پيشنياريگ فه‌يلی ئه‌را كورد و شيعه‌ و سونی

شفق نيوز

ئمساڵيش بيجگه‌ ئه‌وه‌گ له‌بان ئه‌و قسه‌و باسه‌يله‌ راهاتيمنه‌، دى وه‌ل وه‌رده‌وامی له‌هويره‌وبردنيش ئه‌تويه‌نيم بويشيم كيشه‌ی پيكهاته‌گه‌مان جوور وه‌رز وه‌رده‌وام پايز وه‌پی هات ك تائيسه‌يش چه‌وه‌ڕی هاتن وه‌هار ئه‌كا، يه‌يش له‌ وه‌ختيگيش ك هوير له‌وه‌ كرديايم و ئه‌كه‌يم ك كورد وه‌رگريكه‌ر يه‌كه‌مه‌ له‌و كيشه‌ له‌ ديد نه‌ته‌وايه‌تيه‌و ك يه‌يش ماف خوه‌مانه‌، وه‌لی وه‌ختيگ ك له‌ كوردستان چه‌ومان كه‌فته‌ سه‌ركردايه‌تيه‌يل حزبی و حكومی هويچ به‌ياننامه‌يگ فه‌رمی له‌ليانه‌و ده‌رنه‌چی ك چه‌ن رسته‌ی كه‌ميگش له‌تی بوود ئاماژه‌ وه‌و فيشتر له‌ ماوه‌ی سێ ده‌يه‌ى ئه‌نفالكردن و كوشاننه‌وه‌ی ناسنامه‌ بكا، هه‌ر وه‌و خاتريشه‌ ئيمه‌ ئيسه‌ كه‌فتيمه‌سه‌ گومانه‌و له‌وه‌گ يا ئه‌وه‌سه‌ ئيمه‌ كورد نييم، يا ئيمانيگ وه‌و كيشه‌ نيه‌ ناوی كيشه‌ی كورد بوود جوور ئه‌وه‌گ باوه‌ڕ وه‌پی ديريم، دى شايه‌ت ئی گومانيشه‌ له‌لامان يه‌قينه‌و بدێ وه‌ل وجوود لايه‌نه‌يل حكومی په‌يوه‌نديدار له‌ی باوه‌ته‌وه‌و ئه‌را نموونه‌يش(وزاره‌ت شه‌هيده‌يل و ئه‌نفالكرياگه‌يل) ك ئيسه‌ بويه‌سه‌(وزاره‌ت له‌هويره‌وبردن و دريغی)، نه‌ك ته‌نيا هه‌ر ئه‌را ئيمه‌، به‌ڵكوو ئه‌را گشت قوربانيده‌ره‌يل.

له‌ وڵاتيگ تايفی له‌وه‌ختيگ ك‌ شيعه‌يم ‌وه‌بی ريڕه‌و سياسی يا لايه‌نگر حزبه‌يل تر بويم پيشبينی چه‌ له‌ی رووڵه‌يل هه‌مان تايفه‌ ئه‌كه‌يم ك پيشكه‌شی وه‌پيمان بكه‌ن وه‌ل ئه‌و گرژی و چويچيانه‌ ك خوه‌يان له‌تی ژيه‌ن له‌سای ئه‌و ده‌رفه‌ت مێژووييه‌ له‌و حوكمڕانيه‌ ك كه‌فته‌ ده‌سيان؟ ئه‌يانه‌ خوه‌ندنه‌وه‌يان ئه‌را گوزه‌يشته‌ وه‌رته‌نگه‌ وه‌شيوه‌يگ شماره‌یی وه‌ل نه‌وين ستراتيجيه‌ت له‌وه‌ر ئيسه‌و ئاينده‌ ئه‌را سته‌مليكرياگيگ زينگ ك له‌ناونيان وجوود ديريد.

وه‌ گوزاره‌ی هاووڵاتيبوينيش هه‌رچه‌نی ك عراقييش بويم وه‌ مواسفات وڵاتيگ خاوه‌ن سه‌روه‌ری ئايا چه‌نيگ له‌ برايه‌يل سونيمان شانازی وه‌ مێژوو ده‌وڵه‌ت عوسمانی وه‌ ته‌به‌عيه‌ت ئه‌كه‌ن؟ ئمجا له‌سای ئی فكره‌و له‌ی خاك و ژينگه‌ له‌دايگ بويمنه‌و گه‌ورا بويمنه‌و ژيايم و مرديم وه‌بی ئه‌وه‌گ دگان وه‌پيمان بنريه‌يد جوور پيكهاته‌يگ هاوبه‌ش له‌ی نيشتمانه‌، ئی ريڕه‌ويشه‌ ره‌سانه‌مانه‌ ئی حاڵه‌ته‌ ك ئيسه‌ له‌تی ژيه‌يم‌ له‌ناو كومه‌ڵگايگ به‌سياگ و دويرگر له‌ په‌يمانه‌يل ئنسانی.

