چوين كه‌ڵك له‌ ئه‌زموون عراق وه‌ربگيريه‌يد؟

شفق نيوز

راسييگ هه‌س حاشا له‌لی ناكريه‌يد، ك ئه‌ويش ئه‌وه‌سه‌ هه‌رێم كوردستان تا ئمڕوو فريه‌جار بويه‌سه‌ قوربان هه‌ڵه‌يل حكوومه‌ت به‌غدا چ سياسی چ ئابووری بويه‌، مانای ئه‌وه‌سه‌ له‌يه‌كه‌وداين گرفته‌يل جيوه‌جی ئه‌كريه‌يد و له‌ ئاكاميش چه‌ن ته‌وه‌ريگ ئه‌گريده‌ خوه‌ی و له‌وانه‌يش: يه‌كه‌م قه‌يران ئنسانی و ئاكامه‌يله‌ له‌ جامه‌ك ئابووری.

زويتر هاووڵاتيه‌يل ئی وڵاته‌ له‌وه‌ر بار سياسی روی كرديانه‌ وڵاته‌يل تر، تاڕاده‌يگ له‌ ديد وڵاته‌يل جه‌هان كووچبه‌ره‌يل عراقی وه‌ يه‌كيگ له‌ كيشه‌يل دونيا شمارياو شماره‌يان مليۆنه‌ها كه‌س بوی و وه‌رده‌واميش روی له‌ زيايبوين كردياد.

له‌ كوردستانيش هه‌مان مه‌سه‌له‌ و هه‌مان كووچكردن له‌يوا له‌لی هات شماره‌ی كووچبه‌ره‌يل بويه‌ ئه‌وه‌نه‌ی نزيكه‌ی شماره‌ی مه‌ردم هه‌رێم، ك خوه‌ی بنه‌مای مه‌سه‌له‌گه‌ نه‌وين ئاسايش و سه‌ڵامه‌تی و خراوی بار دارايی بوی و ئيسه‌يش هه‌مان چشت دوباره‌وه‌ بويه‌، وه‌لی ئيجاره‌ هه‌رێم كوردستان بويه‌سه‌ گه‌وراترين شوون ئه‌را ئاواره‌يل سورياو كۆبانی و شه‌نگاڵ و باشوور و ناوڕاس عراق، ك وه‌ گه‌وراترين مه‌نزڵگای كووچبه‌ره‌يل دانريه‌يد.

ته‌وه‌ر دويه‌م باوه‌تيگ ئه‌گريده‌ خوه‌ی، ك ئه‌ويش جه‌نگ كيشمه‌كيشه‌يل ساڵ ٢٠٠٣و دويا رمانن رژيم وه‌رين ك ئه‌مريكا وه‌ مه‌هانه‌ی هاوكاری و پشتگيری هاته‌ ناو عراق، وه‌لی له‌ وه‌رانوه‌ر ئه‌وه‌يش له‌ساڵ ٢٠٠٧ خه‌رج ئه‌و جه‌نگه‌ وه‌ ١٩٦ ترليۆن دۆلار مه‌زه‌نه‌ كريا له‌ عراق و ئه‌فغانستان و له‌ ساڵ ٢٠٠٨يش خه‌رجه‌يلی جوور جه‌نگ فێتنام له‌لی هات ك خوه‌ی دا له‌ نزيكه‌ی ٣.٢ ترليۆن دۆلار.

له‌ ساڵ ٢٠٠٨ له‌وه‌ختيگه‌و ك ئه‌مريكا بڕياردا ده‌ربچێد، وه‌لی حكوومه‌ت به‌غدا وه‌ فه‌رمی و نافه‌رمی چه‌نه‌ها كه‌س ئه‌و ريكخرياگه‌يله‌ له‌ عراق هيشته‌و ئه‌را مه‌سه‌له‌ی مقه‌يه‌تيكردن خوه‌يان و خه‌رج ئه‌و كاره‌يليشه‌ نزيكه‌ی يه‌ك مليار و ٢٠٠مليۆن دۆلار بوی، مانای ئه‌وه‌سه‌ تا ئمساڵ ئه‌و ريژه‌ شايه‌ت بڕه‌سيده‌ نيمه‌ی ريژه‌ی بودجه‌ی گشت هه‌رێم كوردستان!!

په‌ره‌سه‌ندن گه‌ناته‌كاری و خراوی بار دارايی گشتی و نه‌وين ياساو خراوی ئاسايش و كيشمه‌كيش و حزبايه‌تی و تايفه‌گه‌ری و فه‌وتانن سامان گشتی بوينه‌ خاسترين هووكاريگ ئه‌را سه‌رهه‌ڵداين ريكخرياگه‌يل ترۆريستی له‌ عراق، ك جی داخه‌ ئيسه‌ كورد بويه‌سه‌ قوربانی ئه‌و ركخرياگه‌يله‌و تويش جه‌نگ داعش هاتگه‌.

مانای ئه‌وه‌سه‌ ئه‌گه‌ر به‌راورديگ وه‌ ساڵه‌يل وه‌رين بكه‌يم وه‌گووره‌ی راپۆرته‌يل ئابووری عراق، تويش مه‌ترسی ئه‌وه‌ ئه‌يه‌يم ك ئايا هاوكاريه‌يل كوردستانيش له‌ جه‌نگ داعش چ ئاكام و قيرانيگ ئابووری له‌لی ئه‌كه‌فيده‌ه‌و؟ ئه‌ی ئه‌گه‌ر خه‌رج ساڵانه‌ی يه‌ك سه‌رباز ئه‌مريكی وه‌رجه‌ ٨ ساڵ ٢٧٥ هه‌زار بوی، ئه‌ی ئيسه‌ چه‌نيگه‌؟ مانای ئه‌وه‌سه‌ ئيسه‌ كوردستان ها وه‌رده‌م گه‌وراترين تاقيكردن مێژوو، ئمجا لاوه‌كردن له‌ هه‌ڵه‌يل عراق و په‌ندوه‌رگرتن له‌ خراو وه‌ڕيه‌وبه‌ردن ئداره‌يليان خاسترين ئه‌زموونه‌ ئه‌را بنياتنانه‌وه‌ی بنه‌ڕه‌تيگ سه‌ركه‌فتگ چ له‌ڕوی سياسی يا ئابووری.

شیلان بیبانی‌

ج . أ