كوردستان له‌(زاخۆ) تا(خانه‌قى) نیه‌

شفق نيوز

عه‌ره‌بستان وتریه‌یگ زه‌نجیره‌ جه‌وه‌ڵه‌یل حه‌مرین خاڵ جیاكردنه‌وه‌ى كوردستانه‌ له‌ عه‌ره‌بستان و له‌دروشم یا شعار و قسه‌یل خوه‌مانیش هه‌میشه‌ حه‌مرین وه‌ك دویا مه‌رز جوگرافیاى كوردستان ناسیمن، وه‌لى فره‌جار له‌شیه‌وكردن ئى ناوناین یا مسته‌ڵحه‌ كوردستان له‌زاخۆوه‌ تا خانه‌قى گریمنه‌ وه‌رچه‌و، یه‌یش له‌باوه‌ته‌یل فره‌یگ  یا دیدار و هه‌ڵویست سیاسى و له‌ده‌م وه‌رپرسه‌یل ئدارى و سیاسى ئى وڵاته‌ ڕه‌نگه‌و داگه‌.! یه‌یش له‌وه‌ختیگ  ئى وه‌كاربردنه‌ ته‌نگه‌وكردن كوردستانه‌و له‌هه‌مان وه‌خت وازهاوردنه‌ له‌به‌شیگ  فراوان خاك كوردستان. چوینكه‌ هه‌رچه‌نى ئى ناوناینه‌ مه‌به‌س داشتووگ یا بى مه‌به‌س بووگ، كه‌مه‌ كه‌مه‌ بووگه‌ باو، وه‌تایبه‌ت وه‌سه‌به‌ب چاره‌سه‌رنه‌كردن كیشه‌ى ئه‌و ناوچه‌یله‌و مه‌ندنه‌وه‌ى شوونه‌وار داگیركارى له‌بانیان به‌شیگ له‌لیان سیماو سفه‌ت كوردستانیان كاڵه‌و بویه‌و ته‌عریب كریانه‌و ته‌نیا له‌وه‌ختیگ  ناویان تیه‌ریم ئشاره‌ت وه‌ كوردستانى بوینیان كه‌یم، ئمجا ئه‌گه‌ر بایگ و له‌ ناوبردنیانیش واز باریم، ئه‌وه‌ دى وه‌یه‌كجارى له‌هویر مه‌ردم چنه‌وه‌ ك ئه‌و ناوچه‌یله‌ كوردستان بوینه‌.!

ئیمه‌ گشتمان ها له‌هویرمان ئه‌وسا له‌وه‌خت خه‌بات چه‌كدارى له‌گشت قسه‌و په‌یامیگ  سه‌ركرده‌یل كورد هه‌ر وتیان له‌زاخۆوه‌ تا به‌دره‌و جه‌سان ڕزگار كه‌یم، یه‌یش له‌وه‌ختیگ  ك شماره‌ى ئاوایه‌یل ڕزگاركریاگیش ڕووژ وه‌ڕووژ كه‌مه‌و بویان، ئمجا سه‌ركرده‌یلیمان هه‌میشه‌ تواسیان كوردستانیه‌ت ئه‌و ناوچه‌یله‌ له‌هویر مه‌ردم كوردستان وه‌ زنگى بمینیگ و دوشمنه‌یلیش ئه‌وه‌ بزانن ك ئه‌وان په‌لامار جه‌وه‌ڵه‌یل ده‌ن، ئیمه‌ داواى زرواتیه‌و به‌دره‌و جه‌سانیش كه‌یم. یه‌یش له‌وه‌ر خاتر ئه‌وه‌ بوى تا ئیراده‌ى مه‌ردم كورد كزه‌و نه‌وگ، ئیسه‌یش جویر ئه‌وه‌ك ئاشكراو دیاره‌ به‌ش فره‌یگ هاووڵاتیه‌یل كورد گله‌وخواردنه‌ ئه‌را ئه‌و ناوچه‌یله‌ له‌قه‌یریگ  له‌و ناوچه‌یلیشه‌ راسه‌وخۆ كورد حوكمیان ئه‌كا، هه‌ر له‌وه‌ر ئه‌وه‌یش نیه‌كریه‌یگ  له‌ره‌سانن یا ئعلامه‌یل مه‌سه‌له‌ى خاوه‌نداریكردنیان وه‌و جووره‌ كاڵه‌و بووگ له‌هویر جایه‌ڵ جوانه‌یلمان و ئه‌را نه‌وه‌یل ئاینده‌یش گومان بخریه‌یگه‌ بان شوناسنامه‌یلیان.

ئه‌وه‌ك ئیسه‌ له‌ئعلام وتریه‌یگ  و خه‌ریكه‌ كه‌نه‌ى شوناسنامه‌ى ناوچه‌گه‌ یامه‌رز كوردستان(له‌ زاخۆ تاخانه‌قى)، ئه‌و ناوناین ترسناكه‌سه‌ ك كاریگه‌رى خراویگ  هیلیگه‌جى له‌بان شوناسنامه‌ى ناوچه‌یل تر كوردستانى ده‌یشت هه‌رێم كوردستان. ئمجا خاستر ئه‌وه‌سه‌ یا هه‌ر جویر ئه‌وه‌ك له‌ڕووشنهویرى گشتى كوردى حه‌مرین شوناسنامه‌ى مه‌رزه‌، ئه‌وه‌ باریمنه‌ كار، یا ئه‌وه‌سه‌ له‌زاخۆوه‌ تاجه‌سان بكه‌یمنه‌ قسه‌ى بان زوان مه‌ردم. چوینكه‌ له‌ناونى خانه‌قى تا دویامه‌رز كوردستان سه‌ده‌ها ئاوایى و چه‌نه‌ها ناحیه‌و دو قه‌زاى تر كوردستان هه‌س، ك ئه‌وانیش:

1- قه‌زاى مه‌نه‌لى، وه‌ل دو ناحیه‌ى به‌له‌دروز و قه‌زانیه‌و 234 ئاوایى، ك كه‌فتنه‌سه‌ بان پاریزگاى دیاله‌، ك وه‌گووره‌ى دویاده‌سكارى ساڵ 1987 روى وه‌ر یا مه‌ساحه‌گه‌ى (6586)كم2.

2- قه‌زاى به‌دره‌و ناحیه‌ى جه‌سان و زرواتیه‌، وه‌ل 53 ئاوایى، ك كه‌فتنه‌سه‌ مه‌رز پاریزگاى كووت. ك ئه‌ویش وه‌گووره‌ى دویاده‌سكارى ساڵ 1987 روى وه‌ر یا مه‌ساحه‌گه‌ى (3650)كم2.

وه‌ى جووریشه‌ (10236)كم2 خاك كوردستان كه‌فته‌سه‌ پشت خانه‌قیه‌وه‌، ك وه‌ته‌نیا ئه‌و ناوچه‌ ئه‌وه‌نه‌ى گشت پاریزگاى كه‌ركووكه‌. هه‌ر له‌وه‌ر ئه‌وه‌یش نیه‌وگ ئى ناوچه‌یله‌ له‌ئه‌ده‌بیات كوردى وه‌ده‌یشت كوردستان بشماریه‌ن.