بارزانى نه‌مر.. بويچگترين سه‌ركرده‌ى زيندانيكرياگ له‌ جه‌هان

شفق نيوز

بارزانى نه‌مر دروسكه‌ر ئاشتى و دووسى بوى وه‌ل نه‌ياره‌يلى، ك هه‌رچه‌نى له‌ ته‌مه‌ن كه‌متر له‌ سێ ساڵان خريا زيندانه‌يل عوسمانى، وه‌لێ وه‌ل ئه‌وه‌يشا مكوڕ بوى له‌بان دژايه‌تى ترۆر و تون و تيژى، يه‌يش وه‌و مانا ك هه‌ر زوڵميگ هاته‌ تويشى كاريگه‌رى نه‌كرده‌ بان باوه‌ڕ و نه‌ريت و ريڕه‌وى وه‌تايبه‌ت جوور ئه‌وه‌گ له‌ مێژوو دياره‌و له‌ساڵ 1967 فه‌رمايش كردو وت"ئيمه‌ مللتيگيم زوڵمليكرياى و هه‌وڵ ئه‌يه‌ێم ئى زوڵمه‌ لاوه‌يم و جوور ئه‌وه‌گ عه‌ره‌ب و تورك ماف خوه‌يان ديرن، كورديش وه‌و جوور بايه‌سه‌ ماف خوه‌ى وه‌ربگرێد، چوينكه‌ ئه‌يه‌ ماف ره‌واى خوه‌مانه‌".

وه‌ل ئه‌وه‌يشا، وه‌گووره‌ى يادكردن گورجيگ له‌ شريت ژيانى، دوينيم سه‌ركرده‌ى رووحيمان و له‌ماوه‌ى خه‌باتكردنى له‌ كوردستان يا له‌ كۆمار مه‌هاباد يا له‌وه‌خت كووچكردنى وه‌ره‌و يه‌كێتى سۆڤێت ئه‌را ماوه‌ى 11 ساڵ ته‌نيا كار و ئامانجى هه‌ر يه‌كيگ بوى له‌وه‌ر مافه‌يل ملله‌ته‌گه‌ى، ئه‌و پياويگ بوى قسه‌ى بى كرده‌وه‌ نه‌كرد، چوينكه‌ باوه‌ڕى وه‌كيشه‌ى ملله‌ته‌گه‌مان بته‌و بوى و فريه‌يش پشت وه‌خوه‌ى به‌سا و له‌ هه‌مان وه‌خت واقعى و كه‌سيگ ساده‌يش بوى و هه‌ميشه‌ په‌يوه‌نديى وه‌ل مه‌ردم و لايه‌نگره‌يلى جوان بوى و جورئه‌تداريش بوى له‌ داواكارى مافه‌يل ملله‌تيگ ته‌نياو له‌ڕوى وه‌ڕوى بوينه‌وه‌ى دوشمنه‌يل فريه‌ى و هه‌وڵدا ئه‌را كيشه‌گه‌ى و هويچ وه‌خت ئاس و جاڕس نه‌وى له‌ خه‌بات، ئمجا ئه‌گه‌ر گشت ئى پێوه‌ر و سفه‌ته‌يله‌ كوه‌و بكه‌يم كه‌سايه‌تى سه‌ركرده‌ى به‌رزيگ له‌لى دوينيم و بيگومان له‌ى ناوچه‌ ك ئيمه‌ له‌تى ژيه‌يم كه‌سه‌يليگ جوور خوه‌ى ناته‌سه‌ دونيا.

بارزانى نه‌مر ديناميكى بوى وه‌ل لايه‌نگره‌يلى و هه‌ميشه‌ حه‌ماسه‌ت و باوه‌ڕ له‌ دڵ و ئه‌قڵيان كاڵێاد و گشت وه‌ختيگ هاوخه‌ميان بوى وه‌ عزه‌ت و رووحيه‌ت وه‌جه‌ميگه‌و، دى ئيمه‌يش له‌بان كه‌سيگ تر جوور بارزانى نه‌ژنه‌فتيمنه‌و نه‌خوه‌نستيمنه‌ له‌يوا سه‌رده‌يگ وه‌ ئامانج ئاشكرا و پابه‌ندى بته‌و و گونجياگيگ وه‌ل باره‌گه‌و هه‌ميشه‌ ديد و بڕياره‌يليشى واقعى بوى و گووش له‌ كه‌س وه‌رانوه‌ريش گرتيادو موجازفه‌يليشى په‌سه‌نن و مه‌نتقى بوى، زانا بوى، نه‌ف له‌ ئه‌زموون ناسه‌ركه‌فتگ وه‌رگرت، ڕخى له‌ زه‌ره‌د نه‌چى و نه‌كرده‌ى گرفتيگ له‌وه‌رده‌م خوه‌ى، چه‌سپياگ بوى له‌ ديد و باوه‌ڕى وه‌ كيشه‌گه‌ى، له‌گشت چشتيگ بى ئه‌ناز بوى، له‌ سياسه‌تيش باوه‌ڕ وه‌ هاوسه‌نگى داشت و ته‌نانه‌ت له‌ زوورم بڕياره‌يليش گووش له‌ كه‌سه‌يل تر گرتياد، چوينكه‌ باوه‌ڕ وه‌ ديموكراسيه‌ت داشت و ئى سفه‌ته‌يله‌ له‌ ده‌روينمان كاڵى و له‌ خه‌باتيش وتياد: چه‌ك پارچه‌يگ ئاسنه‌ ئه‌را ئه‌و ده‌سه‌ ك هه‌ڵێگرێد و ئه‌و ئاده‌ميزاده‌ ك ئه‌يه‌رێده‌ى كار.

