ئايا ٩ خاڵه‌گه‌ی ده‌سپاكی بنبڕ گه‌ناته‌كاری ئه‌كا؟

شفق نيوز

ئيسه‌يش‌ ليژنه‌ی ده‌سپاكی له‌ ئه‌نجوومه‌ن نوێنه‌ره‌يل ئه‌را له‌ناوبردن گه‌ناته‌كاری ستراتيجيه‌ت تازه‌يگ گرته‌سه‌ خوه‌ی و له‌تی خوازياره‌ ئه‌و پويل و دارايه‌يله‌ ك دزرياگه‌ باريده‌و ئه‌را خه‌زينه‌ی ده‌وڵه‌ت و گه‌ناته‌كاره‌يليش پيشكه‌ش وه‌ دادگا بكا، هه‌ڵبه‌ته‌ ئه‌گه‌ر ئی ليژنه‌ توانای جيوه‌جيكردن ئی ئه‌رك پيرووزه‌ داشتوود، ئه‌وه‌ بيگومان مايه‌ی ده‌شخوه‌شی وڕيزگرتنه‌ له‌ هه‌وڵه‌يلی، ك ئه‌را ئی مه‌سه‌له‌يشه‌ ٩ خاڵ دياری كردگه‌، چوينكه‌ باس له‌وه‌ ئه‌كا ك به‌رزه‌وبوين ريژه‌ی گه‌ناته‌كاری وه‌ شيوه‌ی فراوانيگ كاريگه‌ری فريه‌يگ ناسه‌ بان پرووژه‌يل ئاوه‌دانی و سه‌رمايه‌گوزاری و خزمه‌تگوزاری.

له‌يرا ستراتيجيه‌ته‌ تازه‌ی ليژنه‌ی ده‌سپاكی پيكهاتگه‌ له‌:

* ئاماده‌كردن راپۆرت مانگانه‌و ئاگاداركردن ئه‌نجوومه‌ن نوێنه‌ره‌يل له‌لی و ده‌رخستنی ئه‌را رای گشتی.

* به‌شداركردن ريكخرياگه‌يل مه‌ده‌نی و هووكاره‌يل ره‌سانن و هاووڵاتيه‌يل له‌ ده‌رخستن حاڵه‌ته‌يل گه‌ناته‌كاری و پيشوازيكردن له‌ شكايه‌ته‌يليان.

* ته‌رخانكردن شماره‌ی ته‌له‌فۆن و پۆست ئه‌لكترۆنی ئه‌را پيشوازی له‌و شكايه‌ته‌يله‌ ك په‌يوه‌سه‌ وه‌ گه‌ناته‌كاری له‌ گشت دام وده‌زگايه‌يل ده‌وڵه‌ت و دادوه‌ری.

* داناين ماوه‌يگ دياريكرياگ ئه‌را يه‌كلاكردنه‌وه‌ی گه‌ناته‌كاری ئداری و دارايی و ئاشكراكردن ئاكامه‌گه‌ی له‌وه‌رده‌م هووكاره‌يل ره‌سانن و ملله‌ت عراقی وه‌گشتی.

* وه‌كارهاوردن ئامێره‌يل تازه‌و ته‌كنۆلۆجياو سيستمه‌يل چه‌وديری و ئامێره‌يل ده‌رخستن دروو له‌ كاره‌يل گه‌ناته‌كاری له‌ ده‌زگايه‌يل ده‌وڵه‌ت.

* ريككه‌فتن وه‌ل ريكخرياگه‌يل ناحكوومی و هووكاره‌يل ره‌سانن و پياوه‌يل ئايينی ئه‌را رووشنهويركردن مه‌ردم له‌ مه‌ترسی گه‌ناته‌كاری و كاريگه‌ری خراوی له‌بان كوومه‌ڵگاو به‌رژه‌وه‌ندی باڵای وڵات.

* داناين ميكانيزميگ تازه‌ ئه‌را بنبڕكردن دزی و تاڵانكردن دارايی وه‌ل بانكه‌يل حكوومی و ناحكوومی و ريككه‌فتن وه‌ل بانك ناوه‌ندی.

* دوباره‌ بنياتنانه‌وه‌ی ياسايه‌يل حكوومه‌ت وه‌خاتر چاره‌سه‌ر گرفته‌يل له‌ رينمايی و ياسايه‌يل تايبه‌ت وه‌ ريككه‌فتن و سه‌ندن وه‌ پويل ده‌وڵه‌ت ك بويه‌ هووكار له‌كه‌دار و جيوه‌جی نه‌كردن پرووژه‌يل.

* پابه‌ندكردن ريككه‌فتنكاره‌يل و كومپانيايه‌يل وه‌ مه‌رجه‌يل سزايی ك وه‌ مه‌رجيگ پابه‌ند بدێ وه‌ جيوه‌جيكردن پرووژه‌يل وه‌گووره‌ی جوورايه‌تی و وه‌سف و په‌يمانه‌ی خاس و دروس.

ئی خاڵه‌يله‌ ده‌قاوده‌ق له‌ ستراتيجيه‌ت تازه‌ی ليژنه‌ی ده‌سپاكی هاتگه‌و ئاماژه‌ وه‌پيان كردگه‌ ئه‌را سه‌رخستن كاره‌يلی و نواگرتن له‌ گه‌ناته‌كاری، وه‌لی له‌يرا پرسيار ئه‌وه‌سه‌ ك خود ئه‌و ليژنه‌ وه‌ ته‌مای حاشا له‌ گه‌ناته‌كاری كردنه‌ تا باقی مه‌ردمه‌گه‌يش له‌ دام و ده‌زگايه‌يل ده‌وڵه‌ت بكه‌فنه‌ بان ڕی راس و دارايی ملله‌ت وه‌تاڵان نه‌يه‌ن؟ ئايا ٩ خاڵه‌گه‌ی ليژنه‌ی ده‌سپاكی بنبڕ گه‌ناته‌كاری ئه‌كا له‌ وڵاتيگ ك گشت دام و ده‌زگايه‌يلی ليوايلوو پڕن له‌ گه‌ناته‌كاری؟ له‌ڕاسی ئيمه‌ له‌ وڵاتيگ ژيه‌يم به‌ش فريه‌يگ له‌ وه‌رپرس و ده‌سڵاتداره‌يلی هانه‌ هووڵ چه‌پاوكردن و دزيكردن له‌ دارايی ئی ملله‌ت سته‌مديده‌.

ره‌نجده‌ر ئاواره‌