ئه‌ی سياسيه‌يل عراق په‌ند له‌ پياو باوه‌ڕدارو ساده‌ وه‌ربگرن

شفق نيوز

كه‌ين؟ سه‌ره‌تا ئويشم ئی پياو باوه‌ڕداروساده‌ شايسته‌ی پۆست وه‌زيرته‌ندروسيه‌ وه‌گشت ريزو حورمه‌تيگه‌و ك هه‌رچه‌نی دريغی فره‌يگ ده‌رهه‌ق ئی پزيشك كه‌موينه‌ كرديمنه‌ له‌نويسانن ئی باوه‌ته‌ له‌بانی و له‌هه‌مان وه‌خت مه‌رام ئيمه‌يش ئه‌وه‌ نيه‌ له‌شانيه‌ت پزيشكه‌يل تر عراق كه‌مه‌و بكه‌يم وه‌تايبهت پزيشكه‌يل به‌غدا ك هه‌قده‌سيان له‌ په‌يمانه‌ ده‌رچيه‌و گيرفان نه‌خوه‌شه‌يليان ته‌كاننه‌و بار ژيانيان سه‌خته‌و كردنه‌.

 

ئيمه‌ باس له‌و ‌ڕاسيه‌ كه‌يم ك وه‌رجه‌ ساڵيگ وه‌گووش ژنه‌فتيمنه‌ی و ديمنه‌ی چه‌و، ك سه‌ره‌تا له‌خوه‌ما مه‌سه‌له‌ی ئی پزيشكه‌ ته‌نيا قسه‌سه‌و هويچ تر، چوينكه‌ ديارده‌يل فره‌يگ ناشرين له‌عراق وجوود ديرێدو هه‌وه‌جه‌ وه‌ بنياتناين ئه‌خلاقی ديرێد چ وه‌ك تاك چ كوومه‌ڵگا له‌وه‌ر خاتر راسه‌وكردن ئه‌و ديارده‌يل ناپوخته‌ ك يه‌قه‌ی كوومه‌ڵگامان گرتگه‌و چشته‌يل ناسروشتی له‌لی كه‌فێده‌و.

 

ئی پزيشكه‌ ك ريز و حورمه‌تم ئه‌ڕای، پزيشكيگ خاوه‌ن ئه‌زموونه‌و باوه‌ڕنامه‌ی ماسته‌رديرێد، ك ئه‌ڕا ماوی ساڵ ونيميگ هاوسای بويم و خوه‌شاڵ بويم وه‌ديدارو ره‌فيقيكردنی وه‌گشت شانازييگه‌و، ك وه‌ل ئه‌وه‌يشا گشت هاوساو مه‌ردم ئه‌و ناوچه‌ ك له‌تی نيشتويم روی له‌لی كرديان له‌وه‌ر چاره‌سه‌ر نه‌خوه‌شی و ده‌رمان ئه‌ڕايان نويسياگ وه‌بی ئه‌وه‌ك پويل له‌لی وه‌ربگرێد، ئنجا هه‌روه‌ختی نه‌خوه‌شيگيش نيشتياده‌ لای له‌يوا هس كردياد ميوان خاسترين و باوه‌ڕدارترين كه‌سه‌ له‌سفه‌ت ئنسانيه‌ت و دڵسووزی وه‌بی ئه‌وه‌ك چه‌وه‌ڕی هه‌قده‌س شه‌كه‌تی خوه‌ی بكا جوور يزيشكيگ ك هه‌رچه‌نی هه‌ق سروشتی خوه‌ييشه‌ داوای هه‌قده‌س هه‌قانه‌يگ بكردياد، وه‌لی وتياد من له‌سايه‌ی خودا دارنده‌م و هويچ له‌ نه‌خوه‌ش ناتوام ته‌نيا شوكر خودا توام و ئاره‌زوو خاسه‌وبوين گورجيگ كه‌م ئه‌ڕا نه‌خوه‌شه‌يلم.