بارزانى سه‌ركرده‌يگ نموونه‌يى بوى وه‌شايه‌تى گشت كه‌سيگ، له‌ وه‌رجه‌ شووڕش ئه‌يلوول و له‌وه‌خت شووڕشه‌گه‌و دوياى شووڕشيش له‌وه‌خت غه‌در و خيانه‌ت ريككه‌فتن جه‌زاير، گشت خه‌ميگ ئه‌وه‌ بوى ى كاروان شووڕش و سه‌ركه‌فتن كيشه‌ى كورده‌ ته‌مام بكا، ئمجا دوياى چوار ده‌يه‌ له‌ هه‌وڵ و خه‌بات ك ئمڕوو له‌لى هاته‌ به‌ر جوور دامه‌زرانن قه‌واره‌يگ سه‌روه‌خوه‌ى گشت ئه‌يه‌ ديد و خه‌بات و به‌رهه‌م ئه‌و شووڕشه‌ بوى.

بارزانى نه‌مر خواستيگ وه‌رگرى له‌ كورد دا پێشمه‌رگه‌و مه‌يل فريه‌يى نه‌ياشت له‌بان هساو مه‌ردمان تر، ئه‌و بوى ك مه‌رز ئه‌را ناكووكيه‌يل هووايه‌تى و ناوچه‌يى دانا، وه‌ هوير و دانايى و ئنسانيه‌ت خوه‌ى سه‌ركرده‌يگ نه‌مر له‌ دڵ يه‌كه‌ يه‌كه‌ى ملله‌ت دامه‌زران و وت: كوردستان نيشتمان گشت كه‌سيگه‌ له‌ هه‌ر پيكهاته‌و ئايينه‌يليگ جياجيا.

دى وه‌ل گشت ئادار و رووژگاره‌يل جياجيا، ساڵياد كووچكردنى ئه‌كه‌فێده‌ هويرمان 1- 3 و له‌داڵگبونى له‌ 14- 3، ئمجا وه‌ل يه‌كه‌وگرتن ئى رووژه‌يليشه‌ ك ئه‌را ده‌يه‌ها ساڵه‌ ياد ئه‌كريه‌ێد پرسياريگ وه‌ ئارامى و ئه‌ه‌قڵانى و مه‌نتقى خوه‌ى ده‌رئه‌خا ك ئه‌ويش ئه‌وه‌سه‌: كام سه‌ركرده‌ى جمشته‌يل يه‌ك له‌شوون يه‌ك كورد كاريگه‌رى فيشتر داشت يا بنه‌ماى به‌ر دامه‌رانن قه‌واره‌يگ سه‌روه‌خوه‌ى كوردى دامه‌زران؟ وه‌ باوه‌ڕم بارزانى نه‌مر ته‌نيا كه‌سيگه‌ ك تواناى گرده‌وكردن گشت مه‌رجه‌يل خواستيگ داشت و جى شانازى هه‌ر ملله‌تيگه‌ له‌ى سه‌ركرده‌ داشتوود ك چشته‌يل فريه‌يگ له‌ليه‌و ياى گرتيم و هيمان له‌بان ريڕه‌و وه‌رده‌واميم و هووكاره‌ى نه‌وه‌يل ئاينده‌يش ئه‌كه‌يم شانازى وه‌پيه‌و بكه‌ن، ئمجا ئيمه‌ چشت گه‌ورايگ ديرێم ك ئه‌ويش بارزانى نه‌مره‌. چوينكه‌ هويچ كيشه‌يگ نه‌وى له‌ شانيه‌تى زياى بكا، به‌ڵكوو كيشه‌گه‌ وه‌ كه‌سايه‌تى و وجوود بارزانى شانيه‌ت په‌يا كردياد. بارزانى له‌ ده‌ور‌ ديد و باوه‌ڕ خوه‌ى گه‌ردياد و جوور تيشك كوردستان لافمان بوى، ك گشت گرفته‌يل جيوسياسى وه‌ كاريگه‌رى ئه‌وه‌و لاوريه‌ێد، ئمجا دى ئه‌وسا له‌ساى‌ سه‌ركرده‌ رووحيه‌گه‌ى له‌داڵگبوين تازه‌يگ‌ ئه‌را ملله‌تيگ ئازادكرياگ نويسيه‌ێد.

عه‌لى حسێن فه‌يلى