سه‌ركرده‌يل كورد نموونه‌يگ بوينه‌ له‌ دڵسووزی

شفق نيوز

كورد رووژگاره‌يل فريه‌يگ له‌بان خاكه‌ دڵگير و داگيركرياگه‌گه‌ی خوه‌ی وه‌ ژان فريه‌يگه‌و ژیاگه‌و هه‌ميشه‌ به‌دبه‌ختى و ماڵویرانى به‌شی بوی، وه‌لی وه‌ل ئه‌وه‌يشا دوشمن سه‌رسه‌خت خوه‌ی ناسيه‌و هويچ وه‌ختيگ وه‌ نامه‌ردی سه‌ر ئه‌رای نه‌چه‌مانگه‌. سه‌ركرده‌يل كورديش ئه‌گه‌ر رووژيگ له‌ رووژان ده‌س خستنه‌سه‌ ناو ده‌س هه‌ر دوشمنيگ ده‌سڵاتدار و داگيركه‌ر، ئه‌وه‌ بيگومان له‌وه‌ر ترس و له‌رز له‌و دوشمنه‌ يا لايه‌نگری ئه‌و دوشمنه‌ يا خوه‌يفرووشتن و ده‌سهه‌ڵگرتن له‌ خاك و ماف ره‌ه‌وای ملله‌ت كورد نه‌ويه‌، به‌ڵكوو له‌وه‌ر به‌رژه‌وه‌ندی و چاره‌سه‌ركردن كيشه‌ی دريژماوه‌ی كورد سته‌مديده‌ بويه‌و هه‌وڵ دبلۆماسيه‌ت و نزيكه‌وكردن كورد بويه‌ له‌ چاره‌نويس و مافه‌يلی.

وه‌لی جی داخه‌ مه‌ردمانيگ له‌يوا زانن ئه‌گه‌ر رووژيگ له‌ رووژان سه‌ركرده‌يگ كورد ريككه‌فتنيگ وه‌ل لايه‌نيگ نه‌يار يا دوشمنيگ جوور حكوومه‌ته‌يل وه‌رين عراق ئه‌نجام داگه‌ وه‌خاتر خوه‌يفرووشتن و شكه‌ستهاوردن بويه‌ وه‌ جمشت رزگاريخواز كوردو هه‌ميشه‌ هه‌وڵ ئه‌وه‌ ئه‌يه‌ن له‌ شانيه‌تيان كه‌مه‌و بكه‌ن!، نه‌خه‌ير هويچ وه‌ختيگ هويچ سه‌ركرده‌يگ كورد ئه‌گه‌ر خاوه‌ن وژدان پاكيگ بويه‌ غه‌در له‌ ملله‌ت خوه‌ی نه‌كردگه‌و زه‌مينه‌سازی ئه‌را دوشمنه‌يل نه‌كرد زه‌فه‌ر له‌ خاك و نيشتمان كورد بارن.

جارجاريگ دوينم له‌بان ماڵپه‌ڕه‌يل كومه‌ڵايه‌تی و رووژنامه‌و گووڤاره‌يل ك بريگ له‌ قه‌ڵه‌م وه‌ده‌سه‌يل كورد وه‌ داوه‌زانن باوه‌ته‌يليگ بيشه‌رمی خوه‌يان ده‌رخه‌ن و دريغی فريه‌يگ ده‌رهه‌ق سه‌ركرده‌يل خوه‌يان ئه‌كه‌ن ك گوايا له‌ سه‌رده‌م وه‌رجه‌ ئازادی عراق جارجاريگ ديدار و دانيشتن وه‌ل وه‌رپرسه‌يل حكوومه‌ت ديكتاتۆر ئه‌وسای عراقی كردنه‌و يه‌يش وه‌ عه‌يبه‌و سه‌رچه‌مانن ئه‌يه‌نه‌ قه‌ڵه‌م، وه‌لی ئيمه‌ ئويشيم سه‌ركرده‌يل كورد وه‌دریژایى تاریخ نموونه‌یگ بوینه‌ له‌ دڵسووزی وه‌رانوه‌ر وه‌ به‌رژه‌وه‌ندی باڵای ملله‌ت و نموونه‌ی ئه‌وه‌يش ئه‌وه‌سه‌ ك ئيسه‌يش سه‌رجه‌م لايه‌نه‌يل يه‌كده‌نگن له‌ وه‌رانوه‌ر حكوومه‌ت به‌غدا ئه‌را مه‌سه‌له‌ی چاره‌نويسساز و به‌رژه‌وه‌نديه‌يل كوردستان ئه‌گه‌ريش زويتر ته‌نانه‌ت وه‌ل حكوومه‌ت به‌عس ديدار و چه‌ه‌وپيكه‌فتنيگيش كرياگه‌، ئه‌وه‌ مانای ئه‌وه‌ نيه‌ ك سه‌ر وه‌ رژيم به‌عس گوڕوه‌گووڕ بوينه‌ يا لايه‌نگر و پشتگير ئه‌و رژيم ديكتاتۆره‌ بوينه‌، به‌ڵكوو ئاشكراس ك هويچ وه‌ختيگ سه‌ركردايه‌تی كورد متمانه‌ وه‌و رژيمه‌ نه‌ياشتگه‌و رووڵه‌يل فريه‌يگ سياسی و سه‌ركرده‌يل كورديش فه‌وتان و كرده‌ قوربان خاك و نيشتمان.

