له‌"36"ه‌مين ساڵياد تاوانه‌يل كووچ وه‌پيكردن ده‌رهه‌ق كورده‌يل فه‌يلی

شفق نيوز

سه‌دام له‌ڕی داناين ئه‌لبه‌كر و له‌سێداره‌داين شماره‌يگ له‌ سه‌ركرده‌يلی پايه‌به‌رز تويه‌نست هه‌ر كه‌سيگ ك گرفت ئه‌رای دروس بكا لاوه‌ێد، له‌وه‌خت به‌رپابوين شووڕش ئسلامييش له‌ ئيران و خراوبوين بار ناوخوه‌يی سه‌ربازی و ئداری له‌تی و له‌ سه‌ره‌تای ساڵ ١٩٨٠ ده‌سكرده‌ خوه‌ه‌ ئاماده‌كردن ئه‌را جه‌نگ وه‌ل ئيران و گرفت مه‌رزی دروسكرد ك ئامانج له‌لی نه‌هيشتن به‌نده‌يل ريككه‌فتن جه‌زاير بوی و ئاشكرايش بوی ك ده‌زگای هه‌واڵگری وه‌ سه‌رپه‌رشی خوه‌ی بوی وه‌خاتر په‌يجوريكردن له‌و سيناريۆ، دی ئه‌وه‌ بوی ئه‌و ده‌زگا له‌ ١ نيسان ١٩٨٠ هه‌وڵ كوشتن تارق عه‌زيز له‌ زانكۆی مسته‌نسريه‌ داو ئه‌و تاوانيشه‌ راسه‌وخۆ خريا بان سه‌مير غوڵام ك خوه‌ندكاريگ كورد فه‌يلی بوی و هه‌ر له‌وه‌ر ئه‌وه‌يش رووژيگ دوياتر ده‌زگا ره‌ساننكاره‌گه‌ی ده‌ق ئه‌و هه‌وڵ كوشتن و سه‌ردان له‌ناكاو سه‌دامه‌ ئه‌را زانكۆگه‌و وتاره‌ دوشمنكاريه‌گه‌ی سه‌دام بڵاو كرد و ك له‌تی باس له‌وه‌ كرد ك گوايا هه‌ڕه‌شه‌ له‌ كرده‌وه‌ی نيه‌و له‌ هه‌مان وه‌ختيش قه‌سه‌م خوارد و وت: وه‌ڵڵا، وه‌ڵڵا، وه‌ڵڵا، وه‌ خوداو وه‌هه‌ق گشت زه‌ڕه‌يگ له‌ خاك رافده‌ين ئه‌و خوين پاكه‌ ك له‌ زانكۆی موسته‌نسريه‌ رشيا وه‌ تاڵان ناچێد.

ئه‌وه‌ بوی رووژه‌يل دوياتر ده‌زگايه‌يل كوشنده‌كاری ده‌سكردنه‌ هه‌ڵمه‌ته‌يل كووچ وه‌پيكردن زووره‌ملی وه‌جه‌م ده‌رهه‌ق خيزانه‌يل كورد فه‌يلی و يه‌كه‌مين قوربانيه‌يليش بازرگانه‌يل بوين، دی وه‌و جووره‌ وه‌ مه‌هانه‌ی ته‌به‌عيه‌ی ئيرانی ده‌سكرده‌ كووچ وه‌پيكردن خيزانه‌يل فه‌يلی ك هه‌رچه‌نی هه‌زاران كه‌س له‌ليان به‌ڵگه‌ی ته‌به‌عيه‌ی عوسمانييش داشتن، يه‌يش له‌وه‌ر ئه‌وه‌گ وه‌و جووره‌ مقه‌يه‌تی له‌و كارمه‌نده‌يل و ده‌وڵه‌ت عوسمانی بكا ك له‌ئاكام جه‌نگ جه‌هانی يه‌كه‌م شكه‌ست هاورد و حوكم پاشايه‌تی ئاشكرا كريا وه‌ سه‌رپه‌رشی بريتانيا له‌ ١٩٢٣ وه‌ گووره‌ی ياسای شماره‌ ٢٢، ك ئی ياسای خراويشه‌ عراقيه‌يل كرده‌ سێ به‌ش:

يه‌كه‌م: رعاقيه‌يل ره‌سه‌ن ك وه‌پيان وتيان ته‌به‌عيه‌ی عوسمانی.

دويه‌م: عراقيه‌يل پله‌ دو ك وه‌پيان وتيان، أ- ته‌به‌عيه‌ی ئيرانی، ب- ته‌به‌عيه‌ی هندی.