خاستر ئه‌وه‌سه‌ راسگووه‌يل وه‌پيمان بويشن ك وه‌خت موجامله‌ ئه‌را ئيمه‌ دی ته‌مام بوی و كورد و شيعه‌و سونی ريككه‌فتنه‌ له‌بان ئه‌وه‌گ ئی زوڵمه‌ هه‌ر وه‌رده‌ه‌وام بدێ ده‌رهه‌ق هه‌ر ئاده‌ميزاديگ خوه‌يان بخوازن ك هويچ خوسه‌و كينه‌تيگيان نه‌شاريده‌وه‌و دڵنياس له‌ خوه‌ی ‌ له‌ڕوی ئنتمابوينی ئه‌را مه‌زه‌و و نه‌ته‌وه‌ و نيشتمان ك هه‌رچه‌نی ئه‌وانه‌يش زه‌ره‌د ده‌روينی و گيانييش وه‌پی ره‌سنن.

كه‌سه‌يليگيش پيشنيار ئه‌وه‌ ئه‌كه‌ن وه‌خاتر ئه‌وه‌گ رووڵه‌يل پيكهاتگه‌مان له‌ كوردستان دڵنيايی وه‌پيمان داشتوون له‌ ئنتمامان تاقيگای وشكانن dna له‌ نزيك خاڵه‌يل وشكانن سه‌ر وه‌خوه‌يان له‌ هه‌رێم دابنه‌ن ئه‌را ئه‌وانه‌گ ته‌نيا وه‌ جه‌سه‌ قورتار بوينه‌و ئه‌نفالكرياگه‌يل ناسنامه‌يان بكوشيه‌يده‌و تا مێژوو ئه‌و زوڵمه‌ له‌ هويره‌و بووه‌يم ك ناوی ده‌زگای نفووسه‌و جوور ئه‌وه‌گ ئيسه‌ هه‌يم ته‌ماشامان بكه‌ن نه‌ك جوور ئه‌وه‌گ باس ئه‌كريه‌يد.

له‌ وه‌رانوه‌ر ئه‌وه‌يش داوا له‌ رووڵه‌يل مه‌زه‌وه‌گه‌مان ئه‌كه‌يم وه‌رجه‌ هه‌ر بريارداينيگ سه‌ردان وادی ئه‌لسه‌لام و قه‌ورسان پيرووز كه‌ربه‌لا بكه‌ن تا وه‌چه‌و خوه‌يان ئه‌و هاوبه‌شيه‌ بوينن ك ئسپات لايه‌نگريمان ئه‌را ئه‌هلولبه‌يت ئه‌كا نه‌ك ئه‌را حزبحزبايه‌تی و تونڕه‌وی مه‌زه‌وی وه‌ سياسه‌تكرياگ و ئه‌وه‌نه‌ی قه‌واره‌ی بی سه‌روشوون و كووچ وه‌پيكرياگه‌يلمان ئنسافمان بكه‌ن.

برايه‌يل سونيمانيش ك هانه‌ ژير چادر وڵاتيگ ناوی عراقه‌ وه‌رجه‌ ئه‌وه‌گ شانازى وه‌ ده‌سكه‌فت و شوونه‌واره‌يليگ بكه‌ن‌ ك به‌شداری له‌لی كرديم ئه‌را ئاوه‌دانی و بنيات و په‌ره‌داين ئی وڵاته‌ و وه‌رجه‌ رويكردن له‌ هه‌ر مه‌هانه‌يگ بايه‌سه‌ له‌بانيان دگان وه‌و زوڵمه‌ بنه‌ن ك هاته‌ تويشمان له‌ژير هه‌ر ناونيشانيگ و له‌ هه‌ر لايه‌نيگه‌و، ئمجا دووس ديريم ك بويشيم هويچ رووژيگ له‌ رووژان نه‌ويمنه‌سه‌ گرفت له‌ هه‌ر پيشكه‌فتنيگ له‌وه‌رده‌م كومه‌لگای عراقی، به‌ڵكوو وه‌چه‌واشه‌وه‌ وه‌رده‌وام‌ به‌شدار بويمنه‌ له‌ بته‌وكردن چشتيگ ك ئمڕوو وجوود نه‌يريد، ك ئه‌ويش هاووڵاتيبوينه‌.

ئيسه‌يش كورد و سونی و شيعه‌ له‌ مه‌ترسيدارترين بار ژيه‌ن ك گشت عراقيه‌يل وه‌پيا گوزه‌ر ئه‌كه‌ن، له‌گشت ئی كاره‌يليشه‌ ئيمه‌ ئوميده‌واريم ئه‌و هه‌ڕه‌شه‌و مه‌ويسی و كاره‌ساته‌ نه‌مينيد ك زويتر له‌تی ژيايم و ئمڕوو هاته‌سه‌‌ تويش گشت لايگ، ئمجا ته‌نيا چشتيگيش ك له‌هويره‌و ناچێد ئه‌ويش بيده‌نگی لايه‌نه‌يل فه‌رمی و حكومی و برايه‌يلمانه‌ له‌ نه‌ته‌وه‌و مه‌زه‌و و نيشتمان ك وه‌ليا گوزه‌ر كرديمه، به‌ڵكوو‌ له‌ چه‌نه‌ها بوونه‌يش بويمنه‌ نموونه‌يگ ئه‌را مه‌ويسی ئه‌و پيكهاته‌يليشه‌ ك ئمڕوو جوور ئه‌وسای ئيمه‌ تويش هاتنه‌.

عه‌لی حسێن فه‌يلی

ج . أ