هەمیشە فرەنسا

شفق نيوز

بێرنار كۆشنه‌ر له‌و وه‌خته‌يله‌ ك وه‌زير خارجيه‌ی فره‌نسا بوی، هان كورد دا ئه‌را سه‌روه‌خوه‌يی و وت "ناتويه‌نم له‌ پاشا پاشاتر بووم" ، وه‌و مانا ك فريه‌ ئاره‌زوو سه‌روه‌خوه‌يی و ده‌وڵه‌ت ئه‌را كورد ئه‌كا، وه‌لی ئه‌يه‌ برياريگه‌و تايبه‌ته‌ وه‌ خود كورد و ئه‌و ناتويه‌نيد له‌جيای كورد بڕيار بيه‌يد.

دانيال ميته‌ران ناسرياگ وه‌ دايگ كورد، له‌شوون راپه‌ڕين ١٩٩١ وه‌بی گووشداين وه‌ بار سياسی و ياسايی ناوده‌وڵه‌تی كوردستان و بار ناوخوه‌يی كورستان وه‌ل يه‌كه‌م ئاسوو ئازادی ريكخرياگه‌ خێرخوازه‌گه‌ی "فرانس لیبرتی " هاورده‌ هه‌رێم و له‌و وه‌خته‌يله‌ ده‌سكرده‌ كار خێرخوازی و هاوكاريكردن ئاواره‌و فه‌قيره‌يل كوردستان.

فره‌نسا نه‌خش سه‌ره‌كی و كاريگه‌ر داشت له‌ دامه‌زرانن ئه‌و هه‌رێم كوردستان ئه‌وساو وه‌گريكردنی له‌لی، ئه‌وه‌ بوی فره‌نسا دانه‌ر سه‌ره‌كی فكره‌ی بڕيار ٦٨٨ و ئه‌نجوومه‌ن ئاسايش ساڵ ١٩٩١ بوی، ك ناوچه‌ی ئارام دامه‌زران، يه‌يش بيجگه‌ پيشكه‌شكردن ره‌شنويس بڕياره‌گه‌ و وه‌رگريكردن له‌و برياره‌، ك ئه‌وه‌ بوی وه‌ گووره‌ی به‌ڵگه‌نامه‌يل فه‌رمی ئه‌نجوومه‌ن ئاسايش ناوده‌وڵه‌تی له‌ ٤/ ٣ / ١٩١١ و كووچكردن مليۆنی مه‌ردم كوردستان وه‌ره‌و مه‌رزه‌يل نوێنه‌ره‌يل هه‌ميشه‌يی فره‌نسا و توركيا له‌ ئه‌نجوومه‌ن ئاسايش وه‌تايبه‌ت نامه‌ دانه‌ سه‌رۆك ئه‌نجوومه‌نه‌گه‌ له‌بان مه‌سه‌له‌ی مه‌ترسی له‌بان ئاسايش و ئاشتی جه‌هانی له‌ ناوچه‌گه‌ وه‌بوونه‌ی بوردمان و په‌لاماره‌يل سه‌دام ئه‌را بان كورد و ئاواره‌بوين هه‌واران هه‌زار ژن و مناڵ و پير و په‌ككه‌فتگ.

ئمجا ئه‌و برياره‌ به‌نده‌يل گرنگ له‌تی بوی و له‌وانه‌يش: دامه‌زرانن ناوچه‌ی دژه‌ فڕه‌ی ته‌ياره‌و وازكردن قاپی ئه‌را ريكخرياگه‌يل ئنسانی و ناوده‌وڵه‌تی ئه‌را ده‌سميه‌تداين مه‌ردم كوردستان و وساننه‌وه‌ی سه‌ركوتكاری و په‌لامار ئه‌را بان كورد و داناين مه‌رز ئه‌را سوپای رژيم سه‌دام، ك گشت ئه‌يانه‌ بوينه‌ هووكار دامه‌زرانن ئی هه‌رێم باشووره‌.

وه‌ل ئه‌وه‌يشا زويتريش فره‌نسا له‌ڕوی كلتووريه‌و لانه‌يگ گرينگ بويه‌ ئه‌را كورد و ئينستيتۆی كوردی له‌ پاريس واز بوی ك وه‌ ده‌يه‌ها ساڵ بنگه‌يگ فراوان فه‌رهه‌نگی بويه‌و به‌ش زووان كوردی زويتر له‌ زانكۆی ناودار سۆربون واز بوی و له‌ڕوی ئه‌كاديمييشه‌و خزمه‌تيگ فريه‌ وه‌ زووان و فه‌رهه‌نگ كوردی كردگه‌.

له‌ی دوياخريشه‌ فره‌نسا يه‌كيگ له‌و ده‌وڵه‌ته‌يله‌سه‌ ك زوی باڵوێزخانه‌و نوێنه‌رايه‌تی خوه‌ی له‌ هه‌ولێر واز كرد و قاپی خوه‌ی وازكردگه‌ ئه‌را بته‌وكردن په‌يوه‌نديه‌يل و به‌شه‌ كلتووريه‌گه‌يشی ك ئينستيتۆيی فره‌نسی له‌ هه‌ولێر نوێنه‌رايه‌تی ئه‌كا، يه‌كيگه‌ له‌ ناوه‌نده‌يل فه‌رهه‌نگی فريه‌كاريگه‌ر و چالاك كوردستان، ك هه‌ميشه‌ وه‌ل مه‌ردم كوردستان له‌ خوه‌شی و ناخوه‌شی به‌شداره‌.

وه‌ل ئه‌وه‌يشا فره‌نسا ريز و حورمه‌ت له‌ خه‌بات ژنه‌يل كورديش ئه‌گريد ك وه‌رگری له‌ كۆبانی كردن و سه‌ركه‌فتن له‌بان داعش و بوينه‌ نيشانه‌ی خه‌بات. ئيمه‌ گومان له‌وه ئه‌كه‌يم ك زوورم ده‌وڵه‌ته‌يل وه‌گووره‌ی وه‌خت و به‌رژه‌وه‌ندی بڕيار بيه‌ن، وه‌لی گومان له‌ سووز فره‌نسا نه‌يريم و نه‌خش خوه‌ی وه‌ هه‌ر جووريگ ته‌مام ئه‌كاو ئوميده‌واريم ده‌وڵه‌ت فره‌نسا وڵات جوان و ئازاديه‌يل و شوون ئوميد گه‌ورا بوود ئه‌را ملله‌ت چه‌وسياگ كورد و نه‌خشه‌گه‌ی خوه‌ی وه‌ بريار و پرووژه‌ی گه‌وراتر و گرينگتر ته‌مام بكا.

چيمه‌ن ساڵح

ج . أ