ژیان له‌وه‌ ده‌س وه‌پى ئه‌كا

شفق نيوز

چشتیگ دیرێ و تویه‌نیگ گشت چشتیگ ده‌سه‌وه‌ر بكا، ئیسه‌ گه‌ورایم و حه‌ز كه‌یم بچیمنه‌و ئه‌را قوناغ مناڵى، وه‌لى نه‌ك جویر مناڵه‌ ناخاڵه‌گه‌ى ئه‌وسا، به‌ڵكوو مناڵیگ شاره‌زاو پڕ ئه‌زموون، یه‌یش چشتیگ وه‌پیمان نیشان ئه‌دا ك ئیمه‌یش تا ئیسه‌ نه‌ڕه‌سیمنه‌سه‌ دویا ویستگه‌ یا محه‌ته‌ى ژیان تا بفامیم یا وچانیگ بیه‌یم. قوناغ پیربوین دویا قوناغ خوه‌ندنگاى ژیانه‌، یا تویه‌نیم بویشیم له‌وه‌وه‌ ژیان ده‌س وه‌پى ئه‌كا، وه‌چه‌واشه‌ى كه‌سه‌یلیگ ك له‌یوا هویره‌و كه‌ن گوایا سه‌ره‌تاى كووتایه‌یله‌. له‌ى عومره‌ ئاده‌میزاد ئه‌زموون فره‌یگ په‌یا ئه‌كاو شاره‌زایى فره‌یگیش له‌لاى دروس بوود، ئه‌ویش وه‌گووره‌ى ئه‌وه‌ك وه‌چه‌نه‌ها به‌رزى و نزمى و تیه‌ڵ و شرینى و خوه‌شى و ناخوه‌شى گوزه‌ر كردگه‌. دى وه‌خت ئه‌وه‌ هاتگه‌ وچانیگ به‌یگ و چه‌و بگه‌ردنیگه‌ گشت ئه‌و شه‌كه‌تى و ده‌رده‌سه‌رى و كاره‌یلاو شایه‌ت خاسترین دیارییش ئه‌را پیر له‌ى ماوه‌ خانه‌نشینى بوود، خانه‌نشینى وه‌ماناى دویره‌وكه‌فتن له‌ناخوه‌شیه‌یل و شه‌كه‌تى كار و خودته‌رخانكردن ئه‌را ئاره‌زووه‌یل تایبه‌ت و زیاتر وه‌خت وه‌سه‌ربردن وه‌ل خیزانا، ك ئه‌ویش وه‌ ئه‌نجامداین گه‌شت و ده‌رچگن ئه‌را شوونه‌یل گه‌شت وگوزار نه‌ك دتنیشتن شه‌و وڕووژ له‌ بن ماڵ و چه‌وه‌ڕیكردن مردن!

له‌ڕاسى فره‌یگ له‌ پیره‌یل وه‌ غه‌ڵه‌ت له‌ وشه‌ى خانه‌نشین ره‌سینه‌سه‌وه‌، هه‌ر له‌وه‌ر ئه‌وه‌یش له‌ى وه‌خته‌یله‌ هه‌وڵ ئه‌وه‌ ده‌ن زیاتر كۆنترۆڵ ماڵ بكه‌ن له‌وه‌ر خاتر مقه‌یه‌تیكردن پله‌و پایه‌ى خوه‌یان و له‌گشت چشتیگ تیه‌نه‌ جواو، ك هه‌رچه‌نى زویتر ئى ره‌فتاره‌ نه‌یاشتنه‌، وه‌لى نوڕید وه‌بى ڕاده‌ هسیار بوون و له‌ هه‌مان وه‌خت وه‌ كه‌مترین قسه‌و ڕه‌فتار تویڕه‌ بوون و ئاماده‌ نین وه‌رگه‌ى ڕه‌خنه‌و پیشنیاریگ بگرن، چوینكه‌ باوه‌ڕیان له‌یواسه‌ ئه‌یه‌ له‌ پله‌و كه‌سایه‌تییان كه‌مه‌و ئه‌كا، تاڕادایگ ك ره‌خنه‌یش له‌گشت هه‌ڵسووكه‌فتیگ ئه‌ندام خیزانیانیش گرن له‌ چوینیه‌تى پاكه‌وكردن ناوماڵ بگر له‌ شیواز ئاشكردن و ریكخستن كه‌لپه‌ل و دیكۆر ماڵ، تا له‌یوا له‌لى تیه‌یگ بڕیگ له‌ ژنه‌یل له‌یوا هس كه‌ن وه‌رانوه‌ر پیاویگ تر گردنه‌و جیاس له‌ هاوسه‌ره‌یلیان و ئاره‌زوو ئه‌وه‌ كه‌ن هه‌میشه‌ له‌ ده‌یشت بوون و نانه‌وه‌ ئه‌را ماڵ.

