نان و خوه‌شه‌ویسى كورده‌یل فه‌یلى كوشت

شفق نيوز

ئنجا زوورم كاره‌یل شیله‌ر سویڕ خوه‌یگه‌ ده‌ور فكره‌ى ئازادى و ره‌هابوین له‌ده‌س سته‌مكارى. یه‌یش هیشته‌م ئى ئه‌و قسه‌ له‌لى وه‌رگرم له‌وه‌ر ئه‌وه‌ك په‌یوه‌ندى بته‌ویگ داشت وه‌و رویداگه‌یله‌ ك هاته‌ تویش كورده‌یل فه‌یلى و ئه‌و كیشمه‌كیشه‌ ك له‌ناونى جه‌لاد و قوربانیه‌یل رویدا.

شایه‌ت كه‌سیگ بوشیگ ئى قسه‌ درووه‌ ك خوه‌شه‌ویسى و نان وه‌ یه‌كه‌و گریه‌ بدریه‌ن ئه‌را جموجویلداین جه‌هان. هیز خوه‌شه‌ویسى خوه‌ى له‌كزى ئاده‌میزاد سسه‌و ناكا، به‌ڵكوو قوناغ وه‌ قوناغ ئه‌و كزیه‌ بڕیگ و یه‌یش مانانى ئه‌وه‌سه‌ ك تواناى سویڕخواردن دیریگ له‌ده‌روین ئاده‌میزاد.

ئنجا وه‌بى ئه‌وه‌ك مووڵه‌ت له‌لید وه‌ربگریگ ، هه‌ر له‌خوه‌یه‌و تیه‌یگ و نیه‌یگ له‌ قاپى و ره‌سیگه‌ شوون مه‌به‌س، یه‌یش ئه‌و خوه‌شه‌ویسى كورده‌یل فه‌یلیه‌ بوى ئه‌را ئى خاكه‌ ك له‌بانى ژیان و ره‌سین و گه‌ورا بوین و داواى زیاتر له‌و خوه‌شه‌ویسیه‌ له‌لیان كرد، ك وه‌ جووریگ رووژ له‌دویاى رووژ په‌یوه‌ندییان وه‌لیا بته‌وتره‌و بوود جویر ئه‌وه‌ك جادوو كردویگ له‌وه‌ك له‌تى له‌دایگ بویه‌و ژیاگه‌و جویر ئه‌وه‌ك له‌ باوگ و باپیره‌یلمان ژنه‌فیم ك هه‌ر كه‌سیگ له‌ئاو دجله‌و فورات خواردویگ نیه‌توینیگ وه‌بى ئه‌و ئاوه‌ بژیه‌یگ ، ئنجا ئى په‌یوه‌ندیه‌ له‌ناونى دووس و دوڵبه‌ر هه‌ر زیاى بوى و ئى ئشقه‌ ره‌سیه‌ ئه‌وه‌ك بترسیه‌ن له‌ خوه‌شه‌ویسى یا له‌وه‌ر ئه‌وه‌ك زه‌حمه‌ته‌ بشاریه‌ویگه‌و له‌ دڵ، یا له‌وه‌ر كووچكردن ك ده‌رئه‌نجام بویه‌ نسیویان و بویه‌ مایه‌ى ناڕه‌حه‌تى له‌دڵ ئاشق. ئنجا له‌یرا پرسیار ئه‌وه‌ كه‌یم ك ئایا دایگ ڕازیه‌ ڕوڵه‌یلى وه‌ زوور له‌لى بوریه‌یگ و ئایا تویه‌نیگ وه‌ بى ئه‌وان بژیه‌یگ ؟ جواوه‌گه‌ى نه‌خه‌یر، ته‌نانه‌ت حه‌یوانه‌یلیش وه‌رگرى له‌به‌چكه‌یلیان كه‌ن له‌وه‌ختیگ دڕنده‌یگ هه‌وڵ به‌یگ دویریانه‌و بخا له‌داڵگه‌یلیان. خاك عراقیش جویر دایگه‌ ئه‌را روڵه‌ى. رژیم رمیاگ كورده‌یل فه‌یلى له‌داڵگیان داوڕى له‌ژیر كه‌هانه‌ى جوراو جوور وه‌ك ته‌به‌عیه‌و حزب ده‌عوه‌و چشه‌ته‌یل تر، ك هویچ بنه‌ماى راسكانییگ نه‌یاشت، گشت جاریگیش كورده‌یل فه‌یلى وه‌رگرى له‌خوه‌یان كه‌ن وه‌ ئه‌وه‌ك شوناسنامه‌یلیان له‌لیان بریاگه‌و ئى شوناسنامه‌یشه‌ خاك عراقه‌. ك ئایا بوود شوناسنامه‌ له‌ئاده‌میزاد بسینیه‌یگ و بى ناسنامه‌ بگه‌ردیگ  ك ڕاز ئى دونیا وه‌ ئاده‌میزاد ته‌واو بوود.

فره‌جاریش له‌ ئاشقه‌یل ژنه‌فیم ك خوه‌شه‌ویسى عه‌زاوه‌و خوه‌شه‌ویسى بویه‌ بكوش فره‌ كه‌س، وه‌لى تام خوه‌شه‌ویسى له‌و عه‌زاوه‌ ته‌واو بوود ك روڵه‌یلمان له‌تى ژیان ئه‌را ماوه‌ى ساڵه‌یل دویرو دریژیگ ، هه‌ر له‌وه‌ر ئه‌وه‌یش ئویشیم نان و خوه‌شه‌ویسى له‌جیاى ئه‌وه‌ك جموجویل بیه‌نه‌ جه‌هان بوینه‌ مایه‌ى كوشتن كورده‌یل فه‌یلى.

 

ئه‌سرا شاواز