دايگ خوه‌ندنگا نيه‌

شفق نيوز

 

وه‌لی ئمڕوو دويای ده‌يه‌ها ساڵ له‌ په‌روه‌رده‌ی ژن، هيمان ژنه‌يل نه‌ڕه‌سينه‌سه‌ گشت ئه‌و بواره‌يل كاره‌و به‌ش فريه‌يگ له‌ليان بويه‌سه‌ پزيشك و زوورميان بوينه‌سه‌ مامۆستاو بواره‌يل تريش وه‌ به‌تاڵ مه‌ندنه‌ له‌ ئاماده‌گی ژن و ئه‌و ريژه‌ له‌تی پڕه‌و نه‌كردنه‌، ئمجا ئايا له‌وه‌رچه‌ ژنه‌يل كه‌نداو له‌ بوار په‌روه‌رده‌ سه‌ركه‌فتن و ئه‌راچه‌ نه‌ڕه‌سينه‌ بواره‌يل تر؟!

هيزه‌يل ئۆپۆزسيۆن ك په‌روه‌رده‌ی ژنه‌يل ره‌ته‌و كرديان، هه‌ر هه‌مان ئه‌و هيزه‌يله‌نه‌ ك كاره‌يل په‌روه‌رده‌يشی وه‌رته‌نگه‌و كرد دويای ساڵه‌يل دويرودريژيگ. رووشنهويری كوومه‌ڵايه‌تی ك ته‌نيا جوور دايگ و ئمايه‌تكه‌ر نه‌وه‌يل دوينريا له‌ ژن، هه‌ر هه‌مان ئه‌و رووشنهويريه‌سه‌ ك ئمڕوو ڕی وه‌پی درياگه‌ بووده‌ مامۆستا، چوينكه‌ مامۆستا ته‌نيا په‌روه‌رده‌كار نه‌وه‌يله‌و ره‌سميگه‌ هاوشيوه‌ی ره‌سم دايگ و خوه‌ندنگايش هه‌ر ماڵه‌و حه‌ره‌مگای تايبه‌تيگه‌ ك ناوجوودی و نه‌وين تيكه‌ڵايی وه‌ل پياوه‌يل زه‌مانه‌ت ئه‌كا.

رووشنهويری ڕی وه‌ ئه‌وه‌دا ك ژن له‌ شوونيگه‌و ده‌رچوود ئه‌را شوونيگ تر، هه‌ر وه‌و خاتريشه‌ خوه‌ندنگا ئه‌رای كريا ماڵ جيايگ و دوير له‌ ژيان گشتی و له‌يوا نيشان دريا ك ژن ته‌نيا شايسته‌ی په‌روه‌رده‌كردن نه‌وه‌يله‌.

ئی رووشنهويری كويه‌نه‌ له‌ چه‌سپانن ديد خوه‌ی له‌بان پرووژه‌ی رويداگه‌يل په‌روه‌رده‌كردن دويه‌ته‌يل سه‌ركه‌فت و ئی حاڵه‌ته‌يل كوومه‌ڵايه‌تيه‌ وه‌رده‌وام بوی له‌بان ژن ته‌نيا جوور دايگ و په‌روه‌رده‌كار نه‌وه‌يل، چوينكه‌ ده‌زگايه‌يل په‌روه‌رده‌يی كه‌فته‌ ژير ئداره‌ی ئی رووشنهويريه‌و دويه‌ت له‌تی په‌روه‌رده‌ كريا تا بووده‌ دايگ يا له‌ناو خوه‌ندنگا جوور مامۆستاو له‌ماڵيش دايگ بوود، وه‌لی كوڕ ڕی وه‌پی دريا هوير له‌ گشت بواريگ بكا وه‌بی ئه‌وه‌ك گرفت ئه‌رای دروس بكريه‌يد.

په‌روه‌رده‌ بايه‌سه‌ ئاڵشتكاری رووشنهويری بچه‌سپنيد نه‌ك بچووده‌ ژير سای، وه‌ل ئه‌وه‌يشا نه‌خش كوومه‌ڵايه‌تی ژن يه‌كيگه‌ له‌ گرينگترين ئه‌و روی وه‌ڕوی بوينه‌وه‌يله‌و بايه‌سه‌ بزانيد چوين ئه‌و ته‌وقه‌ بشكنيد ك ژن له‌تی گير خواردگه‌، دايگ خوه‌ندنگا نيه‌و ژنيش له‌ گشت حاڵه‌تيگ دايگ نيه‌، ژن هاووڵاتييگه‌ و مافه‌يل كرده‌وه‌يی و سياسی خوه‌ی ديريد ئه‌گه‌ر ته‌نيا په‌يوه‌س نه‌كريه‌يد وه‌ مه‌سه‌له‌ی دايگايه‌تی.

ژن ئاده‌ميزاديگه‌و نه‌بايه‌د نه‌خشی وه‌رته‌نگه‌و بكريه‌يد له‌ كاره‌ بيۆلۆجيه‌گه‌ی، ئه‌وه‌كيش رويدا وه‌ دريژايی ساڵه‌يل جوور خود وه‌ده‌سه‌وداينيگ ئی نه‌خشه‌ بويه‌ له‌ڕوی كوومه‌ڵايه‌تی و تا راده‌يگيش سياسی، ئمجا نه‌بايه‌د په‌روه‌رده‌ له‌بان باوه‌ڕ و نه‌ريته‌يل گوزه‌يشته‌ بچه‌سپه‌يد له‌بان ژن، به‌ڵكوو بايه‌سه‌ بواره‌يل تر ماريفه‌ت و زانست و كاره‌يل تر وه‌رفراوان ئه‌رای واز بكريه‌يد له‌ كه‌شيگ تايبه‌ت و جيا له‌ كاره‌يل تر كوومه‌ڵايه‌تی.

له‌ميا ئه‌لسوه‌يلم

ج . أ