مه‌ردم عراق كه‌ى له‌ خه‌وا تیه‌ن..؟

شفق نيوز

ناخوه‌شى و مه‌ینه‌تى بردیانه‌ سه‌ر، سزاو كوشتن و زیندانى و ماڵویرانى و خزمه‌ت سه‌ربازى وڵكه‌ریان نه‌وى و هه‌میشه‌ له‌ مه‌ویسى و چه‌وسیان و ژیرده‌سه‌یى ژیان، هویچ تاكیگ له‌ى عراقه‌ نه‌تویه‌نست وه‌ سه‌رفرازى و ئازادى بژیه‌ید ته‌نیا داروده‌سه‌و جه‌لاده‌یل خوینمژ رژیم دیكتاتۆر نه‌ود ك هه‌میشه‌ ده‌سیان وه‌ خوین هاووڵاتیه‌یل قرمز بوى.

 

وه‌لى دویاى ئه‌و ملهوڕى و نائه‌قڵیه‌ ك سه‌دام حسێن له‌ وه‌رانوه‌ر گه‌وراترین هیز جه‌هان هاورده‌ى كار له‌وه‌خت داگیركردن كوه‌یت و دویاى ئه‌وه‌یش وه‌ زوور جه‌نگ له‌و وڵاته‌ ده‌ركریا ئه‌وه‌ بوى وڵاته‌یل یه‌كگرتگ له‌ 2003 شكه‌ست وه‌ حوكم تونڕه‌وى و ستمكارانه‌ى رژیم به‌عس هاوردن و عراق له‌و ده‌سڵاته‌ قورتار كردن و حوكم دیموكراسیه‌ت و فره‌لایه‌نى هاته‌ وجوود.

 

سه‌ره‌تاى هه‌ڵوژاردن ئازادانه‌ى ملله‌ت عراق له‌ساڵ 2005 وه‌ل نویسانن ده‌ستوور هه‌میشه‌یى عراق گام خاسیگ بوى ئه‌را ئاڵشتكردن بار ژیان ئاده‌میزاد عراقى و ئومید گه‌ورایگ بوى وه‌ره‌و پیشكه‌فتن و خزمه‌تگوزارى و ئاوه‌دانى و بنیاتناین عراقیگ تازه‌و دویر له‌ سته‌م و چه‌وسیان، وه‌لى جوور ئه‌وه‌ك پیشینه‌یل وتنه‌" ده‌نگ ده‌وڵ له‌دویره‌و خوه‌شه‌"، چوینكه‌ ده‌ ساڵه‌ عراق ئازاد بویه‌ له‌ چنگ سته‌مكار، وه‌لى هیمان زوڵم و كاولكارى هه‌ر وه‌رده‌وامه‌، هیمان خزمه‌تگوزارى دڵخوه‌شكه‌ر نیه‌ له‌هویچ شوون و شاریگ له‌ى عراقه‌، وه‌ل ئه‌وه‌یشا جه‌نگ و كیشمه‌كیش هه‌ر وه‌رده‌وامه‌و زیاتریش له‌ جاران، بیجگه‌ ئه‌وه‌یش دوینید گشت شاریگ له‌ى عراقه‌ بویه‌سه‌ سه‌ربازگاو هه‌ر 50 مه‌تر و سه‌یته‌ره‌یگ دانریاگه‌و هه‌زاران دیوار كۆنكریت ڕى له‌ هامشوو سه‌یاره‌و مه‌ردم ته‌نگه‌و كردنه‌و چمانى به‌ره‌ى جه‌نگه‌و گشت رووژه‌یل ئى عراقه‌ بویه‌سه‌ ئنزار(ج)قه‌ره‌باڵغى ناو جاده‌یش مه‌ردم له‌ گیان جاڕس كردگه‌و چاره‌سه‌ر گونجیاگیگ ئه‌را حاڵه‌تیشه‌ هیمان وه‌دى نه‌كریاگه‌.

 

ئه‌گه‌ر باس مه‌سه‌له‌ى گه‌ناته‌كارى و بار ده‌زگایه‌یل ده‌وڵه‌تیش بكه‌یم، ئه‌وه‌ بیگومان له‌ى باوه‌ت كوڵه‌ نیه‌تویه‌نیم گشت ئه‌و جه‌رده‌یى و دزى و گه‌ناته‌كاریه‌ باس بكه‌یم، هه‌ر له‌وه‌ر ئه‌وه‌یش وه‌رجه‌ چه‌ن رووژیگ ریكخریاگیگ وه‌ناو ریكخریاگ شه‌فافیه‌ى ناوده‌وڵه‌تى له‌ راپۆرتیگ ئاشكراى ئه‌وه‌ كرد ك عراق وه‌ یه‌كیگ له‌ گه‌ناته‌كارترین ده‌وڵه‌ته‌یل جه‌هان ناسریاگه‌ له‌ساڵ 2012. بیجگه‌ ئه‌وه‌یش وه‌ گووره‌ى راپۆرتیگ تر ریكخریاگ"مێرسه‌ر" ئه‌وه‌ ده‌ركه‌فتگه‌ ك شار به‌غداى پایته‌خت عراق ئه‌را ژیان و گوزران و كاركردن خراوترین شاره‌یل جه‌هانه‌، دى نیه‌زانیم مه‌ردم عراق سته‌مدیده‌ دڵ وه‌ چه‌ خوه‌شكردنه‌و كه‌ى له‌ خه‌وا تیه‌ن..؟ حكوومه‌ت ئیسه‌ى عراق چه‌ى له‌ حكوومه‌ت رژیم وه‌رین كه‌متره‌؟ چ پرووژه‌یگ خزمه‌تگوزارى ئه‌نجام داگه‌ ئه‌را ناوچه‌یل فه‌قیرنشین؟ ده‌وڵه‌ت یاسا هه‌ر وه‌ئاشكرا وه‌بى یاسایى ره‌فتار ئه‌كاو كیشمه‌كیش فره‌یگ دروس كردگه‌ جاریگ وه‌ل كورد و جاریگ وه‌ل عه‌ره‌ب سونى و جاریگ وه‌ل حزب و لایه‌نه‌یل تر ، ك ڕى چاره‌سه‌ریشى سه‌خته‌و ئه‌كاو ته‌نانه‌ت هیمان هه‌ر مكوڕیشه‌ له‌بان بڕین كارت خوه‌راك ك ژیان فه‌قیر و نه‌داره‌یله‌، چوینكه‌ وه‌گووره‌ى دویا راپۆرت وزاره‌ت بازرگانى عراق به‌شه‌ بودجه‌ى تایبه‌تكریاگ وزاره‌ته‌گه‌ ئه‌را ساڵ 2013 ته‌نیا به‌ش 10 مانگ ئه‌كا، ماناى ئه‌وه‌سه‌ ئه‌و دو مانگه‌ى تر  مه‌ردم بیبه‌ش كریه‌ن له‌ ئابڵوقه‌و كارت خوه‌راك! ئى هه‌مگه‌ زوڵمه‌و هیمان مه‌ردمیش هه‌ر بیده‌نگن!

 

ره‌زا سه‌رمه‌د

ج. ا