وه‌ل ئه‌وه‌يشا ئيمه‌ حاشا له‌وه‌ ناكه‌يم ك ماوه‌يگ جه‌نگ و ناكووكی په‌يا بوی له‌ناونی حزبه‌يل له‌ كوردستان و له‌ ئاكام ئه‌وه‌يش جه‌نگ ناوخوه‌يی به‌رپا بوی و زه‌ره‌د فريه‌يگ وه‌شان له‌ مه‌سه‌له‌ی پيشكه‌فتن بوار ئاوه‌دانی و سه‌قامگيری حكوومه‌ت و ده‌سوه‌كاربوين دام وده‌زگايه‌يل، وه‌لی يه‌يش مانای ئه‌وه‌ نيه‌ ك ملله‌ت كورد پشت له‌ به‌رژه‌وه‌ندی و خاك و نيشتمانه‌ كويه‌نه‌گه‌ی بكاو بيليد داگيركار وازی وه‌ ئه‌قڵی بكا، ئيمه‌ فريه‌جار ژنه‌فيم ك بوار سياسه‌ت بوار پڕ قويل و سه‌ختيگه‌و هه‌وه‌جه‌ وه‌ سه‌ركرده‌و كه‌سه‌يليگ كاريزما دريد ئه‌را په‌يكردنی، ئمجا هه‌ر به‌رزه‌وبوين و داوه‌زينيگ له‌ سياسه‌تيش ڕی و شوون خوه‌ی ديريد و سياسه‌تمه‌داره‌يل له‌لی زانن و مانای شكه‌ست نيه‌ ئه‌گه‌ر سه‌ردان دوشمنيگ بكريه‌يد وه‌خاتر چوينێتی ريككه‌فتن و ده‌سخستن مافه‌يل ره‌وا، به‌ڵكوو شكه‌ست ئه‌وه‌سه‌ ئيمه‌ی كورد وه‌رده‌وام له‌ ده‌روه‌ده‌ری و ئاواره‌يی بژيه‌يم و نه‌تويه‌نيم بڕه‌سيمنه‌ ئامانجه‌يلمان، ك وه‌و خاتريشه‌ ئويشيم چه‌نيگ خوه‌شه‌ رووشنهويره‌يلمان وه‌بی جياوازی پشت له‌و خوسه‌و كينه‌ت و كيشمه‌كيشه‌يل ناڕه‌واو ناپوخته‌ بكه‌ن و هه‌ر رووژگاريگ له‌ سه‌رده‌مه‌يل گوزه‌يشت وه‌ چه‌و ئه‌رك و هه‌وه‌جه‌يگه‌و بوينن و له‌يوا له‌يه‌كيه‌و نه‌يه‌ن سه‌ركرده‌يلمان له‌تی ره‌فتار و هه‌ڵسووكه‌فتيان ناوه‌جی بويه‌، به‌ڵكوو وه‌ چه‌واشه‌وه‌ ده‌يان ساڵه‌ سه‌ركرده‌يل كورد وژه‌ وژه‌ی خاك كوردستان وه‌ خه‌باته‌و په‌يمانه‌ كردنه‌و له‌لايگه‌و تفه‌نگ شه‌ره‌ف وه‌ شانيانه‌و بويه‌و له‌لايگيشه‌و هه‌وڵ دبلۆماسيه‌ت خستنه‌سه‌ كار ئه‌را سه‌رخستن كيشه‌ی ملله‌ته‌گه‌يان و نه‌بايه‌د سووكايه‌تی وه‌و هه‌وڵ و ته‌قلايه‌يله‌ بكه‌يم و بايه‌سه‌ له‌ بانمان حورمه‌ت ئه‌را ئه‌و مه‌ينه‌تی و شه‌كه‌تيه‌ دابنه‌يم ك ئه‌وان وه‌پيه‌و خه‌ريك بوين.

ره‌نجده‌ر ئاواره‌