فه‌يله‌يل+ گله‌يی و مناكردن=؟

شفق نيوز

دوسيه‌يل فه‌يلی پڕ له‌ زه‌ره‌ده‌يل يه‌ك له‌شوون يه‌ك، له‌ دوباره‌كرده‌نه‌وه‌ی هه‌ڵوژانن كه‌سه‌يل سه‌رچه‌وه‌ گرتگه‌ وه‌ل ريڕه‌و كاره‌يل، ك هه‌ر وه‌و خاتريشه‌ هه‌ر ده‌سكه‌فتيگيش ئه‌دێدی ده‌سكه‌فت ئه‌را كه‌سه‌گه‌ نه‌ك ئه‌را پيكهاته‌گه‌و هه‌ر پابه‌ندييگيش جوور ئه‌وه‌گ ئويشنه‌ی له‌ ئاخره‌و ئه‌چێده‌ خانه‌ی حزبی و چينايه‌تی و پابه‌نديمان پيشه‌يی نادێ، چوينكه‌ بونيه‌ت كار سياسی له‌ عراق له‌بان ئی بنه‌ماسه‌، ئاكام تريش له‌ ئيچنه‌ باريگ ئه‌وه‌سه‌ ك ره‌زايه‌تی گشت رينمايه‌يل فه‌يلی له‌بان به‌ش خوه‌ی نيه‌ له‌ ده‌زگايه‌يل ده‌وڵه‌ت و رۆڵی له‌ناو كۆمه‌ڵگا، وه‌ مانايگ تر زوورميان ناڕازيين، هه‌ر له‌وه‌ر ئه‌وه‌يش وه‌رپرسيارێتی له‌ ديد فه‌يلی ئمتيازات كه‌سيه‌ نه‌ك خزمه‌ت.

ئه‌يه‌ سێ خول هه‌ڵوژاردنه‌ له‌بانمان گوزه‌ر ئه‌كاو ئاخرينيان وه‌ به‌شداری ٢٢٧ حزب و قه‌واره‌ی سياسی بوی ك ركابه‌ری له‌بان ٣٢٨ كورسی نوێنه‌رايه‌تی كردن و به‌ش فه‌يليه‌يل له‌تی نه‌وی، هه‌ڵوژاردنيش پرووسه‌يگ سياسيه‌ ك هه‌رچه‌نی له‌ هه‌رێم كوردستان يا له‌ به‌غدا بوود، هاووڵاتی فه‌يلی له‌جيای ئه‌وه‌گ گشت توانايه‌يلی بووسنێد خواست ئه‌وه‌سه‌ داوای پشتگيری بكاو هاوپه‌يمان دروس بكا وه‌گووره‌ی ديد راده‌ی به‌شداری باوه‌ته‌گه‌ له‌ ته‌رازوی پرووسه‌ی سياسی و كيشه‌يش نيه‌ ئه‌گه‌ر سه‌ر وه‌هه‌ر لايه‌نيگ سياسی بدێ، وه‌تايبه‌ت ئه‌گه‌ر ئه‌و لايه‌نه‌ پشتگيری مه‌عنه‌وياتی كرد.

هه‌روه‌ختيگيش ك قسه‌ له‌بان ماف و داواكاريه‌يل ره‌وامان ئه‌كه‌يم، وه‌ ئاشكرا باسی ئه‌كه‌يم، وه‌لێ مه‌سه‌له‌ی ته‌وافقات و هاوپه‌يمانێتيه‌يل سياسی وه‌ نائاشكرا ئه‌نجام ئه‌گرێد و ئيمه‌يش ته‌نيا زه‌ره‌دمه‌ن نييم له‌ خوله‌يل وه‌رين، به‌ڵكوو حزب و قه‌واره‌يليگ كويه‌نيش هه‌ن تويش هه‌مان چاره‌نويس هاتن و بڕيگ خريانه‌سه‌ پاڵ"ئه‌بو عه‌لی سينا"ى حه‌كيم ك بايه‌سه‌ له‌لی نه‌ف وه‌ربگريم ئه‌را واقعمان ك له‌تی ئويشن: ئه‌گه‌ر هه‌زار ده‌سپيچگيش ئه‌را هه‌ڵه‌يگ باريمنه‌و ‌ئاكاكه‌گه‌ی ئه‌دێده‌ ١٠٠٠ و يه‌ك هه‌ڵه‌.

ئمڕوويش رووڵه‌يل پيكهاته‌گه‌ زووان حاڵيان گله‌يی و مناكردنه‌ له‌بان وه‌رپرسه‌يل و چه‌وديريكه‌ر دوسيه‌يليانن، ك يه‌يش ئاكام دوباره‌كردنه‌وه‌ی شيواز ئه‌و وه‌رپرسه‌يله‌سه‌ له‌ كه‌سه‌ل وه‌رجه‌ خوه‌يان، ئمجا له‌جيای ئه‌وه‌گ بمينيم له‌ وه‌رده‌وامی ئه‌و گله‌يی و مناكردن و به‌رزه‌و كردنه‌، بايه‌سه‌ ناچار خوه‌مان بكه‌يم له‌بان هويره‌وكردن وه‌ شيواز فكره‌يلمان و ريڕه‌و كاره‌يلمان، وه‌نا مه‌ندنه‌وه‌مان له‌بان هه‌مان قه‌وان كويه‌ن سازيگ ئختياريه‌ ك خوه‌مان رازييم وه‌پی باريمنه‌ بان خوه‌مان.

عه‌لی حسێن فه‌يلی