خانه‌قین داواى سستم پترۆدۆلار و داهات گومرگ كه‌ید

شفق نيوز

كوومه‌ڵگاى شارسانى و شماره‌یگ له‌ ڕووشنهویره‌یل شار خانه‌قین داواى سستم پترۆدۆلار كردن ئه‌را قه‌زاى خانه‌قین له‌خاتر ئاوه‌دانكردن و گه‌شه‌كردنى، هه‌ر وه‌ك ئه‌و شاره‌یله‌ ك نه‌فت له‌تیان ده‌ركریه‌ید، و قه‌ره‌بووكردن مه‌ردمه‌گه‌ى له‌و ناهمێرى كردنه‌ ك وه‌دریژى ماوه‌ى حوكم دیكتاتۆرى تویشى هاتن.

نویسه‌ر ڕووژنامه‌نویس ئبراهیم باجه‌ڵان له‌ په‌یوه‌ندییگى وه‌ل ماڵپه‌ڕ شه‌فه‌ق له‌ى باوه‌ته‌ ئویشى:" قه‌زاى خانه‌قین سستم پترۆدۆلار نیه‌گریده‌وه‌ى، بیجگه‌ ناهمى كردنى له‌ داهاته‌یل گومرگ، له‌وه‌ر ئه‌وه‌ شماره‌یگ له‌ ڕووشنهویره‌یل و نوێنه‌ره‌یل ڕیكخریایه‌یل كوومه‌ڵگاى شارسانى و كه‌سایه‌تیه‌یل شاره‌گه‌ داواكردن سستم پترۆدۆلار شار خانه‌قینیش بگریده‌وه‌".

ئه‌وه‌یشه‌ ڕووشنه‌وكرد ك :"ئى داواكاریه‌یله‌ له‌ شوون ئه‌وه‌ هاتیه‌ ك مه‌ردم ئى شاره‌ داواى قه‌ره‌بووكردنیان كه‌ن له‌و زه‌ره‌ده‌یله‌گ تویشیان هاتیه‌ جوور ویرانكردن ئاواییه‌گان و باركردن وه‌ مه‌ردمه‌گه‌یان له‌ئان جه‌نگ ناوبه‌ین عیراق و ئیران". و ئه‌و داواكاریه‌یله‌ وه‌ ڕه‌وا وه‌سفكرد. و جه‌ختیش له‌بان ئه‌وه‌كرد ك :" ئه‌یه‌ یه‌كم جار نیه‌ ك هاووڵاتیه‌یل قه‌زاى خانه‌قین داواى ئى سستمه‌ كردنه‌، به‌ڵكوو وه‌ ِیگه‌ى كه‌ناڵه‌یل ڕه‌سانن و پیشكه‌شكردن یاداشتنامه‌یل ڕه‌سمى داوا له‌ لایه‌نه‌یل په‌یوه‌ندیدار كردیمنه‌، وه‌لى تا ئیسه‌یش هویچ جوواو ئیجابییگمان نه‌دریاس".

باجه‌ڵان داواكرد ك:"ئه‌نجوومه‌ن وه‌زیره‌یل وئه‌نجوومه‌ن پارێزگا و وه‌زاره‌ت نه‌فت بانه‌ هاناى ئى داواكاریه‌یلیانه‌ له‌خاتر ئاوه‌دانكردن قه‌زاى خانه‌قین".

