چاره‌سه‌ر هه‌ر جيابوينه‌

شفق نيوز

ئمجا له‌ ٢٧ مانگ گوزه‌يشت، وه‌ مانای ٨٢ ساڵ و مانگيگ له‌ دويای ئه‌و جه‌مكوشی كورده‌، وه‌زير خارجيه‌ی بريتانيا وليام هێگ له‌ هه‌ولێره‌و داوا له‌ كورد كرد بچنه‌ دسميه‌ت به‌غداو عيراق بته‌وه‌و بكه‌ن. گومان له‌وه‌يش نيه‌ هێگ خاس زانيد وڵاته‌گه‌ی ئه‌و وه‌رپرس يه‌كه‌مه‌ له‌و جه‌مكوشيه‌يله‌ ك له‌لايه‌ن حكوومه‌ته‌يل يه‌ك له‌شوون يه‌ك عراقه‌و هاوريانه‌ بان كورد.

ئيسه‌يش وه‌ختيگ داوا له‌ كورد ئه‌كا بچن و عراق له‌و بار سه‌خته‌ قورتار بكه‌ن، وڵاته‌گه‌ی خوه‌ی ناخاده‌ ژير بار هويچ گه‌ره‌نتييگ له‌باوه‌ت ئه‌وه‌ك جاريگ تر ده‌سڵاتداره‌يل به‌غدا په‌لامار كورد نايه‌ن. بار كورديش وه‌ به‌راورد وه‌ل ٨٠ ساڵ وه‌رجه‌ ئيسه‌ ئاڵشتكاری فريه‌يگ هاته‌سه‌ بانی، ئه‌وه‌ك له‌و ماوه‌ی ٨٠ ساڵه‌ ئاڵشت نه‌ويه‌ ته‌نيا ئه‌قڵيه‌ت ئه‌و عه‌ره‌به‌يله‌سه‌ ك له‌ به‌غدا ده‌سڵات ئه‌گرنه‌ ده‌س، ئه‌وه‌سه‌ په‌رله‌مانتاريگ عه‌ره‌ب له‌ يه‌كه‌م دانيشتن په‌رله‌مان عراق هه‌ڕه‌شه‌ی سه‌رپانه‌وكردن له‌ كورد ئه‌كا، جوور ئه‌وه‌ك چوين مارانگه‌زه‌ له‌خشه‌ی گوريس چركيه‌يده‌و، ك بايه‌سه‌ كورديش هه‌ڕه‌شه‌يل به‌غدا فه‌رامووش نه‌كاو له‌و ديده‌و سياسه‌ت بكا.

يه‌يش له‌وه‌ختيگ وه‌رپرسه‌يل ئه‌مريكاو ئۆرپا باس له‌ گله‌ونه‌خواردن عراق ئه‌كه‌ن ئه‌را بار جارانی، ك هه‌ر وه‌و خاتريشه‌ غه‌ڵه‌ت ستراتيجی و گه‌ورايگه‌ ئه‌گه‌ر كورد به‌شدار بوود له‌ هه‌وڵ هاوردنه‌وه‌ی عراق ئه‌را وه‌رجه‌ ده‌رچگن موسڵ و ناوچه‌يل تر سنی نشين له‌ژير ده‌سڵات حكوومه‌ت مالكی.

به‌شداريكردن له‌ هره‌ پرووسه‌يگ له‌و جووره‌ مانای به‌شداربوينه‌ له‌ دروسكردن ده‌سڵاتيگ ك هويچ گه‌ره‌نتييگ نه‌يريد ئه‌را ئه‌وه‌ك له‌ ئاينده‌ په‌لامار كورد نه‌يه‌يد. دی كوڵ وكوڵبڕ ئه‌گه‌ر ته‌ماشای تومارنامه‌ی ٨٠ ساڵ گوزه‌يشت ناونی كورد و به‌غدايش بكه‌يم، ئه‌رامان ده‌رئه‌كه‌فيد ك ته‌نيا رييگ ئه‌رامان بمينيده‌و، ئه‌ويش جيابوينه‌!

به‌كر شوانی

ج . أ