دید شۆڤێنى له‌ ئه‌نجوومه‌ن نوێنه‌ره‌یل

شفق نيوز

هه‌ر ئه‌وه‌ ده‌ستووره‌ له‌مادده‌ى 4 باس له‌ فره‌ زووانى كردگه‌و دگان وه‌ ئه‌وه‌ ناگه‌ ك هه‌ردوگ زووان عه‌ره‌بى و كوردى دو زووان فه‌رمیین له‌ سه‌رانسه‌ر عراق و ریگه‌یش داسه‌ هاووڵاتیه‌یل توركمانى و سریانى و ئه‌رمه‌نى وه‌ زووان دایگ بخوه‌نن و هه‌ر له‌و مادده‌ى چوار ده‌ستووره‌ ریگه‌ دریاگه‌ ك:

1- رووژنامه‌ى فه‌رمى وه‌قائع عراق وه‌ هه‌ردوگ زووان كوردى و عه‌ره‌بى ده‌ربچوود.

2- قسه‌كه‌ردو لێدوان و ده‌رخستن له‌ بواره‌یل فه‌رمى جوور" ئه‌نجوومه‌ن نوێنه‌ره‌یل، ئه‌نجوومه‌ن وه‌زیره‌یل، دادگایه‌یل، كۆنگره‌یل فه‌رمى" وه‌ هه‌ردوگ زووان كوردى و عه‌ره‌بى بوود.

3- دگانناین وه‌ به‌ڵگه‌یل فه‌رمى وه‌ هه‌ردوگ زووان و ده‌ركردن به‌ڵگه‌نامه‌یل فه‌رمى وه‌پیان.

4- وازكردن خوه‌ندنگایه‌یل وه‌ هه‌ردوگ زووان وه‌ گووره‌ى رینمایه‌یل په‌روه‌رده‌یى.

5- هه‌ر بواریگ تر ك شیواز یه‌كسانى مسۆگه‌ر بكا جوور سكه‌ و پاسه‌پۆرت و پوول .

6- دامه‌زریاگه‌یل فیدراڵى و دامه‌زریاگه‌یل فه‌رمى هه‌رێم كوردستان هه‌ردوگ زووان تیه‌رنه‌ كار.

7- زووانه‌یل توركمانى و سریانى دو زووان تر فه‌رمیین له‌و یه‌كه‌یل ئداریه‌ ك زوورم مه‌ردمه‌یلى پیك تیه‌رن.

8- هه‌ر هه‌رێم یا پاریزگایگ ئه‌راى هه‌س وه‌ راپرسى گشتى زووانیگ تر ناوچه‌یى بكاده‌ زووان فه‌رمى، هه‌ر له‌مادده‌ى چوار ده‌ستوور جه‌خت له‌وه‌ كریاگه‌ ك یاسایگ تایبه‌ت وه‌ زووان ده‌ربكریه‌ید. بڕگه‌ى یه‌ك مادده‌ى(12)ى ده‌ستووریش ئاماژه‌ وه‌ ئه‌وه‌ كردگه‌ ك ئه‌نجوومه‌ن نوێنه‌ره‌یل بایه‌سه‌ یاسایگ تایبه‌ت ده‌ربكا ئه‌را ئاڵاو دروشم و سروود نیشتمانى ك گوزارش له‌ پیكهاته‌یل ملله‌ت عراق بكا.

ئنجا بیجگه‌ ئه‌وه‌ك دو خول ئه‌نجوومه‌ن ته‌واو بوى، وه‌لى تائیسه‌ نه‌ یاساى تایبه‌ت وه‌ زووان فه‌رمى و نه‌یش یاساى تایبه‌ت وه‌ ئاڵاو دروشم و سروود نیشتمانى ده‌رچینه‌. هه‌ر له‌وه‌ر ئه‌وه‌یش دویاى چه‌وه‌ڕیكردن و ئاماده‌كارى فریه‌یگ ، له‌ى ماوه‌ى هه‌ردوگ یاساى تایبه‌ت وه‌ زووان فه‌رمى و سروود نیشتمانى خریانه‌ خشته‌ى كاره‌یل ئه‌نجوومه‌ن نوێنه‌ره‌یله‌و، وه‌لى فراكسیۆنه‌یل عه‌ره‌بى ره‌زامه‌نى له‌بان هویچكامیان نیشان نه‌یان.

هه‌ر له‌ى باوه‌تیشه‌و قسه‌كه‌ر هاوپه‌یمانى كوردستان له‌ ئه‌نجوومه‌ن نوێنه‌ره‌یل وه‌ داخ و سه‌رسوڕمه‌نینه‌و هووكار ده‌نگ نه‌داین زوورم ئه‌ندامه‌یل ئه‌نجوومه‌ن نوێنه‌ره‌یل ئه‌را یاساى زووان فه‌رمى ئه‌را دیدیگ شۆڤێنى به‌یده‌و ك وه‌هه‌مان دید رژیمه‌یل وه‌رینه‌و ته‌ماشاى ئى مه‌سه‌له‌ كه‌ن و ئه‌وه‌ وه‌پیان هه‌زم نیه‌و ك له‌بان پاسه‌پۆرت و پویل وه‌ هه‌ردوگ زووان كوردى و عه‌ره‌بى بنویسریه‌ید، یا باس زووانه‌یل تر جوور سریانى و توركمانى بكریه‌ید، یه‌یش له‌وه‌ختیگه‌ ك مادده‌ى چوار ده‌ستوور فره‌ وه‌ئاشكرا ئاماژه‌ وه‌و مه‌سه‌له‌یله‌ كردگه‌و هویچ بورایگ ئه‌را شیه‌وكردن جیا نه‌یشته‌سه‌و له‌تى.

ئه‌را مه‌سه‌له‌ى سروود نیشتمانییش، ئه‌ندامه‌یل فراكسیۆنه‌یل عه‌ره‌بى رازى نین خه‌ته‌ شعریگ وه‌ زووان كوردى له‌تى بوود، یه‌یش له‌وه‌ختیگه‌ ك له‌مادده‌ى(12)ى ده‌ستوور عراق فره‌ وه‌ئاشكرا باسى كردگه‌ ك بایه‌سه‌ ئه‌و سرووده‌ گوزارش له‌ گشت پیكهاته‌یل عراق بكا. ئنجا له‌وه‌ر رووشنایى ئى راسیه‌یله‌ په‌رله‌مانتاره‌یل عه‌ره‌ب ریز له‌و هه‌قه‌یل ناگرن ك ده‌ستوور مسۆگه‌رى كردگه‌ ئه‌را ملله‌ت كوردستان، ئه‌ى ئایا ئه‌را مه‌سه‌له‌یل تر نازگ و گه‌وراو نه‌ته‌وه‌یى هه‌ڵویستیان چوینه‌؟ ئایا بایه‌سه‌ چ دڵیگ وه‌و په‌رله‌مانه‌ خوه‌ش بكه‌یم ك نوێنه‌ره‌یل عه‌ره‌ب له‌تى وه‌و شیواز شۆڤێنیه‌ هویره‌و بكه‌ن؟

خه‌لیل عه‌بدوڵڵا

ج . أ