شایان وتنه‌ ك ناوچه‌ى نه‌فتخانه‌ یه‌كیگه‌ له‌ ناوچه‌یل سنوورى یا حدوودى سه‌ر وه‌ قه‌زاى خانه‌قین و مه‌ردم نیشته‌جاى له‌ هاوڵاتیه‌یل كورد بوین؛ وه‌لى له‌ ئان جه‌نگ هه‌یشت ساڵه‌ى ناوبه‌ین عیراق و ئیران، وه‌ گووره‌ى ئه‌و سیاسه‌ت ته‌عریبكردنه‌ ك ڕژیم وه‌رین په‌یڕه‌ویى كردیاد ئى مه‌ردمه‌ قاودریان، و له‌ ساڵه‌یل بیس سه‌ده‌ى وه‌رین كۆمپانیایه‌یل نه‌فتى به‌ریتانى چه‌ن كێڵگه‌ یا حقل نه‌فتى له‌ ئى ناوچه‌ دینه‌سه‌وه‌، ك وه‌ده‌وڵه‌مه‌نترین ناوچه‌یل نه‌فتى پارێزگاى دیاله‌ شماره‌كریه‌ید.

له‌لاى خوه‌یه‌و قسه‌كه‌ر وه‌ناو وه‌زاره‌ت نه‌فت عاصم جهاد له‌ په‌یوه‌ندییگى وه‌ل ماڵپه‌ڕ شه‌فه‌ق جه‌خت له‌ بان ئه‌وه‌كرد ك :"سستم پترۆدۆلار هه‌رچى پارێزگایه‌ گریده‌وه‌ و له‌وانه‌یش پاڕێزگایه‌یل هه‌رێم كوردستان، و یه‌یشه‌ پشتگیرى و كوومه‌كیگه‌ ئه‌رایان".

و زیاتریش وت:" ئه‌و بڕ پویله‌ ك سستم پترۆدۆلار ته‌رخانى كردیه‌ وه‌گووره‌ى ئه‌وله‌ویات پارێزگاگه‌ خه‌رج كریه‌ید له‌ چوارچیوه‌ى ئه‌و پرۆژه‌یل و پلانه‌یل ئاماده‌كریایه‌ئه‌را پیشخستن لایه‌ن خزمه‌تگوزارى".

ئه‌وه‌یشه‌ ڕووشنه‌وكرد ك :" خانه‌قین به‌شیگه‌ له‌ پارێزگاى دیاله‌ وئى پارێزگا سستم پترۆدۆلار گریده‌وه‌ى".

له‌باوه‌ت قه‌زایه‌یل به‌رهه‌مهاوه‌ر نه‌فت و ئه‌وله‌ویه‌تیان له‌ وه‌رگردن ده‌رماڵه‌ یا مخصصات سستم پترۆدۆلار، جهاد جه‌خت له‌بان ئه‌وه‌كرد ك :" حكوومه‌ت مه‌حه‌لى ئه‌و پارێزگا ك قه‌زا و ناحیه‌یل به‌رهه‌مهاوه‌ر نه‌فت هاتى، په‌یوه‌ندى وه‌خوه‌یه‌و دیرى چوین خه‌رج ئه‌و پویله‌ بكه‌ید ك له‌ى سستمه‌ كه‌فیده‌ ده‌سى، و ته‌نیا ئه‌را ناوه‌ند پارێزگاگه‌ نیه‌، به‌ڵكوو قه‌زایه‌یل و یه‌كه‌یل ئیدارییش گریده‌وه‌".

ئاماژه‌یش وه‌وه‌دا ك:" وه‌زاره‌ت نه‌فت لایه‌نیگ جیوه‌جیكه‌ره‌ و خاوه‌ن بڕیار نیه‌ له‌ى باوه‌ته‌، به‌ڵكوو پارێزگایه‌یل به‌رهه‌مهاوه‌ر داوا له‌ ئه‌نجوومه‌ن وه‌زیره‌یل كه‌ین تا له‌ى سسته‌مه‌ به‌شداریان بكه‌ید".

شایان وتنه‌ ك سستم پترۆدۆلار یه‌ك دۆلار له‌ نرخ یه‌ك به‌رمیل نه‌فت ته‌رخان كه‌ید ئه‌را پارێزگایه‌یل به‌رهه‌مهاوه‌ر و ئى سستمه‌ هه‌ریه‌ك له‌ پارێزگایه‌یل كه‌ركووك و به‌سره‌ گریده‌وه‌.