كورده‌یل فه‌یلى هه‌وه‌جه‌ى فریه‌یگ وه‌ كه‌ناڵیگ ئاسمانى دیرن

شفق نيوز

 

مه‌سه‌له‌ى سه‌ركه‌فتن ئى ده‌زگاى گه‌ورا، ئه‌و هاوكارى گه‌ورا بوى له‌ناونى ره‌ساننكاره‌یل و ئداریه‌یل و گشت كارمه‌نده‌یل وه‌گووره‌ى دڵسووزى و ئازایه‌تى و هیز باوه‌ڕ و سه‌بر بى راده‌یان ك هیشت ئى ده‌زگا ناودار و نموونه‌یى بوود، هه‌ر له‌وه‌ر ئه‌وه‌یش وه‌ى بوونه‌وه‌ موباركبایى له‌ هه‌وڵ و ته‌قلایان كه‌یم وه‌خاتر كاره‌یل خاستر.

نزیكه‌ى دو ملیۆن كورد فه‌یلى له‌بان خاك عراق وجوود دین ئه‌را ماوه‌ى هه‌زاران ساڵه‌، ئه‌وان هاووڵاتیه‌یل ره‌سه‌نن وه‌رجه‌ ئه‌و مه‌ردم نه‌ته‌وه‌یل تره‌ ك له‌ وڵاته‌یل هاوساوه‌ هاتنه‌و نیشته‌جى عراق بوینه‌.

له‌ڕاسى كورده‌یل فه‌یلى له‌ ناوچه‌یل خوه‌رهه‌ڵات مه‌رز ناونى عراق و ئیران و له‌ به‌غدا نیشته‌جیین و قسه‌كردنیانیش وه‌ شیوه‌زووان فه‌یلیه‌و خاوه‌ن رووشنهویرى ئه‌ده‌بى و شعرى و هونه‌ر جه‌هانیین وه‌تایبه‌ت له‌ هونه‌ر داهینان له‌ چشته‌یل ده‌سكرد و ره‌سم و په‌یكه‌رتاشى و مۆسیقاو گورانى و هه‌ڵپه‌ڕگه‌و فۆلكلۆر و ته‌مسیل.

بیجگه‌ یه‌یش كورده‌یل فه‌یلى له‌ناوچه‌یل وه‌رفراوانیگ له‌ ئیران وجوود دیرن و هه‌مان ره‌فتار و هه‌ڵسووكه‌فت دیرن له‌ڕوى كه‌سایه‌تى و كووومه‌ڵایه‌تى و ده‌روینى، وه‌ل ئه‌وه‌یشا هه‌زاران له‌ جایه‌ڵ جوانه‌یل و خیزانه‌یل فه‌یلى له‌ ده‌وڵه‌ته‌یل تر جه‌هان ژیه‌ن وه‌تایبه‌ت له‌ ئۆرپا، ئه‌ویش له‌وه‌ر كووچ وه‌پیكردن زووره‌ملى ك له‌لایه‌ن حكوومه‌تیل وه‌رین عراقه‌و ده‌رهه‌قیان ئه‌نجام دریا هه‌ر له‌سه‌رده‌م ره‌شید عالى گه‌یلانى تا سه‌رده‌م رژیم به‌عس خوینمژ، یه‌یش بیجگه‌ ئه‌و خیزانه‌یله‌ ك ته‌سفیر كریان وه‌ره‌و ئیران و له‌لیانیش هه‌س تا ئیسه‌یش له‌ژیر چادر ژیه‌ید.

ئنجا له‌ى باوه‌ته‌ ناخوازیم فیشتر له‌ى رویه‌و باس بكه‌یم، به‌ڵكوو خوازیاریم دقه‌ت بكه‌یمنه‌ بان باوه‌ت هه‌وه‌جه‌ى كورده‌یل فه‌یلى ئه‌را كه‌ناڵیگ ئاسمانى وه‌ناو كه‌ناڵ ئاسمانى شه‌فه‌ق. ئیسه‌ وه‌خت ئى جووره‌ كه‌ناڵیگ گرینگ هاتگه‌ ئه‌را بڵاوكردنه‌وه‌ى هه‌واڵه‌یل سیاسى و باوه‌ته‌یل زانستى و تاریخى و رووشنهویرى و كوومه‌ڵایه‌تى وه‌ شیوه‌زووان فه‌یلیانه‌، یه‌یش بیجگه‌ بڵاوكردنه‌وه‌ى ژیار ره‌سه‌ن و هونه‌ره‌یل جوان و تاریخییان، له‌یرا كورد فه‌یلى له‌ ناو و ده‌یشت ته‌ماشاى نه‌یچێروان بارزانى سه‌رۆك حكوومه‌ت هه‌رێم كوردستان كه‌ن ك ناسریاگه‌ وه‌ پیاو كوردستانى و ده‌سواز و دڵسووز كورده‌یل فه‌یلى وه‌خاتر وه‌دیهاوردن ئى ئاره‌زووه‌ وه‌ ئه‌وه‌ك ده‌سپیشخه‌ر بوود ئه‌را جیوه‌جیكردن بنته‌مه‌ڵ ئى كه‌ناڵه‌ وه‌ زویترین وه‌خت له‌وه‌ر خاتر گرینگى و هه‌وه‌جه‌ى فریه‌یگ ئه‌ڕا ئى پرووژه‌ى زینگه‌وكه‌ره‌ ئه‌را كورده‌یل فه‌یلى.

كورده‌یلى فه‌یلى ئازاو ره‌سه‌نن، وه‌خوین شه‌هیده‌یلیان و ماڵ و موڵكه‌یلیان قوربانى دان له‌وه‌ر خاتر كورد و كوردستان وه‌ سه‌ركردایه‌تى بارزانى نه‌مر، هه‌ر له‌وه‌ر ئه‌وه‌یش ئه‌ركیگ نیشتمانى و نه‌ته‌وه‌ییه‌ وه‌رپرسه‌یل حكوومه‌ت هه‌رێم جیوه‌جى ئى خواست و ئاره‌زووه‌ بكه‌ن و بایه‌سیشه‌ له‌بان حكوومه‌ت ناوه‌ندى به‌غدایش پشتگیرى ماددى و مه‌عنه‌وى و هاوكارى فره‌یگ ئه‌رایان پیشكه‌ش بكا ئه‌را جیوه‌جیكردنى تا نه‌وه‌یل ئاینده‌ى فه‌یلى ئى خاسیه‌ له‌ هویره‌و نه‌وه‌ن، چوینكه‌ ئمڕوو گشت كورده‌یل فه‌یلى وه‌ گه‌رمى و ئومید گه‌رایگه‌و چه‌وه‌ڕى له‌دایگبوین ئى پرووژه‌ى گرینگ ره‌ساننه‌ كه‌ن، ئنجا ئایا وه‌ى نزیكه‌یله‌ ئى ئاره‌زووه‌ جیوه‌جى بوود؟ (ان شا‌ءالله).

قاسم مه‌نده‌لاوى

ج . أ