سێه‌يم: عراقيه‌يل پله‌ سێ، ك ئه‌وانيش له‌ ته‌به‌عيه‌يل تر بويه‌ جيا له‌ ته‌به‌عيه‌ی عوسمانی و ئيرانی و هندی.

سه‌دام جوور هه‌ر پيلانه‌يل تر ئه‌را به‌رپاكردن جه‌نگ ئه‌و كاره‌سات زانكۆی موسته‌نسريه‌ كرده‌ تاوانيگ و له‌ ئاكاميشی سه‌مير فه‌يلی ده‌ركريا له‌وه‌ر ئه‌وه‌گ ره‌گه‌زنامه‌ی پله‌ دو ته‌به‌عيه‌ی ئيرانی ديرێد و دی له‌وه‌يشه‌و بڕيگ له‌ بازرگانه‌يل شۆرجه‌يش داوه‌ت كريا ك زوورميان كورد فه‌يلی بوين وه‌ بوونه‌ی كاروبار بازرگانی و خريانه‌ ناو سه‌ياره‌ جوور گيرياگ و بردنه‌يان وه‌ره‌و وه‌ڕيه‌وبه‌رايه‌تی ئاسايش به‌غدا و دويای سه‌ندنه‌وه‌ی به‌ڵگه‌نامه‌يل عراقی له‌ليان ته‌سفيريان كردن وه‌ره‌و ئيران وه‌بی ئه‌وه‌گ ئاگادار خيزان و كه‌س وكاريان بكه‌ن.

دی له‌يراوه‌ گه‌شت مه‌ينه‌تی و ده‌رده‌سه‌ری ئه‌و خيزانه‌يله‌ وه‌بی هويچ تاوان و جورميگ ده‌سوه‌پيكرد و ئامانجيش له‌ دويره‌وخستن ئه‌و بازرگانه‌يله‌ ئه‌وه‌ بوی ده‌س بگرێده‌ بان داهات دارايی هه‌ر چالاكييگ دژ وه‌و رژيمه‌و زاڵ بدێ له‌بان بوار ئابووری له‌وه‌خت جه‌نگ له‌لايگ و، له‌لايگ تريشه‌و خيزانه‌يل كورد فه‌يلی ده‌ربكا وه‌ره‌و ئيران و رووڵه‌يليان ده‌سوه‌سه‌ر بكا ك زوورميان خوه‌ندكار بوين و بڕيگيش له‌ليان له‌ناو خزمه‌ت سه‌ربازی بوين.

جی داخه‌، دويای نه‌مه‌ندن ئه‌و رژيميشه‌ تائيسه‌يش ته‌رم هه‌زاران له‌ قوربانيه‌يل نيشان شووم ده‌رنه‌كه‌فتنه‌ له‌سای رژيم تازه‌يش ك ئه‌نجومه‌ن دادوه‌ری له‌ی باوه‌تيشه‌و بڕيار شماره‌(٤٢٦)ساڵ ٢٠١٠يش ده‌ركرد، ك ئوميده‌واريم حكومه‌ت عراقی كارای بكا له‌ڕی لايه‌نيگ ياسايی تايبه‌ت و دوير له‌ مزايده‌ی سياسيه‌يل، ئه‌ويش وه‌ ئه‌وه‌گ ئه‌و بڕياره‌ كيشه‌ی له‌ناوبردن و كووچ وه‌پيكردن كورده‌يل فه‌يلی وه‌ تاوان وه‌جه‌م تاريف كريا وه‌گشت پێوه‌ريگ و ته‌نانه‌ت ئه‌نجومه‌ن نوێنه‌ره‌يليش بڕيار له‌بانی دا و ئه‌نجومه‌ن سه‌رۆكايه‌تييش جه‌خت له‌بانی كرد وه‌ بڕيار(٢٦)و له‌ رووژنامه‌ی وه‌قايع عراقييش له‌ژير شماره‌(٤٠٨٧) له‌ رووژ ٢٢/ ٩ / ٢٠٠٨ بڵاو كريا.

ئه‌نجومه‌ن وه‌زيره‌يليش له‌ به‌ياننامه‌يگ له‌ رووژ ٨/ ١٢ / ٢٠١٠ قه‌وڵ ئه‌وه‌دا گشت شوونه‌واره‌يل خراويگ لاوه‌ێد ك له‌لايه‌ن رژيم ه‌رينه‌و ده‌رهه‌ق كورده‌يل فه‌يلی ده‌ركريا جوور سه‌ندنه‌وه‌ی ره‌گه‌زنامه‌ی عراقی و زه‌فتكردن ماڵ و موڵك و مافه‌يل تر زه‌فتكريای.

عه‌بدولسه‌مه‌د ئه‌سه‌د