ئه‌گه‌ره‌یل دویاى هه‌ڵوژاردن

شفق نيوز

 

مه‌زه‌نه‌ى ئه‌وه‌ ئه‌كریه‌ید ك دوباره‌ له‌ى هه‌ڵوژاردنه‌ كورد ده‌نگ بیاده‌ كورد و شیعه‌ وه‌ شیعه‌و سنى وه‌ سنى، ك یه‌یش دى بویه‌سه‌ نه‌ریت. له‌ 2003 تائیسه‌ ناوچه‌یل سنى وه‌ل حكوومه‌ت زوورمینه‌ نه‌سازیانه‌و هس وه‌ بیبه‌شى و دویره‌وخستن ئه‌كه‌ن، دى له‌ جه‌نگ ئه‌مریكاوه‌ بگر تا ره‌سیده‌ جه‌نگ و مرافه‌ى ئیسه‌ى ئه‌نبار و فه‌لوجه‌و حه‌وز حه‌مرین و ته‌قینه‌وه‌و كرده‌وه‌یل رووژانه‌ى ترۆریستى و ئاواره‌بوین به‌شیگ له‌ مه‌ردم سنى و په‌نابردن ئه‌را كوردستان و مه‌سه‌له‌ى كیشه‌و گرفت كورد وه‌ل حكوومه‌ت مالكى له‌ ماوه‌ى چوار ساڵ فیشتره‌و بویه‌ نه‌ك كه‌متر، یه‌یش بیجگه‌ كه‌مه‌وبوین متمانه‌ وه‌ یه‌كترى.

ماناى ئه‌وه‌سه‌ له‌بان ئاست نه‌ته‌وه‌یى و مه‌زه‌وى، ته‌رازوى هیز هه‌ڵوژاردن له‌ ناونى هه‌رسێ پیكهاته‌ى سه‌ره‌كى ئاڵشتكارى خاسیگ نایه‌ده‌ بانى، دى ته‌نیا ئاڵشتكارى له‌ چوارچیوه‌ى پیكهاته‌یل مینید، ك ئایا ئیجاره‌ له‌ناو شیعه‌ چ ئاڵشتكارییگ بنه‌ڕه‌تى روى ئه‌یاد، یا له‌ ناو سنیه‌یل، یا له‌ناو كورد؟

باوه‌ڕمان ئه‌وه‌سه‌ له‌ناو هه‌رسێ پیكهاته‌گه‌ ئاڵشتكارى بوودو ئه‌و ئاڵشتكاریه‌یلیشه‌ له‌ دویاى 30 / 4 كاریگه‌رى ئه‌خاده‌ بان بار عراق چ وه‌ ئاراسته‌ى وه‌یه‌كه‌وژیان و هاوبه‌شى و ئاشتى بوود چ وه‌ئاراسته‌ى سه‌خته‌وبوین قه‌یرانه‌یل، ك هه‌رچه‌نى به‌شیگ له‌ فراكسیۆن ده‌وڵه‌ت یاسا حه‌ز ئه‌كه‌ن كورد له‌ كووڵیانه‌و بوود تا له‌ناو عراق بوونه‌ زوورمینه‌ى باڵاده‌س و ئیراده‌ى خوه‌یان بچه‌سپنن له‌بان كه‌مینه‌ى سنى.

هیزه‌یل دیموكراسى عراقى گشتیان كزن و له‌و پله‌و پایه‌ نین و له‌ هاوكیشه‌یل ناو عراق و له‌ چاره‌نویس وڵاته‌گه‌یش چشتیگ وه‌پیان ئه‌نجام نادریه‌ید، دیاره‌ ئاڵشتكارى له‌ ناو شیعه‌یلیش گرینگى خوه‌ى دیریدو چشته‌یل فریه‌یگ یه‌كلاوه‌ ئه‌كا، وه‌لى مادام شیعه‌یل زوورمینه‌ن ئه‌وه‌ بیگومان ستێرن حوكمڕانى له‌ عراق ها ده‌س ئه‌وانه‌و، وه‌لى كامیان ئه‌و ستێرنه‌ ئه‌گریده‌ ده‌س؟

ئمجا ئایا چه‌ له‌وه‌رده‌م كورد ئه‌مینیده‌و، یا ئه‌وه‌سه‌ وه‌ل باڵیگ یا دو باڵ شیعه‌و بڕیگ لایه‌ن سنى و كه‌مایه‌تیه‌یل زوورمینه‌یگ دروس بكاو جاریگ تر به‌خت خوه‌ى ئه‌را دیموكراسى ته‌وافوقى و هاوبه‌شى تاقیه‌و بكا، یا وه‌ل سنیه‌یل یه‌ك به‌ره‌ دروس بكاو بازنه‌ى كیشه‌یل گه‌وراتر بكا، یا بكه‌فیده‌ گفتگوو وه‌ل به‌غدا ئه‌را په‌یاكردن شیوازیگ تر وه‌یه‌كه‌و ژیان وه‌ حوكم جوگرافیاو تاریخ و به‌رژه‌وه‌ندیه‌یل، یا بایه‌سه‌ وه‌ل ئه‌و هه‌مگه‌ قه‌یرانه‌یل ئیسه‌ وه‌رده‌وام بوودو له‌بان بنه‌ماى كار و كاردانه‌وه‌ هه‌ڵسووكه‌فت بكاو خوه‌ى بیاده‌ ده‌س قه‌زاو قه‌ده‌ر.

ئمجا ئایا چه‌وه‌ڕى چ ئاڵشتكارییگ ئه‌كریه‌ید له‌ناو كوردستان؟ له‌بان ئاست هه‌رێم ئیسه‌ى كوردستان له‌و باوه‌ڕ نییم ئاڵشتكارى خاسیگ له‌ ریژه‌ى ده‌نگه‌یل روى بیه‌ید، چوینكه‌ ئه‌را ماوه‌ى شه‌ش مانگیگه‌ هه‌ڵوژاردن ئه‌را په‌رله‌مان كوردستان ئه‌نجام دریاگه‌، وه‌لى ئه‌گه‌ر هساو ناوچه‌یل كوردستانى ده‌یشت هه‌رێم بكریه‌ید، ئه‌وه‌ بیگومان ئاڵشتكارى له‌بان ریژه‌ى ده‌نگه‌یل و كاریگه‌رى له‌بان پیكهاوردن حكوومه‌ت و له‌بان به‌شدارى پۆسته‌یل به‌غداو له‌بان ئاست پاریزگایه‌یل هه‌رێمیش دیرید.

ماناى ئه‌وه‌سه‌ له‌ شوون 30 / 4 بایه‌سه‌ ته‌ماشاى شایسته‌یى هه‌ڵوژاردنه‌یلیش بكریه‌ید له‌بان ئاست په‌رله‌مان و حكوومه‌ت كوردستان و له‌بان ئاست پاریزگایه‌یل هه‌رێم و ئاست به‌شدارى و به‌شه‌یل كورد له‌ به‌غدا، ئه‌ویش وه‌ مه‌رج ئه‌وه‌گ كورد وه‌ یه‌كگرتگ بمینید له‌وه‌رانوه‌ر به‌غداو په‌یوه‌س بوود وه‌ل هه‌ر یه‌ك له‌و ئه‌گه‌ره‌یله‌ ك په‌یوه‌ندى وه‌ چاره‌نویس عراعه‌و دیرن جوور ده‌وڵه‌ت.

ئاسۆ كه‌ریم

ج . أ