رازييد دويه‌تيگ له‌ خوه‌د گه‌وراتر بخوازيد؟

شفق نيوز

مه‌سه‌له‌ی ژن و ژنخوازين له‌ كوومه‌ڵگای خوه‌رهه‌ڵاتی وه‌گشتی و كوومه‌ڵگای كورده‌واری خوه‌مانی وه‌تايبه‌ت تائيسه‌يش په‌يوه‌سه‌ وه‌ بڕيگ نه‌ريت په‌يڕه‌وكرياگ و حاڵه‌ته‌يل مه‌رزدار، ك جی داخه‌ يه‌يش زه‌ره‌ديگ تر ره‌سانه‌سه‌ هوير و ئحساس و تا ڕاده‌يگيش به‌شيگ له‌ سايكۆلۆجيه‌ت دويه‌ته‌يل و ئافره‌ته‌يل.

له‌ دونيای هاوسه‌رگيری بڕيگ مه‌رج و مه‌رز و مه‌دره‌ك هه‌ن بوينه‌سه‌ به‌ڵگه‌يگ بنه‌ڕه‌تی ئه‌را دياريكردن و هه‌ڵوژانن هاوسه‌ر ژيان و زوورم جايه‌ڵ جوانه‌يلمان وه‌ چه‌و گرينگيه‌و ته‌ماشای ئه‌كه‌ن وه‌خاتر رازيكردن ئه‌قڵيه‌ت وه‌جی مه‌ندگ و مه‌رام خيزانه‌يليان، ك ئه‌ويش ئه‌وه‌سه‌ مه‌گه‌ر وه‌ ريكه‌فت بوينيد كوڕيگ جايه‌ڵ جوان دويه‌تيگ له‌خوه‌ی گه‌وراتر له‌ عومر هه‌ڵوژنيد ئه‌را هاوسه‌ر ژيانی، چوينكه‌ وه‌ گووره‌ی بڕيگ له‌ رينمايی و مه‌رجه‌يل كوومه‌ڵايه‌تی دوياكه‌فتگ خواسته‌ ك عومر دويه‌ته‌گه‌ له‌ عومر كوڕه‌گه‌ گه‌وراتر نه‌ود! هه‌ر وه‌و خاتريشه‌ دوينيد فريه‌جار ته‌نيا گه‌وار دويه‌ته‌يل بوونه‌ قوربانی و زه‌ره‌دمه‌ن ده‌س ئه‌قڵيه‌ت بی به‌زه‌يی و زيايبوين ريژه‌ی جيايی وته‌ڵاق له‌ سه‌رده‌م ئمڕوو.

ئيمه‌ ئه‌گه‌ر ته‌ماشای شه‌رع و ره‌فتار موحه‌مه‌د په‌يغه‌مبه‌ريش (س . خ)بكه‌يم، ئه‌و په‌يغه‌مبه‌ر خودا ١٥ ساڵ له‌ خه‌ديجه‌ی دويه‌ت خوه‌يلد بويچگتر بوی هه‌نای خوازيه‌ی، چوينكه‌ په‌يغه‌مبه‌ر عومری ٢٥ ساڵ و خه‌ديجه‌ ٤٠ ساڵان بوی، يه‌يش له‌وه‌ختيگ ك هويچ كتاويگ ئاسمانييش ريگر نيه‌ له‌وه‌رده‌م مه‌سه‌له‌ی عومر ئاده‌ميزاد ئه‌را هه‌ڵوژانن هاوسه‌ر ژيان.

ئمڕوو له‌ هه‌ر جايه‌ڵ جوانيگ بپرس ك ئايا رازييد دويه‌تيگ له‌خوه‌د گه‌وراتر بخوازيد، وه‌پيد ئويشيد" ئه‌را من چه‌مه‌ دويه‌تيگ له‌خوه‌م گه‌وراتر بخوازم؟" يا شايه‌ت بويشيد" ئه‌را ژن بڕياگه‌" يا " دويه‌ت قڕانه‌"و قسه‌يل تر گوزارش كرياگ ناو كوومه‌ڵگا.

وه‌لی ئه‌وه‌ك راسيد بوود ئيجووره‌ ره‌ته‌وكردن و گوزارشيگ له‌ ده‌م جايه‌ڵه‌يل و خيزانه‌يليان وه‌تايبه‌ت ژنه‌يل كوومه‌ڵگا زوڵمكردنه‌ له‌ ماف ئافره‌ت و شايه‌ت جارجاريگيش ئه‌گه‌ر حاڵه‌تيگ له‌ خوه‌شه‌ويسی له‌ناونی كوڕ ودويه‌تيگيش په‌يا بوود و عومر كوڕه‌گه‌ بويچگتر بوودو ئاكام ئه‌و خوه‌شه‌ويسيه‌ له‌ قوناغ مه‌جازی ئاڵشت بوود ئه‌را قوناغ راسی و پاكی و بيگه‌ردی له‌ی حاڵه‌ته‌ ئه‌و كوڕه‌ له‌وه‌ر تير وتانه‌ی مه‌ردم كوومه‌ڵگاو قه‌وم وخيش نه‌ويری باس له‌ خوازينی بكاو ژيان هاوسه‌رگيری وه‌ليا بسازيد له‌ ئاينده‌.

ئيمه‌ له‌يرا ئويشيم خاستر ئه‌وه‌سه‌ خيزانه‌يل كوومه‌ڵگا مه‌سه‌له‌ی عومر تا راده‌يگيش له‌ژير ١٠ساڵيش نه‌كه‌نه‌ مه‌هانه‌و ده‌سپيچگ‌ له‌ هه‌ڵوژاردن هاوسه‌ر ژيان ئه‌را كوڕه‌يليان، يا وه‌ مانايگ تر هه‌رچه‌نی دويه‌ته‌گه‌ چه‌ن ساڵيگيش له‌ كوڕه‌گه‌ گه‌وراتر بوود نه‌كريه‌يده‌ كيشه‌يگ و نواگيری نه‌كريه‌يد له‌ هه‌ڵوژانن و هاوسه‌گيری ناونيان له‌ حاڵه‌تيگ ئه‌گه‌ر خوه‌شه‌ويسی له‌ناونيان وجوود داشت، چوينكه‌ گه‌ورايی مانای ئه‌وه‌سه‌ فيشتر ئه‌زمووندار و سه‌ررشته‌داره‌ له‌ گوزه‌ركردن ژيان و نه‌بايه‌د ئی مه‌سه‌له‌ وه‌ عه‌يب و شووره‌يی ته‌ماشا بكريه‌يد، چوينكه‌ شووره‌يی ها له‌ورا دويه‌ت فريه‌ بويچگيگ له‌ عومر وه‌ هاوسه‌ر ژيان هه‌ڵوژنيد و هويچ ماريفه‌ت و ره‌فتار په‌سه‌نيگ نه‌زانيدو دويای چه‌ن وه‌خته‌يل كه‌ميگ ئاره‌زوو ته‌ڵاقداينی بكه‌يد يا كيشه‌و گرفت دروس بدێ و له‌ی حاڵه‌تيشه‌ ئه‌ز‌ره‌ته‌يل دو دڵ خاكه‌سار ئه‌دێ له‌ ئاكام ره‌فتار ناپوخت و ناوه‌جی.

جه‌ماڵ ئه‌ركه‌وازی