وڵاتيگ سه‌قه‌ت

شفق نيوز

 

وه‌رجه‌ ساڵه‌يليگ له‌ڕی رووژنامه‌گه‌ريه‌و ئه‌وه‌ تاقيه‌و كردم له‌ وه‌رانوه‌ر جايه‌ڵ جوانيگ ك ده‌سيگی هه‌ر له‌ مناڵيه‌و له‌ده‌س داويد و بويشمه‌پی ت به‌هره‌مه‌ن و تواناداريد، يه‌يش له‌وه‌خت ديدارم وه‌ليا له‌ په‌يمانگه‌ی كه‌مئه‌ندامه‌يل له‌وه‌ختيگ ك وه‌ په‌نجه‌يل پای له‌بان ئامێر چاپكردن نويسيادن ئمجا دويای بڵاوكردنه‌وه‌ی باوه‌ته‌گه‌ نامه‌يگ سوپاسگوزاری ئه‌رام كلكرد ك وه‌پای نويسرياويدو داوا له‌ليم كرد كاريگ ئه‌رای بوينمه‌و له‌ڕی رووژنامه‌، ئمجا منيش نامه‌گه‌ی بڵاوه‌و كردم و ده‌زگای چه‌وديری كوومه‌ڵايه‌تی جواويه‌و داو له‌و ده‌زگا دامه‌زريا جوور نويسه‌ر له‌بان ئامێر چاپكردن.

دويای ساڵه‌يليگ وه‌ ريكه‌فت چه‌وم كه‌فته‌ ئه‌و جايه‌ڵ جوانه‌و ديمه‌ی بويه‌سه‌ وه‌رپرس به‌ش چاپكردن و له‌ هه‌مان وه‌خت دوكانيگيش له‌ نزيك ماڵه‌گه‌ی واز كردويد ئه‌را خاسه‌وكردن ئامێره‌يل كاره‌بايی وه‌ (پا)ی، وه‌ل ئه‌وه‌يشا به‌هره‌گه‌يشی خاستره‌و بويد له‌ بوار ره‌سم و نويساننيش. ئمجا يه‌يش له‌هويرم چی بوشيمه‌ی ك ئه‌و جايه‌ڵ جوانه‌ له‌ڕووژيگه‌و ك مناڵتر بوی و ناسيمه‌ی تا وه‌ختيگ گه‌ورا بوی زه‌رده‌خه‌نگ و ئوميدی وه‌ ژيان هويچ وه‌ختيگ له‌ روخساری نه‌وڕياو له‌ ديدار دويه‌مم وه‌ليا وته‌پيم: يا ژن خوزام يا گه‌شت ئه‌كه‌م، ئه‌ويش دويای گه‌ورابوين هه‌ر شه‌ش براو خوه‌يشكه‌يلی ك ئه‌و ئمايه‌تيان كرد. منيش داوای سه‌ركه‌فتن ئه‌رای كردم و هيشتمه‌ی خوه‌يه‌و ئه‌را جيوه‌جيكردن ئه‌زره‌ته‌يلی.

ئمجا له‌وه‌ختيگ ك وڵاته‌يل خوه‌رئاواو عه‌ره‌بی لێدوان پيشكه‌ش كرديان له‌بان بار عراق دويای ساڵه‌يليگ له‌ ده‌سڵات مالكی و چوين بويه‌ ميرات قورسيگ له‌بان شان ئه‌وانه‌گ وه‌رگه‌ی ئه‌كرن، ئه‌و جايه‌ڵ جوانه‌ كه‌فته‌ هويرم ك ژيانی چوينه‌ له‌ی وڵاته‌، ك مه‌ردمانيگ وه‌ وڵات شيوياگ تاريفی ئه‌كه‌ن و مه‌ردمانيگيش جوور عراق ئه‌وسا ته‌ماشای ناكه‌ن، هه‌ر وه‌و خاتريشه‌ منيش خه‌ياڵی وه‌ وڵاتيگ سه‌قه‌ت كردم ك هه‌وه‌جه‌ وه‌ موجزه‌يگ ديريد له‌و سه‌قه‌تيه‌ قورتار بدێ و ريڕه‌وی وه‌ سه‌ركه‌فتگ ته‌مام بكا، جوور ئه‌و جايه‌ڵ جوان كه‌مئه‌ندامه‌ ك چوين چه‌وه‌ڕی ده‌سميه‌ت راسكانيه‌ ئه‌را جيوه‌جيكردن ئه‌زه‌ره‌ته‌يلی.

ئيمه‌ ئمڕوو له‌ جه‌هان پڕ ژان و غه‌ڵه‌ت و شه‌كه‌تييگ ژيه‌يم، وه‌لی يه‌يش مانای ئه‌وه‌ نيه‌ بمريم، چوينكه‌ گچت چشتيگ شايسته‌ی ئه‌وه‌سه‌ له‌نوو په‌يا بدێ و ئاده‌ميزاد عراقييش هيمان ئازاس له‌ ژيان و توانای ئه‌نجامداين كار ديريد وه‌بان ئه‌و هه‌مگه‌ مه‌ترسی و سزاو فشاره‌يله‌ ك هاته‌سه‌ تويشی، وه‌لی وه‌ل ئه‌وه‌يشا هه‌وه‌جه‌ وه‌ يارمه‌تی و هانداين ديريد، بيجگه‌ ئه‌وه‌يش بنيات نيشتمانيش وه‌بی بنيات هاووڵاتی ته‌مام نادێ و بنيات هاووڵاتييش وه‌ دابينكردن ژيانيگ پڕ كه‌رامه‌ت ته‌مام ئه‌دێ، دی ئه‌وسا وڵاتيش كه‌مته‌رخه‌م نادێ و رووڵه‌يليشی توانای ئاڵشتكردن ئه‌زره‌ته‌يليان ديرن ئه‌را راسی و هه‌ر يه‌يش چه‌وه‌ڕی له‌ حكوومه‌ت ئاينده‌ ئه‌كه‌يم ك ده‌س يارمه‌تی دريژ بكا ئه‌را ملله‌ته‌گه‌ی و وڵات له‌و سه‌قه‌تيه‌ قورتار بكا.

عه‌دويه‌ ئه‌لهيلالی

ج . أ