به‌رپرسیارى بى پۆست

شفق نيوز

لاین پیكهاته‌یگ له‌ پیكهاته‌یل سه‌ره‌كى ملله‌ت عیراق، ئمڕوو چه‌ن بڕیار و هه‌ڵوێسته‌یل ئه‌رێنى(ئیجابى) وه‌چه‌و خوه‌مان دوینیمن و له‌نواى گشتیان بڕیاره‌گه‌ى دادگاى باڵاى تاوان ك وه‌ شابڕیاریگ شماره‌كریه‌ید. وه‌لى قه‌ى نه‌یرى ئه‌گه‌ر ئه‌وه‌ بخه‌یمنه‌ هویر ك ڕیگه‌مان هیمان دریژه‌ و نیاز گه‌ورایگ وه‌ قانعكردن گشت لایه‌نه‌یل په‌یوه‌ندیدار وه‌ كه‌یس كورد فه‌یلى دیریم، ك بایه‌ته‌ زوڵم له‌ بانمان لاوه‌ن و هه‌ق بیه‌نه‌ خاوه‌ن هه‌قه‌یل وهویچ منه‌ت و خه‌ڵاتیگیش له‌ هویچ لایه‌نیگ قه‌بوول نه‌كه‌ن.

واقعیگ پڕ له‌ ژانه‌ بایه‌ته‌ باسى بكه‌یمن، چوینكه‌ له‌ هه‌ر ده‌زگا و هه‌ر فه‌رمانگه‌یگ حكوومى په‌یوه‌ندى وه‌ كه‌یس كورده‌یل فه‌یلى دیرى، خاوه‌ن هه‌ق زره‌دمه‌ن بایه‌ته‌ ئه‌وپه‌ڕ هه‌وڵ و ته‌قه‌لا بیه‌ید و وه‌ هه‌ر شیوه‌یگ له‌و شیوه‌یله‌ بوود، ك له‌ فه‌رمانگه‌یل ده‌وڵت باوه‌، گشت لایگ ڕازى بكه‌ید؛ بایه‌ته‌ گرفانه‌یلى ئه‌رایان بیگار بكه‌ید، هه‌ر له‌ فه‌رمانبه‌ر خزمه‌تگوزارى تا ڕه‌سیده‌ به‌رزترین پۆست ئیدارى وه‌و ئومیده‌ ك كاره‌گه‌ى بخه‌نه‌ ڕى و له‌ شوون ئه‌و هه‌مكه‌ دویاخستن و زه‌ره‌ده‌یل مادى و مه‌عنه‌ویه‌ چه‌وه‌ڕى ئه‌وه‌ كه‌ید هه‌قه‌یل ڕه‌واى خوه‌ى ئه‌راى بایده‌وه‌.

ئى حاڵه‌ هه‌ر له‌ ڕووژ ڕمیان ڕژیم وه‌رین تا ڕووژ ئمڕوو وه‌رده‌وامه‌، و ده‌رچوین بڕیار دادگاى باڵاى تاوان و ده‌سپیشخه‌ریه‌ گرانبه‌هاگه‌ى سه‌رۆك كۆمار  و سه‌رۆك هه‌رێم و سه‌رۆكایه‌تى ئه‌نجوومه‌ن وه‌زیره‌یل وه‌ كاراكردن و پشتگیریكردن له‌ جیوه‌جیكردن ناوه‌ڕۆك بڕیاره‌گه‌ ك ڕه‌سمیه‌و بوى و هه‌واڵه‌ى گشت فه‌رمانگه‌یل ده‌وڵه‌ت كریا. له‌یرا پرسیاریگ خوه‌ى نیشان ده‌ید، له‌ سایه‌ى بارووه‌زع سسته‌م ده‌سڵات حازرى ك وه‌ گه‌ناته‌كارى ئیدارى و دارایى پیسه‌و بویه‌، ئایا ڕیگه‌دیرى له‌بان زه‌وى واقع ئى بڕیاره‌ كارا بكریه‌ید و بكه‌فنه‌ شوونى؟

ئه‌گه‌ر كه‌فتنه‌ شوونى و(متابه‌عه‌)ى كریا؛ یه‌ بووده‌ یه‌كم ده‌سپیشخه‌رى كارا ئه‌را جه‌نگكردن دژ وه‌و گه‌ناته‌كاریه‌ ك په‌رش و بڵاو بویه‌سه‌ ناو به‌ده‌ن ده‌وڵه‌ت، چوینكه‌ ئى دۆسیه‌ وه‌گووره‌ى تایبه‌تمه‌ندیه‌گه‌ى و له‌وه‌ر ئه‌وه‌ ك گشت لایه‌نه‌یل له‌بان ئه‌وه‌ ڕیككه‌فتنه‌ ك له‌ شوون گشت جووره‌ زووران و كیشمه‌كیشیگ ، یه‌ بووده‌ نموونه‌ى باڵایگ ئه‌را وه‌ كاراكردن و ده‌رخستن ده‌سپاكى قه‌زا و ده‌سڵات جیوه‌جیكردن.

له‌ كووتاییش له‌ ڕوى وه‌رپرسیارى وه‌شوونكه‌فتن كه‌یس كورده‌یل فه‌یلى چه‌ن قوناغیگ كاركردن بى وچان مه‌نیه‌ و له‌یرا بایه‌ته‌ جه‌خت بكه‌یمن له‌بان گرنگى به‌شداركردن په‌یوه‌ندیداره‌یل ك خاوه‌ن كێشه‌گه‌ن(خێزان شه‌هیده‌یل و كووچ وه‌پیكریایه‌یل و زه‌ره‌دمه‌نه‌یل مادى و مه‌عنه‌وى) تا پشتگیرى له‌ نویسینگه‌ى وه‌شوونكه‌فتن بكه‌ن وه‌و زانیاریه‌یله‌ ك ها لایان و ئه‌و گیروگرفته‌یله‌ ك تویشیان هاتیه‌ له‌ماوه‌ى وه‌شوونكه‌فتن ڕووژانه‌یان ئه‌را ئه‌و كێشه‌ و گیروگرفته‌یل گیرخواردگیانه‌، دویر له‌ وه‌سیاسى كردن كێشه‌گه‌. چوینكه‌ ئمڕوو بویمنه‌سه‌ لایه‌نیگ له‌ هاوسه‌نگیه‌گه‌ و خه‌تاباركردن مه‌ردمانیگتر وه‌و شیوه‌ى جارانیه‌، دى بیهووده‌س، و ئه‌گه‌ریش هه‌ر كه‌مته‌رخه‌مى و سسیگ له‌یرا یا له‌ورا دوینریا، بایه‌ته‌ له‌سه‌ره‌تا گله‌یى له‌خوه‌مان بكه‌یمن. و بایه‌ته‌ وه‌گشت لایگه‌و هه‌وڵ بیه‌یمن، چوینكه‌ له‌وه‌گ خه‌سارى كردیمن زیاتر خه‌سار نیه‌كه‌یمن.