ده‌وڵه‌ت داعش وه‌بی هه‌ڵوژاردن سه‌رئه‌كه‌فيد!

شفق نيوز

 

ناوچه‌ی شه‌نگاڵ نموونه‌يگه‌ ك وه‌گووره‌ی ئه‌زانيم قه‌واره‌ی ئه‌و شكه‌سته‌يله‌ چه‌نيگه‌ له‌ پرووسه‌ی سياسی له‌ عراق وه‌ل ئاكامه‌يل خراوی له‌بان گشت لايه‌نه‌يل ژيان له‌تی. ئی پرووسه‌ كاره‌ساتيگ له‌بان شه‌نگاڵ و مه‌ردمه‌گه‌ی دروسكرد، تا ره‌سيه‌ ئه‌وه‌ك مه‌رم فريه‌يگ خوه‌زيه‌و ئه‌را رژيم به‌عس گوڕ وه‌گووڕ بخوازن. ئمجا كومه‌ڵگايه‌يل وه‌خاك ده‌وردرياگی بويه‌سه‌ زيندان و كه‌مپ په‌نابه‌ره‌يل و ده‌رچگن له‌ليه‌و مه‌ترسی گه‌ورياگه‌و گشت ناوچه‌يل ده‌ورگرديشی بويه‌سه‌ خاك حه‌رام و نيشتن له‌تی فريه‌مه‌ترسيداره‌و كرده‌وه‌يل كوشتن و رواكانن و ڕخه‌وبردن وه‌رده‌وامه‌و له‌ناونی ماوه‌يگ و ماوه‌يگ تر هه‌واڵ كاره‌سات كوشتن و رواكانن و ته‌قينه‌وه‌ ئه‌ژنه‌فيم.

گشت ئی كرده‌وه‌يليشه‌ له‌ وجوود چه‌ن لايه‌نيگ روی ئه‌ياد و جوور ده‌وڵه‌تيگ حوكم شه‌نگاڵ يا چوارده‌وری يا ئه‌و پاريزگا ك شه‌نكاڵ ها بانی بكا، ك هه‌ر وه‌و خاتريشه‌ ده‌وڵه‌ت مالكی(ده‌وڵه‌ت ياسا)ك توانای چه‌سپانن ياسا نه‌يريد له‌ هويچ شوونيگ له‌ی عراقه‌و له‌وانه‌يش شه‌نگاڵ و ده‌وڵه‌ت هه‌ردوگ نوجێفی ك تائيسه‌ كه‌س نازانيد هان وه‌ل ياسا يا دژ ياسان، ده‌وڵه‌ت كوردستانيش تائيسه‌ وه‌ كرده‌وه‌ ناتويه‌نيد شه‌نگاڵ بخاده‌ بان ئاسايش و سه‌قامگيری كوردستان.

دی ئه‌وه‌سه‌ شه‌نگاڵ ك له‌وه‌خته‌يل هه‌ڵوژاردن جاده‌و شوونه‌يلی قه‌ره‌باڵغ بوی له‌وه‌ر دعايه‌ و ره‌شم ده‌يه‌ها كانديدكرياگ سه‌ر وه‌و ده‌وڵه‌ته‌يله‌ ك ئاماژه‌ وه‌پيان كرديم، ئيسه‌ پڕ بويه‌ له‌و مه‌ردمه‌يله‌ ك له‌باخ وبووسانه‌يليان واينه‌ له‌ ره‌بيعه‌و كه‌فته‌سه‌ چوارچيوه‌ی مه‌رز ده‌وڵه‌ت داعش له‌ شوون هه‌ڵوژاردنه‌يل.

هه‌ر له‌وه‌ر ئه‌وه‌يش داعش ره‌سيه‌سه‌ ئه‌و باوه‌ڕه‌ ك پرووسه‌ی هه‌ڵوژاردن بيجگه‌ ره‌سين ئه‌را ده‌سڵات له‌ی عراقه‌ هويچ تر نيه‌و يه‌يش له‌ی هه‌ڵوژاردنه‌يله‌ وه‌بی به‌شداريكردن سه‌ركه‌فت، چوينكه‌ وه‌ كرده‌وه‌ خاوه‌ن ئه‌و ده‌سڵاته‌سه‌و ئسپاتی كرد ك گشت ئه‌و دروشمه‌يل ك له‌لايه‌ن سياسيه‌يل عراقيه‌و به‌رزه‌و ئه‌كريه‌يد ته‌نيا پفيلك بان ئاوه‌و پرووسه‌ی سياسييش وه‌ گشتی و گشت ئه‌و پرووژه‌يليشه‌ ك په‌يوه‌سن وه‌پيه‌و له‌ مه‌رز پروژه‌يل ده‌وڵه‌ت داعش وسيه‌ن.

خه‌يری ئبراهيم كۆرۆ

ج . أ