هۆنه‌رمه‌ندێ له‌ نژاد عێشق!

شفق نيوز

لێ سه‌رده‌مه‌ که‌سێک نییه ک زانیاری کەمێگ لە سەر مۆسیقا داشتودو مۆجته‌با میرزاده‌ نه‌نا‌سێد‌و کۆرته‌ باسێگ له‌ سر ژیان نامه‌ێ پڕ له‌ ده‌رس ژیانێ نه‌زانێ... ژیان نامه‌ێ هۆنه‌ری میرزاده‌ هه‌ر‌ جوور باخ پڕ له‌ گۆڵێگه‌ ک بوو خوه‌ش نووکاری له‌ جی وە جیەێ خۆنیشاندان که‌ێد، ک وه‌ باوه‌ر من ئه‌گه‌ر میرزاده‌ جوور که‌سایه‌ت گه‌وراێگ له‌ ناو مۆسیقاێ ئێران و کوردستان ناو بووه‌یم، هه‌م که‌م وه‌تیمه!‌.. مامۆستا میرزاده‌ له‌ ژه‌نیاری فێشتر ئاڵات مۆسیقاێ ڕۆژهه‌ڵات وه‌ خاسی شاره‌زا بوو وە‌ ته‌نیا ئه‌ڕا خوه‌ێ ئۆرکستر گه‌وراێگ بوو ک هۆنه‌رمه‌ندێ له‌ وێنه‌ێ میرزاده‌ له‌ دنیاێ مۆسیقاێ ئێران دی خه‌لق نیه‌ود!..ڕێکاره‌یل تایبه‌تی میرزاده‌ له‌ ژه‌نین ڤیۆلۆن و تاکه‌ژه‌نیه‌لێ و ڕێبه‌ری ئۆرکستر گه‌ورای ڕادیۆ ئێران و سازکردن مه‌تن مۆسیقاێ فێشتر له‌ 56 فیلم ئێرانی و ئافراندن ئاسار پڕ ئەرزشێ له‌ مۆسیقاێ کوردی، میرزاده جوور که‌سایه‌ت گه‌وراێگ له‌ ناو دنیاێ مۆسیقا جی داس..

 

مۆجته‌با میرزاده‌ له‌ سال 1324 هه‌تاوی (١٩٤٥ میلادی) له‌ ڕۆژهه‌ڵات کوردستان پارێزگاێ کرماشان له‌ بنه‌ مالێگ مه‌زهه‌بی ک فره‌ هه‌زێان له‌ مۆسیقا نه‌یو چەو وە دنیا واز کرد... وه‌ وه‌ته‌ێ خوه‌ێ:(من له‌ منالیا فره‌ هه‌زم له‌ ده‌نگ مۆسیقا هات و هه‌میشه‌ چه‌ن گله‌ بشقاو و لێوان نامه‌ لاێ یه‌کوو وه‌ کەمچگێ دام له‌ بانێان تا ده‌نگێ لێ هێز بگرێد.. هه‌میشه‌ وه‌ێ شێوه‌ کاره‌یله هەز خوه‌م له‌ مۆسیقا بردم)

میرزاده‌ له‌ ژیان هۆنه‌ری، وه‌ل گیر وگرفته‌یل فرێگا به‌رامبه‌ر بوو وە ته‌نانه‌ت له‌ ناو بنه‌ ماله‌ێ که‌سێ وه‌ هه‌ول ده‌ری نه‌یو وە هه‌میشه‌ سه‌ر سه‌خت له‌ به‌رامبه‌رێ وسان ک له‌ مۆسیقا واز بارێ، به‌ڵام وه‌ ئێراده‌ێ ڕاسته‌قانه‌ێ،‌ باوه‌ر‌ێ ک وه‌ ئامانجێ داشت وه‌ێ قسه‌یله‌ گووش نێاو، بوە‌ ئه‌ێ میرزاده‌‌ ک ئیسه‌ سۆمبڵ کۆمه‌لگاێ هۆنه‌رییه‌.

نەمر میرزاده‌ له‌ سال 1338 (1959 میلادی) له‌ ته‌مه‌ن 14_-15 ساڵان ده‌س وه‌ چالاکی هۆنه‌ری خوه‌ێ وه‌ شیوه‌ێ فه‌رمی کرد و ئه‌وه‌ڵین کاره‌یلێ له‌ ڕادیۆ کرماشان و ئه‌ێجار سنه بڵاو بوو....ک وە وه‌ته‌ێ خوه‌ێ:(من وەردەس هیچ که‌س نه‌یومه‌!..له‌و سه‌رده‌مه‌ ک ڤیۆلۆن سه‌نم 14 سالم بی‌و له‌ کرماشان ته‌نیا یه‌ێ نه‌فه‌ر بی ک تـوا‌نس ڤیۆلۆن فێرم بکه‌ێ، ک ئه‌وه‌یش بایه‌س مانگێ پانزه‌ تمه‌ن بێاتامه‌ په‌ێ، به‌ڵام کاتێ وه‌ باوگم وه‌تم وه‌ شیوه‌ێگ قینووەو بی، ک وه‌ کۆتەگێک له‌ به‌‌ دالیم تا له‌ هووش خوه‌م چێم و ئه‌ێجاریش وه‌ت: ڤیۆلۆن سه‌نی هیچ، ئیسه‌یش توای مانگێ پانزه‌ تمه‌ن به‌ێ!..هه‌ر وێ جوره‌ بی ک دی خوه‌م بیمه‌ مامۆستاێ مۆسیقاێ خوه‌م و هه‌ر وه‌و ڤیۆلۆنه‌ فێشتر مۆسیقاێ گوورانیه‌یل نه‌مر حه‌سه‌ن زیره‌ک ژه‌نیاری کردم)