 

ئنجا ئيمه‌ مه‌راممان ئه‌وه‌ نيه‌ ك يزيشكه‌يل عراق و هه‌ر پزيشك تر له‌جه‌هان هه‌قده‌س هه‌قانه‌ی خوه‌يان نه‌وه‌ن، چوينكه‌ ئی هه‌قده‌س هه‌ق سروشتی خوه‌يانه‌و ده‌سميه‌تيگه‌ ئه‌را گوزران و ژيانيان، وه‌لی داوا له‌ليان كه‌يم دويرو بكه‌فن له‌ ديارده‌يل ئه‌ڵڵاجه‌وی و ته‌ماكاری ناپه‌سه‌ن له‌بان مه‌ردم كه‌مدرامه‌ت و نه‌دارو خودا له‌وه‌رچه‌و بگرن و هه‌ميشه‌ وه‌ وژدانه‌و بنوڕنه‌ حاڵ نه‌خوه‌ش، چوينكه‌ پيشه‌ی پزيشكی پيشه‌يگ خاس ئنسانيه‌ وه‌ پله‌ يه‌ك، هه‌ر له‌وه‌ر ئه‌وه‌يش بڕيگ له‌ پزيشكه‌يل هه‌ن ئه‌گه‌ر بزانن نه‌خوه‌شه‌گه‌ كه‌مده‌س و فه‌قيرحاڵه‌ پويل له‌ليان وه‌رناگرن يا هه‌قده‌س فره‌ كه‌ميگ وه‌رگرن تا په‌يڕه‌و ئه‌و پيشه‌ی ئنسانيه‌ بكاو پيشه‌گه‌ی ناكاده‌ هووكارئه‌را بازرگانيكردن و گرده‌وكردن دارايی فره‌يگ له‌بان هساو نه‌خوه‌شه‌يل.

 

وه‌لی ئی برای پزيشكمانه‌ ك ئی باوه‌ته‌ له‌بانی نويسايم، بيجگه‌ ئه‌خلاق په‌سه‌ن و هه‌وڵه‌ ئنسانيه‌گه‌ی، وه‌ل ئه‌وه‌يشا ئاده‌ميزاديگ ساده‌و باوه‌ڕداره‌و له‌خيزانيگ وه‌ حورمه‌ت و باوگی له‌ رووژگار كويه‌ن مامۆستای زانكۆبويه‌و سه‌رچه‌وه‌يگ تر داهات ديرێدو له‌شوونيگ تره‌و خودا رزقی داگه‌. له‌ڕاسی ئی جووره‌ پزيشكيگ كه‌موينه‌س له‌ی عراقه‌ ك پويل له‌تی بويه‌سه‌ گشت چشتيگ، دوينێد ئاده‌ميزاد له‌ی عراقه وه‌ ئه‌خلاقی يا وه‌ زانستی يا ره‌سه‌نايه‌تيه‌گه‌ی په‌يمانه‌ ناكريه‌ێد‌، به‌ڵكوو وه‌ پويل و دارايی په‌يمانه‌ كريه‌ێد! هه‌ر له‌وه‌رئه‌وه‌يش فره‌يگ له‌ پزيشكه‌يل ترس خودا له‌دڵيان نيه‌و بوينه‌سه‌ تاوانبار و بكوش ئاده‌ميزادو ياسايگ نيه‌ ريگری له‌ ديارده‌يل ناشرينيان بكاو ره‌حم له‌حاڵ نه‌خوه‌ش ناكه‌ن له‌وه‌رخاتر ده‌سكه‌فت زياترله‌سايه‌ی ده‌وڵه‌تيگ ك هويچ ياسايگ له‌تی په‌يڕه‌و ناكريه‌ێدو نه‌خوه‌شه‌يليش له‌تی هويچ ياسايگ نه‌يرن مقه‌يه‌تی له‌ليان بكا له‌ده‌س ئه‌و بكوش و ترۆريسته‌يل پيشه‌ی پزيشكيه‌.

 

ئنجا ئايا قسه‌م په‌سه‌ن كه‌ين ك ئی ئاده‌ميزاد كه‌موينه‌ له‌ی رووژگارمانه‌ شايسته‌ی وه‌رگرتن پۆست وه‌زير ته‌ندروسيه‌و ئی پۆسته‌ هه‌ر لايه‌ق وه‌ خوه‌يه‌ له‌ئاكام ئی كرده‌وه‌يل ئنسانی و پڕ له‌ ئه‌خلاق جوانيه‌، ك ئيمه‌ له‌ی عراقه‌ هه‌وه‌جه‌ وه‌ی جووره‌ پزيشك و نموونه‌يله‌ ديريم تا بوشيمنه‌ گشت جه‌هان ئيمه‌ هيمان له‌ خه‌ير ژيه‌يم و بيلا سياسيه‌يل په‌ند له‌ی جووره‌ پياويگ ساده‌و باوه‌ڕداروه‌ربگرن.

 

نه‌جاح ئه‌لعه‌تيه‌

 

ا. ج