ئاقبه‌ت ئه‌و مه‌ترسيه‌ بفامن و نه‌خش داشتوون له‌ هه‌ڵوژاردن هه‌ڵبژارده‌يل دروسكردن گرفت له‌وه‌رده‌م په‌ره‌سه‌نديان، ك هه‌ر له‌ئيسه‌و زه‌مينه‌يل سياسی و كوومه‌ڵايه‌تی كوومه‌ڵگای كورده‌واری جوور وای شه‌ماڵ چڵه‌يلی له‌رنيده‌و.

عارف قوربانی

ج . أ