دبلۆماسیه‌ت و رویداگه‌یل سه‌ده‌ی بیس

شفق نيوز

  سه‌ده‌ی بیس وه‌ سه‌ده‌ی رویداگه‌یل گه‌وراو گرینگ دانریه‌ید، له‌وه‌ر ئه‌وه‌ك له‌ی سه‌رده‌مه‌ چه‌نه‌ها جه‌نگ و كاولكاری و زه‌ره‌دبه‌خش ئه‌را ئه‌و وڵاته‌یله‌ داشتگه‌ ك به‌شداری جه‌نگ كردنه‌، چوینكه‌ دویاخر زه‌ره‌د فریه‌یگ وه‌پیان ره‌سیه‌ له‌ روی ماددی و مه‌عنه‌وی و بویه‌سه‌ هووكار كزبوین هیزه‌یلیان. ئه‌ویش نه‌ك هه‌ر ته‌نیا هیز سه‌ربازی زه‌ره‌د له‌لی كه‌فته‌و ئه‌را ده‌وڵه‌ت، به‌ڵكوو له‌ بوار سیاسی و ئابووری و كلتووری و رووشنهویری و كوومه‌ڵایه‌تییش وه‌ ئه‌نازه‌ی خوه‌یان به‌شیگ له‌و زه‌ره‌ده‌یله‌ كه‌فته‌ وه‌ریان.

هه‌ر له‌وه‌ر ئه‌وه‌یش له‌وه‌خت جه‌نگ ، دوینیم ك دانیشتن و گفتگوو یا ره‌سین وه‌ ریككه‌فتن فریه‌ كزه‌و نه‌خش دبلۆماسیه‌ت له‌تی وه‌ره‌و كزی چوود. ئنجا وه‌شیوه‌یگ گشتی كار دبلۆماسی هووكار یه‌كه‌م جیوه‌جیكردن سیاسه‌ت ده‌یشته‌، وه‌تایبه‌ت له‌وه‌خت ئاشتی.

مانای ئه‌وه‌سه‌ كار دبلۆماسی وه‌رجه‌ سه‌ده‌ی بیس له‌ناونی ده‌وڵه‌ته‌یل گه‌وراهیز وه‌ شیوه‌یگ ئاشكرا بویه‌، یه‌یش ته‌نیا له‌وه‌ر مقه‌یه‌تیكردن له‌ به‌رژه‌وه‌ندیه‌یل تایبه‌ت خوه‌یان، وه‌لی زه‌ره‌دمه‌ن سه‌ره‌كی ده‌وڵه‌ته‌یل بویچگ بوینه‌ ك هاوپه‌یمانی ئه‌و هیزه‌یله‌ نه‌وینه‌.

وه‌ل ئه‌وه‌یشا ساڵه‌یل ناونی هه‌ردوگ جه‌نگه‌يل جه‌هانی، قوناغ نه‌مه‌ندن ئمپراتۆریه‌ته‌یل بوی و په‌ره‌سه‌ندنیگ لۆجیكی و ئایدۆلۆجیه‌یل تازه‌ بوی و ده‌یه‌یل سه‌ره‌تای سه‌ده‌ی بیس ئاڵشتكاری فریه‌یگ له‌ دبلۆماسیه‌ت وه‌ل خوه‌یا هاورد، ئنجا له‌ دید رای گشتیه‌و زوورم جه‌نگه‌یل له‌وه‌ر غه‌ڵه‌ت دبلۆماتكاره‌یل و ئه‌و ریككه‌فتننه‌یل ژیر وه‌ژیره‌ ك ئمزای كردیان په‌یا بوی. هه‌ر وه‌و خاتریشه‌ له‌ ڕی ئاڵشتكاری دبلۆماسیه‌ته‌و تویه‌نریا ری له‌ كه‌فتنه‌وه‌و قه‌ومیان كاره‌ساته‌یل بگیریه‌ید.

رێبین عه‌بدلڕه‌حمان

ج . أ