ئه‌و زووانه‌يل جه‌هانيه‌ ك فيشتر وه‌كار ئه‌يه‌ن، كامانه‌ن؟

شفق نيوز

ئمجا له‌ ناودارترين ئه‌و ئاماره‌يل جه‌هانيه‌ له‌ كتاويگ وه‌ناو(راسيه‌يل جه‌هان) بڵاو كرياگه‌ ك له‌لايه‌ن هه‌واڵگرى ئه‌مريكيه‌و ده‌رچيه‌، هه‌ر له‌وه‌ر ئه‌وه‌يش زوورم ئاماره‌يل و سه‌رچه‌وه‌يل ليستيگ وه‌ داناين 10 زووان بڵاو كردنه‌ له‌ڕوى قسه‌كه‌ره‌يل و ريژه‌يان له‌ شماره‌ى مه‌ردم جه‌هان، ك ئى ليستيشه‌ له‌ خواره‌و وه‌ره‌و بان دانرياگه‌:

10- له‌ پله‌ى ده‌يه‌م زووان ئه‌ڵمانى

ريژه‌ى قسه‌كه‌ره‌يل وه‌ى زووانه‌ 2.77% له‌ شماره‌ى مه‌ردم جه‌هانه‌، ك سه‌ر وه‌ زووانه‌يل ئه‌ڵمانياى خوه‌رئاواييه‌و يه‌كيگه‌ له‌و زووانه‌يل داڵگيه‌ ك فيشتر ناوداره‌ له‌ يه‌كێتى ئۆرپاو ديارترين ئه‌و وڵاته‌يليشه‌ ك وه‌ى زووانه‌ قسه‌كه‌ ئه‌كه‌ن پيكهاتنه‌ له‌: ئه‌ڵمانيا، نه‌مساو به‌شه‌يليگ له‌ سويسرا و به‌لجيكا.

9- له‌ پله‌ى نۆيه‌م زووان فره‌نسى

ريژه‌ى ئه‌و مه‌ردمه‌ ك ئه‌را قسه‌كردن ئى زووانه‌ ئه‌يه‌رنه‌ كار 3.05% له‌ شماره‌ى مه‌ردم جه‌هانه‌و 32 ده‌وڵه‌ت جوور زووان فه‌رمى قسه‌ وه‌پى ئه‌كه‌ن و ئه‌وانه‌گ وه‌ زووان ره‌سه‌ن داڵگى قسه‌ ئه‌كه‌ن له‌ فره‌نسا ژيه‌ن و باقى مه‌ردمه‌گه‌يش دابه‌ش بوينه‌ له‌بان وڵاته‌يل كه‌نه‌دا و به‌لجيكا و سويسرا و ئه‌فريقيا و لۆكسه‌مبۆرگ و موناكۆ.

8- له‌ پله‌ى هه‌يشته‌م زووان به‌نگالى

ريژه‌ى ئه‌و مه‌ردمه‌ ك وه‌ى زووانه‌ قسه‌ ئه‌كه‌ن له‌ جه‌هان ئه‌ڕه‌سيده‌ 3.19%، ك نزيكه‌ى 120 مليۆن كه‌س له‌ليان له‌ مه‌ردم به‌نگلاديشن و يه‌يش زووان ولايه‌ت به‌نگال خوه‌رئاواس له‌ هند و يه‌كيگه‌ له‌ زووانه‌يل ناسرياگ جه‌هان و زووانيگ هندى ئاريه‌ جوور هندى و ئوردى و سندى و بنه‌چه‌كى سانسكرتيه‌.

7- له‌ په‌له‌ى هه‌فته‌م زووان بورته‌غالى

ريژه‌ى قسه‌كه‌ره‌يل وه‌ى زووانه‌ ئه‌ڕه‌سێده‌ 3.26% له‌ مه‌ردم جه‌هان و دابه‌ش بوينه‌ له‌بان به‌رازيل و بورته‌غال و ماكاو و ئه‌نغۆلا و فه‌نزه‌ويلا و مۆزه‌مبيق، ئى زووانه‌ له‌گشت وڵاته‌يل جه‌هان بڵاوه‌و بوى له‌وه‌خت ده‌ركه‌فتن بورته‌غال جوور هيزيگ داگيركارى له‌ سه‌ده‌يل 15 و 16 زايينى و له‌ به‌رازيله‌و دريژه‌و بوى ئه‌را ماكاو له‌ چين و غوا له‌ هند، ك ئمڕوويش يه‌كيگه‌ له‌ زووانه‌يل سه‌ره‌كى له‌ جه‌هان و گه‌وراترين زووان له‌ ئه‌مريكاى باشوور له‌ڕوى قسه‌كه‌ره‌يليه‌و، وه‌ل ئه‌وه‌يشا زووانيگيش سه‌ره‌كيه‌ له‌ بريگ له‌ وڵاته‌يل ئه‌فريقيا و زووان فه‌رميه‌ له‌ 9 ده‌وڵه‌ت.

