هه‌نای فه‌رامووش ئه‌كريه‌يد

شفق نيوز

 

وه‌لی مايه‌ی دڵته‌نگی و ناڕه‌حه‌تيه‌ له‌ حاڵه‌تيگ ئه‌گه‌ر ته‌مه‌ن دووسی و هاوڕێتی كوڵ بوودو بكه‌فيده‌ وه‌ر وه‌يشت سيه‌سام و خه‌زانيگ سسه‌وكه‌ر، ك وه‌جووريگ ئه‌و په‌يوه‌نديه‌يله‌ بكاده‌ خه‌ياڵيگ پڕ له‌ حه‌سره‌ت كاڵ.

دياره‌ ئاده‌ميزاد هه‌ر له‌سه‌ره‌تای په‌يابوينی له‌بان ئی گووشه‌ی زه‌ويه‌، وه‌بی په‌يوه‌ندی وه‌ل يه‌كتری نه‌تويه‌نستگه‌ په‌ره‌ بياده‌ ره‌وڕه‌وه‌ی ژيان، وه‌لی مايه‌ی نگه‌رانی و ناڕه‌حه‌تيه‌ ك له‌لايه‌ن كه‌سه‌يل تر نزيك جوور دووس و هاوڕی و قه‌وم خيش فه‌رامووش بكريه‌يدو گشت په‌يوه‌ندييگ هه‌واڵپرسی و ئنسانی جوانه‌مه‌رگ بكريه‌ن و بخريه‌نه‌‌ خانه‌ی له‌هويره‌وبردن، چوينكه‌ له‌وه‌ختيگ ك فه‌رامووش بكريه‌يدو له‌هويره‌و بچيد، ئه‌و وه‌خته‌ خوه‌د وه‌ كه‌سيگ بيگانه‌ی هه‌فتاچينی دوينيد له‌وه‌رانوه‌ر ئه‌و دووس و قه‌وم و خيشه‌ ك شايه‌ت رووژگار فريه‌يگيش زه‌حمه‌ت وه‌پيانه‌و كيشايده‌و شانازيي وه‌پيانه‌و كرديده‌ له‌وه‌رچه‌و مه‌ردم بيگانه‌.

ئمجا له‌وه‌ختيگيش پرسيار له‌ خوه‌د بكه‌يد و بويشيد ئايا من شايسته‌ی ئه‌وه‌مه‌ وه‌ی جووره‌ فه‌رامووش بكريه‌م، له‌و وه‌خته‌ گه‌رديده‌ شوون په‌ياكردن ئه‌و هووكاره‌يله‌ ك بوينه‌سه‌ دروسكه‌ر ئی حاڵه‌ت له‌هويره‌و بردنه‌، وه‌لی دوينيد بيهووده‌سه‌و هويچ هووكاريگ نيه‌ ئه‌را ئی دويرگرتن و فرامووشكردنه‌، دی ئه‌وسا ئه‌كه‌فيده‌ ناو هوير و خه‌ياڵ تر و ئه‌راد ئاشكرا بوود ك دووس و براده‌ر و كه‌س وكار "وه‌ختی" هويچ منايگ له‌بانيان نيه‌، چوينكه‌ هه‌ر له‌ بنه‌ڕه‌ته‌و گه‌ردنه‌ شوون به‌رژه‌وه‌ندی و كورد وه‌ته‌نی "برای مه‌سڵه‌حه‌تن" و هه‌ر وه‌و خاتريشه‌ ته‌مه‌ن براده‌ری و خيشايه‌تی له‌لايان كوڵه‌و به‌ردار نيه‌!!.

له‌يرا دوينيد مه‌ردمانيگيش هه‌ن پايه‌ی به‌رزيگ له‌لاد داشتنه‌و هه‌ميشه‌ جی باوه‌ڕ و متمانه‌ بوينه‌و هويچ رووژيگيش پيشبينی ئه‌وه‌ له‌ليان نه‌كرديده‌ له‌وه‌ختيگ له‌ليد بقه‌وميه‌يد يا تويش كاره‌ساتيگ بايد يا بكه‌فيده‌ بار سه‌ختيگ له‌ناكاو پشت له‌ليد بكه‌ن و نانه‌ قه‌ره‌د، وه‌لی پيشينه‌يل وتنه‌ "تفه‌نگ ئه‌را رووژ جه‌نگ، براده‌ر ئه‌را رووژ ته‌نگ"، دی له‌يرا بايه‌سه‌ دووس و براده‌ر خوه‌د بناسيد و بره‌سيده‌ ئه‌وه‌ باوه‌ڕه‌ ك سزای غه‌ڵه‌ت په‌ندوه‌رگرتنه‌.

ره‌نجده‌ر ئاواره‌