له‌وه‌رانوه‌ر ئه‌وه‌یش خانه‌نشین حه‌ز كه‌ن له‌ گووشه‌گیرى و ئه‌گه‌ر یا ئحتمال تویشبوین وه‌ نه‌خوه‌شیه‌یل ده‌روینى و لاشه‌ییان زیاتر بوود و له‌یوا هس كه‌ن ژیان ئه‌وان فرووشتگه‌و جاریگ تر نسینیه‌نه‌وه‌، له‌وه‌ر ئه‌وه‌ زیاتر له‌گشت وه‌ختیگ په‌یوه‌س بوونه‌ ئه‌ندامه‌یل خیزانیان له‌ترس ته‌نیایى و مردن. ئنجا وه‌ل ئه‌و هه‌مگه‌ قه‌یرانیشه‌ رووژ له‌دویاى رووژ شماره‌ى خانه‌نشینه‌یل زیاى ئه‌كا، دى فه‌رامووش كریه‌ن و خریه‌نه‌ خانه‌ى مردگه‌یله‌وه‌، یه‌یش له‌وه‌ختیگ ك تویه‌نیم گه‌وراترین نه‌ف وه‌ربگریم له‌ى چینه‌ ك خاوه‌ن شاره‌زایى فره‌یگن و خاوه‌ن فكره‌و ماریفه‌تن ك بایه‌سه‌ له‌بان گشت ملله‌تیگ نه‌ف له‌لیان وه‌ربگرن. ئنجا له‌یرا چه‌ن پیشنیاریگ خه‌یمنه‌ڕوى ك بیگومان بوونه‌ مایه‌ى زنگه‌وبوین ئى چینه‌و ئه‌گه‌ر گرنگى یا ئه‌همیه‌ت وه‌پیان بدریه‌یگ و هه‌وه‌جه‌یلیان دابین بكریه‌یگ دى ژیان له‌وه‌وه‌ ده‌س وه‌پى ئه‌كا:

1- زیاتر هانداین میدیایه‌یل له‌ ته‌له‌فزیۆن و ڕادیۆ و رووژنامه‌یل ئه‌را لاكردنه‌وه‌ له‌ى چین كومه‌ڵگاو خستنه‌ڕوى داواكاریه‌یلیان و ئه‌نجامداین ئاره‌زووه‌یلیان.

2- وازكردن چه‌ن سه‌نته‌ریگ تایبه‌ت وه‌ ئه‌وان، ك له‌تى چالاكى جوراوجوور ئه‌نجام بیه‌ن و شاره‌زایى و ئه‌زموونه‌یلیان له‌تى پیشكه‌ش بكه‌ن.

3- نه‌فوه‌رگرتن له‌لیان وه‌ك وه‌رگرتن ڕاى و ئه‌ڕاى چوینه‌یلیان له‌ هه‌ر كاریگ ئه‌وان له‌لى شاره‌زان و زانن.

4- له‌یه‌كه‌وداین وشه‌ى خانه‌نشین، ك ماناى له‌ماڵ ده‌یگ و ناخوه‌شه‌ وه‌پیان، یه‌یش له‌وه‌ختیگ خانه‌نشین ته‌نیا وازهاوردنه‌ یا ئاڵشتكردن جوور كاره‌گه‌یه‌ نه‌ك ده‌سوه‌رداین له‌ ئاده‌میزاده‌گه‌، له‌وه‌ر ئه‌وه‌ له‌ ئه‌مریكا وه‌ى چینه‌ ئویشن(هاووڵاتى یه‌كه‌م).

 

5- داناین به‌رنامه‌و كار خواست ئه‌را ده‌سمیه‌تداین خانه‌نشینه‌یل له‌بان گونجیان وه‌ل ئى قوناغه‌ وه‌رجه‌ ئه‌وه‌ك پڕه‌سنه‌ پى.

6- زیاتر گرنگیداین خیزان وه‌ى كه‌سه‌یله‌و به‌خشین حورمه‌ت و خوه‌شه‌ویسى وه‌پیان تا ئه‌و باوه‌ڕه‌ له‌لایان بمینیگ ك له‌لیان بیزار نیه‌ون و ژیان وه‌ ئه‌وانه‌وه‌ خوه‌شه‌.

بیگومان ئه‌گه‌ر ئى خاڵه‌یله‌ له‌وه‌رچه‌و بگیریه‌ن، ئه‌وه‌ هه‌قیگ سروشتیه‌و پیره‌یلیش تویه‌نن وه‌ك دڵیگ جایه‌ڵانه‌ بژیه‌ن تا دویا سه‌عات عومریان.