6- له‌ پله‌ى شه‌شه‌م زووان روسى

ريژه‌ى ئه‌و مه‌ردميشه‌ ك ئى زووانه‌ ئه‌يه‌رنه‌ كار له‌ قسه‌كردن ئه‌ڕه‌سێده‌ 3.95% و دابه‌ش بوينه‌ له‌بان وڵاته‌يل فريه‌يگ له‌ كۆماره‌يل يه‌كێتى سۆڤێت وه‌رين و له‌وانه‌يش: روسيا و بيلا روسيا و كازاخستان و وڵاته‌يل تر.

5- له‌ پله‌ى په‌نجه‌م زووان ئسپانى

ريژه‌ى قسه‌كه‌ره‌يل وه‌ى زووانه‌ له‌ جه‌هان ئه‌ڕه‌سێده‌ 6.25% و شماره‌يان نزيكه‌ى 400 مليۆن كه‌سه‌ و دابه‌ش بوينه‌ له‌ وڵاته‌يل ئه‌مريكاى ناوين و ئه‌مريكاى باشوور بيجگه‌ ئسپانيا و كوبا و به‌شيگيش له‌ وڵاته‌يل يه‌كگرتگ ئه‌مريكا.

4- له‌پله‌ى چواره‌م زووان عه‌ره‌بى

ريژه‌ى ئه‌و مه‌ردمه‌ له‌ جه‌هان ك ئى زووانه‌ ئه‌يه‌رنه‌ كار ئه‌ڕه‌سێده‌ 6.6% و يه‌كيگه‌ له‌ كويه‌نترين زووانه‌يل جه‌هان و زوورم مه‌ردم خوه‌رهه‌ڵات ناوين و باكوور ئه‌فريقيا ئه‌يه‌رنه‌ى كار وه‌تايبه‌ت مه‌ردم وڵاته‌يل عه‌ره‌بى و مليۆنه‌ها كه‌س هه‌وڵ يايگرتنى ئه‌يه‌ن چوينكه‌ زووان قورئان كه‌ريمه‌.

3- له‌ پله‌ى سێيه‌م زووان هندى

ريژه‌ى ئه‌وانه‌گ ئى زووانه‌ ئه‌يه‌رنه‌ كار له‌ جه‌هان ئه‌ڕه‌سێده‌ نزيكه‌ى 11.51% و يه‌يش زووان فه‌رميه‌ له‌ هند و دويرگه‌ى فيجى(هندوستانى)و له‌ ده‌يشت هنديش له‌ وڵاته‌يل جوور نيبال و باشوور ئه‌فريقيا و موريشيوس و يه‌مه‌ن و ئۆغه‌ندا و ته‌نانه‌ت وڵاته‌يل يه‌كگرتگيش ئه‌يه‌رنه‌ى كار.

2- له‌ پله‌ى دويه‌م زووان ماندرين(چينى)

ئه‌و مه‌ردميشه‌ ك ئى زووانه‌ وه‌كار ئه‌يه‌رن ئه‌را قسه‌كردن ئه‌ڕه‌سێده‌ 18.05% و نزيكه‌ى فيشتر له‌ يه‌م مليار كه‌سن، يه‌يش زووان چينيه‌ ك گه‌وراترين مه‌ردمن له‌ جه‌هان و وڵاته‌يل جوور تايوان و سه‌نفافوره‌يش ئه‌يه‌رنه‌ى كار و له‌ هه‌مان وه‌خت زووان ماندرينى چه‌نه‌ها شيوه‌زووانيش گرته‌سه‌ خوه‌ى.

1- له‌ پله‌ى يه‌كه‌م زووان ئنگليزى

ريژه‌ى ئه‌و مه‌ردميشه‌ ك ئى زووان ئه‌يه‌رنه‌ كار ئه‌ڕه‌سێده‌ 25% و شماره‌يان فيشتره‌ له‌ 1.8 مليار كه‌س له‌ جه‌هان و زووان فه‌رمى چه‌ن ده‌وڵه‌تيگه‌و له‌وانه‌يش نيوزله‌نداو وڵاته‌يل يه‌كگرتگ و ئوستراليا و ئنگلته‌را و زيمبابۆى و ناوچه‌ى ده‌رياى كاريبى و هۆنغ كۆنغ و باشوور ئه‌فريقيا و كه‌نه‌دا، يه‌يش بيجگه‌ مليۆنه‌ها كه‌س تر له‌ جه‌هان ك جوور زووان دويه‌م ئه‌يه‌رنه‌ى كار وه‌ ئه‌وه‌گ زووانيگ ناوداره‌ له‌ جه‌هان.

سه‌رچه‌وه‌: RT