ئايا نۆينه‌رێگ كورده‌يل فه‌يلی به‌شداری له‌ كۆنگره‌ی نيشتمانی ئه‌كا!؟

شفق نيوز

داوا كرديه‌ تا ئه‌را ته‌مام كردن قه‌يران ئێرنگه‌ی سياسی وڵات و چاره‌سه‌ری ناكووكيه‌يل ناونی فراكسيۆنه‌يل سياسی له‌ نيشتنێگ نيشتمانی به‌شداری بكه‌ن.

 

قه‌يرانێ ك دويای تۆمه‌تباربوين جيگر سه‌رۆك كۆمار(تارق هاشمی) و ده‌س داشتن خوه‌ی و حمايه‌يل(باديگارده‌يل) له‌ ئه‌نجامدان پلاماره‌يل ترۆريستی له‌ ناو وڵات و  ده‌رچێن نۆينه‌ره‌يل فراكسيۆن عيراقيه له‌ په‌رله‌مان وده‌وڵه‌ت، ره‌سيه‌ ئاستێگ به‌رز.

ده‌وڵه‌ت عيراق ئه‌را ئاماده‌كاری نيشتنێگ نيشتمانی و دياری كردن ئه‌و باس و مه‌سه‌له‌يله‌گ له‌ ئه‌ی نيشتنه‌ ئه‌خريه‌ده‌ وه‌رباس، لێژنه‌ی دامه‌زرانيه‌.

كارناسه‌يل هانه‌ سه‌ر ئه‌ی باوه‌ڕه‌ ك ئه‌ی نيشتنه‌ و ئه‌نجامه‌يلێگ له‌لێ وه‌ده‌س ئه‌ياد، پرۆسس سياسی وڵات تا چه‌ن ساڵ ئاينده‌ دياری ئه‌كا(وه‌ تايبه‌ت دويای ده‌رچێن هێزه‌يل ئه‌مريكی ك له‌ ئاخره‌يل ساڵ ٢٠١١ ئه‌نجام بوی).

له‌ ئه‌ی نيشتنه‌، ناكووكيه‌يل و كێشه‌يل سياسی وڵات خريه‌نه‌ وه‌رباس و شيه‌وكردن.

له‌ باوه‌ت ئه‌ی رويدايه ك ئه‌خوازێ روی به‌ێد‌، يه‌ كه‌فته‌و هويرمان ك كورده‌يل فه‌يلی وه‌ ته‌مامی له‌ نيشتنه‌يلێگ ك چاره‌نويس عيراق دياری ئه‌كا، نيه‌سان!. يه‌يشه‌ له‌ وه‌ختێگه‌، ئه‌و دوينيمن ك نۆينه‌ره‌يلێ له‌ كه‌مينه‌يل وڵات له‌ ئه‌ی نيشتنه‌ به‌شدار دۆن و...تد.

ئه‌ی مه‌سه‌له‌ وه‌ شێوه‌ێگ نگاتيڤ ئه‌را بوين كورده‌يل فه‌يلی له‌ ده‌وڵه‌ت عيراق و  په‌رله‌مان و ته‌مامی وه‌زاره‌ته‌يل و ئيداره‌يل ده‌وڵه‌تی ك وه‌ په‌ی رێكه‌فتنێ نيشتمانی له‌ ناونی فراكسيۆنه‌يل سياسی وڵات به‌شه‌و كرياس، كارگه‌ری ئه‌كا و كورده‌يل فه‌يلی له‌ پۆسته‌يل ده‌وڵه‌تی دويره‌و ئه‌خاد.

ئه‌ی چنه‌ چشتێگ ته‌نانه‌ت وه‌ هه‌ڵه‌وگه‌ردانن مافه‌يل كورده‌يل فه‌يلی ك له‌ سه‌رده‌م رژيم به‌عس ژێرپا كرياس، كارگه‌ر ئه‌ده‌ی.

ئه‌و چشته‌گ كورده‌يل فه‌يلی وه‌ ده‌سێ هارودنه‌، يه‌ بويه‌ ك دادگای باڵای تاوانه‌يل وڵات، مه‌سه‌له‌‌ی كورده‌يل فه‌يلی وه‌ تاوان دژ وه‌ مرۆڤايه‌تی و قه‌ل و قام دڕندانه‌ی رژيم به‌عس حوكم له‌ سه‌رێ دايه‌.

ئويشن، ئه‌ی نيشتن سياسی نيشتمانيه‌ وه‌ قه‌يرانه‌يل ئيسه‌ وڵات كارگه‌ر ئه‌ده‌ی و  ته‌ماميان ئه‌كا، خوو ئمجا نۆينه‌ر كورده‌يل فه‌يلی له‌ ئه‌ی نيشتنه‌ هانه‌كوو!؟!.

يه‌ پرسێگه‌ ك ئاراسته‌ی‌ وه‌رێوه‌ره‌يل ئه‌ی نيشتنه‌و كورده‌يل فه‌يلی كه‌م و له‌ليان پرسيارێ كه‌م و...!؟.

د. مونیره ئوميد