‌له‌و سه‌ر ده‌مه‌ ک مامۆستا و هۆنه‌رمه‌ند گه‌وراێ کورد مه‌زهه‌ر خاڵقی به‌رپرس ڕادیۆ و تلڤیزیون کرماشان بی، میرزاده‌ وه‌ڵێا ئاشنای پێا کرد..ک ئه‌و ئاشناییه‌ بایه‌س خه‌لق ئاساره‌یل پڕ ئه‌رزشێ له‌ لاێ هه‌ر‌ دگێانه‌و بی.. هه‌ر وه‌و جوره‌یشه‌ میرزاده مۆسیقاێ گوورانی بێژه‌یل ناودار کورد، نه‌مر حه‌سه‌ن زیره‌ک و لۆڕنژاد و... ژه‌نیاری کرد ک تا کاتێ به‌شه‌ر بژییه‌ ئه‌و کاره‌یله‌ هه‌ر‌ وه‌ ناوبانگن و جوور تیشک خوه‌ر له دیرووک مۆسیقاێ کوردستان دیارین.

چێن وه‌ تێران

میرزاده‌ له‌ سال 1346 (1967 میلادی) چێه‌ تێران و له‌ سال 1347 (1968 میلادی) وه‌ل ئۆرکستره‌یل بارید،نه‌کیسا و فارابی ده‌س وه‌ کار کرد، ک توانس له‌و سه‌رده‌مه‌ مۆسیقاێ گوورانی بێژه‌یل ناودار ئێران جوور گووگووش، هایده‌ و... ژه‌نیاری بکه‌ێد و ته‌نانه‌ت مه‌تن مۆسیقاێ فێشتر له‌ 56 فیلم ساز بکه‌ێد ک ئاسار پڕ ئه‌رزشێ له‌ خوه‌ێ وه‌ جی هیشت.. دوواێ سه‌رهه‌لدان 1357 (1978 میلادی) له‌ ئێران، چالاکی مۆسیقا فره‌ سه‌ختی‌ خریا سەرێ، به‌ڵام میرزاده‌ له‌ کارێ واز ناوردو هه‌ر کار مۆسیقاێ خوه‌ێ وه‌ ڕیه‌و برد ک توانس لەو سەردەمە له‌ ئێران 200 مۆسیقا ئڕا ڕادیوو تڵڤزیون ئێران ساز بکێد.. ک وە وته‌ێ وەر‌پرسه‌یل ڕادیوون تڵڤیزیون ئه‌و سه‌رده‌مه‌:(مامۆستا میرزاده‌ وه‌ ژه‌نیاری مۆسیقاێ گوورانییه‌لێ جوور (لاله‌ێ له‌ خون خه‌فیاێ و ...) بایس بی ک کار مۆسیقا له‌ ناو ئێران تا ڕاده‌ێ ئمێد به‌خشێک ئازاد بوود...)

وه‌ داخه‌وه‌ دوواێ ئه‌و هه‌مگه‌ خزمه‌ته‌ ک میرزاده‌ وه‌ مۆسیقاێ ئێران کرد.. وه‌ریه‌وبه‌ره‌یل هۆنه‌ری ڕادیۆ و تلڤیزیون ئێران له‌ میرازده‌ دوره‌و بین، ک هێمان هوکارێ ئڕا هیچ که‌س دیاری نه‌یووه‌ و هه‌ر کاتێگیش که‌سێ ئه‌و پرسیاره‌ له‌ مامۆستا میرزاده‌ بکردیاد ته‌نیا وڵامێ یه‌ بو ک بیلا له‌ ناو () بمێنێ! دوواێ ئه‌ویشه‌ میزاده‌ هه‌م وه‌ کار خوه‌ێ درێژه‌ێ‌ داو وه‌ فێر کردن بەردەسەیل خوه‌ێ له‌ فێشتر وڵاته‌یل و ئجراێ کۆنسرت له‌ ئێران ،کوردستان و ئۆروپا مۆسیقاێ ئێران و کوردستان وه‌ دنیا ناسان.

مال ئاوای

27 پووشپەڕ سال 1384 (Monday, July 18, 2005 ) بو ک گه‌ل کورد وه‌ تایبه‌ت کۆمه‌ڵگاێ هۆنه‌ری وه‌ گشتێ له‌ مال ئاوای مامۆستا میرزاده‌ ئاخین دار بین و جوور رۆژێ ڕه‌ش له‌ دیرووک ئێران و کوردستان دیاری کریا.. هه‌رچه‌ن میرزاده‌ چێنێ ئه‌به‌دی بی، به‌ڵام یاد و ژیان نامه‌ێ ک ئێراده‌ هه‌ر جووور کـیوستانه‌یل سه‌رکه‌ش زاگرۆس له‌ تێ دیاریه،‌ له‌ خوه‌ێ وه‌ میرات هیشت، ک هه‌ر ئێنسانێ وه‌ هه‌ر بیر باوه‌رێ توانێ ده‌رس ژیان و رێگاێ ره‌سین وه‌ ئامنج له‌ لێ وه‌ر بگرێ...‌

 

یاد و ناوێ هه‌ر پایر

 

نــ: نه‌عیم نه‌جه‌فی